Jezabel wakana mwana wakuweliwa Atália, wali wabure ninga mamayaye. Wamutelile Atália wali mwene w’o Judá. Mamunaye mukweliye, owelile vampaddoni ddi mwanaye. Mukweli mwanaye, Atália oroma olamulela o Judá. Iyene oroma ovenyedha ononga ziza notene nattomeliwa olamula, awapa otene afuna olamulela masiki na adhulayeyá. Attu otene annimova.

Namakutta Munddimuwa Joyadá na mwadhiye Josabat, aziwa wi yakosa Atália yali yabure. Awene aviperhekela omvita mudhuli wa Atália, mwana-mulobwana wakuweliwa Jowás. Amukoya mpaka iyene wunuwa mumparhani.

Jowás mwakwanihedhiye vyaka tanu na bili Joyadá ohagumaniha anddimuwa otene na Aleviti ohapanga: ‘Mukale va musuwo muhimuttiye muttu ovolowa.’ Joyadá omwira Jowás mwene w’o Judá vina omwabaliha ezinddiyelo yomwene. Attu o Judá akuwa na lizu noliba eraga: “Moyo okale na mwene!”

Musano Atália mwiwaliye onyagula wakosa ang’aneli, ovolowa mumparhani. Mmoneliye mwene muswa okuwa: “Ddisadduweliwa! Ddisadduweliwa!” Ang’aneli amuttidda musano wabure, amburutxela otakulu ampela wenewo. Koddi attu arava dhabure dhetene dherile musano Atália?

Joyadá okamihedha nlogo nanda amukosela nipagano Yehova, alibela omwebedha iyene bahi. Joyadá ogujula mparha wa Baal onyenyeretxa dhigamuttu dhotene. Iyene ohattoma Aleviti wi alabe  mumparhani, mwa dhawene, attu ahiyelela webedha mumparhani wili. Ohattoma ang’aneli wi akalege vamusuwo, wi awang’anege attu anadhe ovolowana kwarula. Mmalelani Joyadá na ang’aneli eena amuttukula mwene amuweliha vampaddoni. Nlogo notene na Judá nihagalala venjene. Aroma omwebedha Yehova mufuruni, ottiya omwebedha Baal. Oliba murima wa Joyadá ohavuna attu enjene!