Mwana wa muttajiya wa Mwene Sawul wakuweliwa Jónata, wali munyakoddo woliba murima. David walogile wila Jónata wanttamaga opitta evagwe, vina wahivadda opitta poddogoma. Siku dhahi Jónata ohawona anyakoddo 20 akadda Filistiya. Iyene omwaddela mukamihedhi waye: ‘Ndowe nalupele amopi abo, Nabuya onele onivaha. Akadda Filistiya agaloga; kadhawunoni, iyo ninele wapemberha.’ Afilistiya akuwa: ‘Kadhawunoni niwane.’ Alobwana aba oheli awela mwango adhowa wapemberha anyakoddoya.

Vowi Jónata wali mwana woroma wa Sawul, ddi iyene wajedhela ottukula mpaddo w’omwene. Masiki dhawene, iyene kana aje vaziwiliye wila Yehova omusakulile David wi akale mwene. Jónata na David amaga omarho woliba. Alibela obarelana oheli. Jónata orula  yabalo yaye onvaha mukwaye David onvaha vina mukumi, supadda, mwalago na sintu.

David amuttawaga Sawul, Jónata omutamela ologana: ‘Kavadda, vina olibe murima. Yehova ohusakula wi okale mwene. Babani vina onoziwa ejoya.’ Ogahiziveliwa okana marho ninga Jónata?

Dila dhinjene Jónata ohika vangovini egumi yaye wi anvune mukwaye. Iyene wanziwa wi Mwene Sawul wafuna ampe David, nona wahimwaddela dhahi: ‘Nyuwo mugampa David munoddawa sabwa iyene kakosile elo-ene yabure.’ Eji emunyimula-wene Sawul. Musogorhomwa Sawul na Jónata ahikwa mukoddoni.

Mukwele Jónata, David omutamela mwana wa Jónataya, Mefiboset. Munfwanyeliye, omwaddela dhahi: ‘Mefiboset, vowi babo wali mukwaga, miyo ddinere oweddela ttagaraga. Odhe okalege na miyo ojege dhinjemi.’ David kadduwalile omarho waye na Jónata.