Mukwele Sawul, David ohikala mwene. Wana vyaka 30. Mmaleliye vyaka dhinjene bali mwene, omattiyu dhahi avumaga mukoddemwaye, omona muyana wokoddela ahabaga. Mvuzeliye, owaddeliwa wi nzina naye ddi Betsabé mwadhi wa munyakoddo Uriya. David omukuweliha Betsabé. Agonihana, Betsabé okana yari. David wafuna avite yakosileye. Iyene omwaddela munddimuwa wa anyakoddo aye wila agadhowa oraba koddo, amweke Uriya osogorho wi apiwe. Mukwele Uriya, David omutela Betsabé.

Apo Yehova wela wona dhotene dhapadduwa. Agakosile eni? Yehova omuruma namavuhulela Natan wi anfwanye David. Natan ologa: ‘Muttu dhahi woreela wahikana mabila menjene, wahikalawo vina muttu mwina wali muyelegi wana nibila nimodha bahi, vina wankwela vaddiddi nibilana ntto. Mmalelani mulobwana wa mureli, ottukula nibila na mulobwana wa muyelegi.’ David onyonyeya vaddiddi ofiyedha ologa dhahi: ‘Muttu oddo okosile ejuwene ddofwanyela opiwa!’ Natan ohakula: ‘Muttuya oddo ddi nyuwene mwene.’ David wakubanya vaddiddi, nona ohimpanga Natan dhahi: “Ddimuttegela Nabuya!” Yottegaya eji ehimutotela David ntowa na murala waye. Yehova omusottotta David, mbwenye wahimuttiya okalawovi sabwa y’okala muttu wohimpela malago vina w’oviyeviha.

David wafuna wi ammagele mparha Yehova, Yehovaya bamwaddela wi onamage ddi mwanaye Salomau. Nona David oroma okosa masasanyedho wi amukamihedhena mwanaye Salomau, vina  ohiloga: ‘Numba ya Yehova ekale yotikiniha. Salomau mwana, miyo ddinele omukamihedha na mamageloya.’ David ohisokela kobiri yinjene wi akamihedhena mabasaya a omaga. Owatamela anamamaga owodha. Osokeliha wero na nddarhama, vina odhiha miri dha tteeka (sedron) dha akadda Tiru na dha akadda Sidon. Bagaddamela malabo aye a okwa, David wahinvaha malago mwanaye Salomau a omagana Numbaya ya Nabuya. Ologile dhahi: ‘Yehova ohiddiruma wi ddilebe dhilobo esi. Iyene onele oukamihedha. Kujeriheye. Libá murima, ovenyedhe mabasa a Nabuya.’