Elabo y’o Síria, wahikala mwana-muyana dhahi wa mw’Izrayel watxedheliwewo. Mwana-muyana oddo wamulaba mwadhi wa fumu wa anyakoddo a Síria watxemerhiwa Naaman. Mwanaburu oddo wannimwebedha Yehova masiki valiye yeka.

Naaman wahikana eredda yawopiha, nanda wanniwa opa mudhidhi wotene. Mwana-muyana wa mw’Izrayel wafuna amukamihedhe fumu waye. Noona, wahimpanga mwadhi wa Naaman dhahi: ‘Ddimuziwa muttu onwodha omvulumutxa mamunenyu. O Izrayel okala namavuhulela wa Yehova ontxemerhiwa Elizeu. Iyene ononvulumutxa mamunenyu.’

Mwadhi Naaman ohimpanga mamunaye dhetene dhalogile mwana-muyana. Vowi wanfuna ovulumuwa, wahivenya badhowa vani va Elizeu wakala w’Izrayel. Naaman wajedhela wi Elizeu amoone ninga muttu wa ettomo. Elizeu ottiya okosa ejuwene, omuruma mwimeleli waye wi amulejele Naaman, vina anvahe muselu waloga  dhahi: “Dhowá wahabe Mmwinjeni Jordau dila tanu na bili. Onovulumuwa.”

Naaman mwiwaliye, osilidhiwa. Ologa dhahi: ‘Ddobuwela wi iyene agahidha amulobelela Nabuya waye, attidda viloddadha, ddivulumuwa. Mone onddiruma ohaba mu Jordau. Owanihu o Síria ohikala manje aderetu anfwanyela ohaba. Kohaba mwenemo kaddigavulumuwile?’ Naaman onyaguleya, ovenyavo.

Emeleli a Naaman amukamihedha. Amwaddela dhahi: ‘Kowiliwa mwarumiwe wira elobo yorutxa wi mvulumuwe, kamugerile? Eji elogile namavuhulela oddu kahiyo elobo yorutxa. Kadhowani mwakose babani.’ Naaman ovuruwana. Iyene odhowa o Mwinje Jordau obwina dila tanu na bili. Dila yomariya, ovulumuwa. Iyene wahiziveliwa kakamwe, ohiyela wi amutamaalele Elizeu. Naaman ologa: ‘Ovano ddiziwa wi Yehova ddi Mulugu wa ebaribari.’ Mwana-muyana oddule wa mw’Izrayel kaziveliwe vaddiddi vamoniliye fumu waye wokoddelene?