David mumpeliye Goliya, Mwene Sawul omwira munddimuwa wa anyakoddo aye. Davidiya opemberha koddo dhinji, nanda ovuwa kakamwe. Masiku otene David ageyelaga mukoddoni, ayana anninfwarela amutxettelaga amwibelaga: “Sawul wapile amwiddani txikwi, David wapile matxikwi kumi!” Sawul onyimuwa vaddiddi, mpaka otamela ompa David.

David wansibiwana eziwelo y’omoba kasasi. Siku nimodha David amobelaga Sawul kasasi, Sawul ottukula mwalago onvokela David. Davidiya ohusukula, nanda mwalagoya otorola erugu. Ovenyana venevo Sawul wannimutxiga David afunaga ompa. David ottawa odhowa okala mwini.

Sawul owattukula anyakoddo 3.000 odhowa omutamelana David. Sawuliya ovolowa mugurugudhani mwavitalile  David na anyakoddo aye. Alobwana ali na David anloga dhahi: ‘Eji gari, kampe.’ David osereneyela vali Sawul, ogwadda komo ya mukumi waye. Sawul konile. David mukoseliye ejuwene murimaye oroma omuttamaga sabwa y’ogwadda guwo ya mwene wottikitteliwa wa Yehova. Iyene kafunile wi alobwana aye ampe Sawul. Iyene omukuwela Sawul omwaddela wi agahimpa kofuna. Ejoya egahimukosiha Sawul osaddula monelo wamoniye David?

Nne-wene. Sawul odidelavi onfwarafwara David. Omattiyu dhahi, David na mudhulaye Abisayi avolowa vamusasani va Sawul. Kavo wawonile, nne Abner kawonile sabwani wela ogona. Nona Abisayi ologa: ‘Eji gari. Kaddittiye ddimpe Sawul.’ David omwakula: ‘Kamuttiye, Yehova onele omuttonga. Ovano ttukula mwalago na murhinga waye wa manje, ndowe vyehu.’

N’ovenya David owela mwango vakuvi va misasa dha Sawul. Iyene okuwa: “Nga weyo Abner, okoddeleni omukoya mwene wawo?” ‘Ki mwalago na murhinga wa mwene ol’uvi?’ Sawul mwiweliye lizu na David ologa dhahi: ‘Mwana weyo kofuna ogahiddipa, mbwenye kufunile. Ovano ddinoziwa wi onele okala mwene wa Izrayel.’ Venevo Sawul ohiyelela owani-waye. Ahikalawo amudhi eena a Sawul amukwela David.