Josiya oromile olamulela bana vyaka tanu na ttaru. Malabwene abo attu annira muniya vina annebedha dhigamuttu. Josiya oromile otamela marhe apama omwebedha Yehova vaniyena vyaka 16. Vakwaniheliye vyaka 20, oroma otwa vibuwa mwali dhigamuttu dhali mwilaboni. Ovenyihedha mparha wa Yehova vakwanihiliye vyaka 26.

Namakutta Munddimuwa Hilkiya, ofwanya nivuru na Nlamulo na Yehova nali mumparhani, txino nivuruna walebile ddi Mizé. Safan, namaleba wa mwene ottukula nivuru na Nlamulo, oroma omwengesela Josiya. Muromele Josiya ovuruwana, ohubuwela wi nlogo nittiya omwiwelela Yehova mwa vyaka dhinjene. Mwene Josiya omwaddela Hilkiya dhahi: ‘Yehova osilidhiwana dhirilehu. Dhowá walogena. Iyene onele onipanga enfunehu wira.’ Yehova ohakula amwaddelaga namavuhulela wa muyana Hulda: ‘Nlogo na Judá niddinyanyala. Ddinele watabutxa, ottiya malabo analamulele mwene Josiya, sabwa iyene oviyeviha.’

Mwene Josiya mweweliye mazu aba, ovenya odhowa mumparhani, ohagumaniha attu a nlogo na Judá. Ottukula nivuru na Nlamulo, ohengesela nlogo notene. Josiya na nlogo notene, alibela omwiwelela Yehova na murima wotene.

Vahivira vyaka dhinjene nlogo na Judá nihinatti omuja Paskwa. Josiya moneliye munlamuloni wi awene anfuniwana omuja Paskwa vyaka dhotene, ohaddela nlogo eraga: ‘Mwireleni Yehova  Paskwa.’ Neji Josiya okosa masasanyedho a operheka mikutto dhinjene, vina ohawimetxa anameba mumparhani. Nomala nlogo nimuja Paskwa na Mattanga Omuttabelana Nabuya mwa malabo matanu na meli. Oromana malabo a Samuwel, kunakalaga Paskwa ninga odduwene. Josiya wankwela-wene Nlamulo na Mulugu. Weyo onowengesaga mwaha wa Yehova?