Anamareza a Izrayel mvolowelani mu sidadi ya Jerikó, adhowile osama vatakulu va muyana wakuweliwa Rahab. Mwiweli mwene w’o Jerikó, oharuma anyakoddo wi adhowe vani-va Rahab. Iyene oavita alobwana aba eli vanddarani, nanda owaruma anyakoddo wi aavede epaddi yina. Iyene oapanga anamareza: ‘Miyo ddinele oukamihedhani sabwani ddiziwa wi Yehova oli na nyuwo vina munele owodha ovolowa mwilaboni mpuno. Ddinoukumbirhani wi muddivune miyo na murala waga.’

Anamarezaya amwaddela Rahab: ‘Ninolibela wi attu otene anakale mba mwawo anele ovuneya.’ Amwaddela vina: ‘Kamagelela kabala yofila vajanelani, wi amudhawo avuneye.’

Rahab ohabuddutxela vajanelani anamareza oheli. Awene attawela omwangoni ahimalawo malabo mararu ahinatti wiyelela wali Josuwé. Nomala aIzrayel ahabuwa Mwinje Jordau, nanda ahivisasanyedha wi abeddegele elaboya. Muttette woroma ogwihiwa wali Jerikó. Yehova  ohawaddela wi awerewere muttetteya dila modha valaboni mwari mwa malabo matanu na nimodha. Siku nomariha, awene awerewera muttetteya dila tanu na bili. Nomala anyamukutto amoba parhaza, nanda anyakoddo a Izrayel ahikuwa na lizu noliba. Dhirugu dha muttetteya dhiroma ogujuwa, dhimottela vati! Numba ya Rahab bahi, jahalile yowimelene. Rahab na murala waye aahivuneya sabwa y’omwiwelela Yehova.