O Nínive sidadi ya Asíria attuyámo àli anamapuja. Nona, Yehova wahimuruma namavuhulela waye Jona awaddele attuya wi atxinuwe. Mmalelani Jona ottawela wego wina. Omuwela barku wadhowa o Tarsi, attawele wenewo.

Barkuya mfiyedhiye vari va nyaza, eroma woba pevo enddimuwa, nanda anameddihaya aroma wova. Amulobela mulugu wawa avuzaga: ‘Esidhá dhimpadduwela nni?’ Nomala Jona ohawakula dhahi: ‘Muladduya bwaga. Nabuya wile oddiruma, miyo baddittawa. Ddivokeleni mwiko, pevoya enele omaala.’ Anamatxerhengaya vagonelani omponya Jona, iyene odidelavi. Munvokelani munyaza, pevoya emaala-mmalelo.

Jona wobuwela wi onele okwa. Muromeliye oririma, okosa nlobelo wa Yehova. Mmalelani Yehova oruma oba enddimuwa. Ehimmedha Jona, Jonayá kakwile. Mbani mwaliye mwa oba Jona olobela eraga: ‘Ddinofuna ouwebedhani nyuwo masiku otene.’ Yehova omukoyavi Jona mbani mwa oba malabo mararu, nomala obaya emwamula Jona otakulu.

Vowi Yehova omvuna Jona, eji entapulela wi Jonaya kagadhowile o Nínive? Nne. Yehova omwaddela Jona wi adhowewo. Dila eji Jona ohiwelela. Mfiyedhiye ohaddela nlogo nttile novuta: “Agavira malabo 40 Nínive onotolotxiwa.” Mmalelani epadduwa  elobo yahajedheleya—akadda Nínive avuruwana, attiya mweddelo wawa wabure. Mwene w’o Nínive ohaddela nlogo eraga: ‘Munlelení Mulugu, mutxinuwe. Txino Mulugu onosaddula yafuniye onirana.’ Yehova moneliye wi attuya atxinuwa ottiya otolotxa sidadi ya Nínive.

Moneli Jona wila sidadiya kitolotxiwe, osilidhiwa vaddiddi. Mone: Yehova omvilela Jona omweddela ttagaraga, mbwenye Jona kafunile waweddela ttagaraga attu o Nínive. Ottiya ogilati musidadimwá, Jona odhowile otamela mundduri otakulu wa sidadi. Muri wanvaha mundduriya mumelani, Jona onyaguleya. Yehova omwaddela: ‘Weyo onkubanyedha muri obu opitta attu ali mu Nínive? Miyo ddihaweddela ttagaraga, avuluwa.’ Ninsunzavo eni? Wila attu a Nínive ali a makamaka opitta muri.