Apo Yehova omwaddela Samuwel: ‘Kadhowa vatakulu va Jessé. Ddimusakulavo mwanaye mmodha wi akale mwene wa Izrayel.’ Samuwel ovenya, odhowa vatakulu va Jessé. Mmoneliye mwana munddimuwayavo wa Jessé, Samuwel ohubuwela: ‘Txino Mulugu omusakulile oddwene.’ N’eji Yehova omwaddela Samuwel wila iyene kamusakulile muzombwene oddule. Yehova ologa: “Athu anoziveliwa na dhawoneya, miyo ddinziveliwa na dha mmurimani.”

Jessé ohattanyutxa anaye atanu na mmodha. Etene abo Samuwel wanloga: “Kavo nne mmodha osakuliwe na Nabuya. Anawo otene babene?” Jessé omwakula: “Ohilivo mmodha ethogoyiyá.” ‘Nzina naye ddi David onsapiha mabila.’ David mudhoweleliwiye Yehova omwaddela Samuwel: “Dduddwene.” Samuwel ottukula makura, omuttikittela vamentoni va abalaye, wi akale mwene wa akadda Izrayel.

Musogorhomwa Aizrayel adhowa owana na akadda Filisti, anna munyakoddo wolapa, wettaniwa Goliya. Malabo otene awanani, Goliya wannabedda Aizrayel. Wankuwa dhahi: ‘Mmusakule mulobwana-mulobwana wi awane na miyo. Agaddipemperha iyo ninokala adhari enyu. Miyo ddigampemberha nyuwo munokala adhari ehu.’

Mudhidhene obo, David odhowana oja wi avahe abalaye ali anyakoddo. Iyene ohiwa dhaloga Goliya, nanda olibela: ‘Miyo ddinowanana.’ Mwene Sawul omwakula:  Weyo wamwana.’ David omwiyihedha: ‘Yehova onele oddikamihedha.’

Sawul ohinvaha David dhabalo dhaye dha koddo, David okodda eraga: “Kaddinwodha, dhinolemela.” David ottukula fisgaye odhowa omuwuloni. Oddodda malugu matanu oburhungeya, ohela mbudduni-mwaye. Nomala ottamagela wali Goliya. Goliya okuwa dhahi: ‘Kasusela apa mwana-weyo. Ddutatake okale oja wa balame na vinama dhamwini.’ David kovile. Iyene okuwa vina dhahi: “Weyo onddigwaddela na supadda na mwalago, miyo ddindha na nzina na [Yehova] Mulugu omusuthilewe.” ‘Ddabunene elabo yotene enoziwa wi mw’Izrayel mukala Mulugu.’ Iyene onele oniperhekela nyuwo mmadani mwehu.

David “ohika nlada mbudduni. Ottukulamo mwarha mmodha, [na nikamihedho na Yehova] ohika mfisgani omutwana Goliya vakoveni; ombiyela ogwelana vati.” Mpaka Goliya ogwa matalama ddeddere, ohikwa. David ottamagela wali Goliya, oweta supadda naye ompana mwinya. Afilisti monelani esidha avolowa mumbigiddini, attawa. Weyo onomukuluvela Yehova ninga mwakosela David?