Olamula wa akadda Síria ottukula mittette dha maziza kumi a Izrayel. Ovano mwene Sinakerib onogana ottukula mittette minli dhihaliwo dha o Judá. Iyene oromile mmodha-mmodha. Muttetteya wafunetxiye wali Jeruzalemi. Sinakerib kaziwa wila ddi Yehova wabarela muttette wa Jeruzalemi.

Mwene wa Judá Ezekiya, wahipitxa musoko mwinjene wi Sinakerib amuttiye Jeruzalemi. Ottiya Sinakerib ottukula musokoví, oharumawo anyakoddo aye ovadda wi amugujule Jeruzalemi. Muromeli akadda Síria ofiya vakuvi, attuya a mu Jeruzalemi aroma wova na ogurumelawa. Ezekiya ohawaddela: ‘Kamoove. Akadda Síria avaddilevi, Yehova onele onivaddiha opitta awene.’

Sinakerib omurumela o Jeruzalemi mwimeleli waye Rabsake, wi atxutxe nlogo. Rabsake ohimela otakulu wa sidadi okuwa: ‘Yehova kanauvuneni. Munanvuruwane Ezekiya. Kawo mulugu onwodha ouvunani mmadani mwehu.’

Ezekiya omukumbirha Yehova elobo yowira. Yehova omwakula: ‘Kamoove dhilogile Rabsake. Sinakerib kanamuttukule Jeruzalemi.’ Mosogorhomwá Ezekiya ohakela makarta adhela wa mwene Sinakerib. Makartayá aloga dhahi: ‘Muviperheke, vowi Yehova kanauvuneni.’ Ezekiya olobela eraga: ‘Eh Yehova, nivunení, wi attu otene aziwe wi nyuwo muli Mulugu mmodha bahi webaribari.’ Yehova omwakula: ‘Mwene wa Síria kanavolowe mu Jeruzalemi. Ddinele oubarela.’

Sinakerib wankuluvela wi momaguva agahimuttukula Jeruzalemi. Epadduwile jiji, omattiyu mmodha Yehova omurumela anju waye anyakoddo àli otakulu wa sidadi. Anjuyá owapa anyakoddo 185.000. Mwene Sinakerib ohayelela  anyakoddo aye otene ovaddetxa. Iyene ohiyelela owani-waye, na manyazo. Yehova ombarela Ezekiya vina Jeruzalemi ninga mwalogeliye. Weyo kokala mu Jeruzalemi ogahimukuluvela Yehova?