Mulugu onowawobela attu a mikalelo dhotene wila anfiyedhe na nlobelo. (Masalmo 65:2) Masiki vankosiye dhaene, iyene kanvuruwana obe kanakela malobelo otene. Motagiha, malobelo a mulobwana onimutabutxa mwadhiye anobareliwa. (1 Pedro 3:7) Mowenjedha, Aizrayel mwadidelani okosa dhabure Mulugu kavuruwana malobelo awa. Jowooneyawene yawila nlobelo gari enihuna. Masiki dhaene, Mulugu onowakela malobelo attegi antxinuwa.—Kengesa Izaiya 1:15; 55:7.

Nlobelo ninokosa epaddi ya webedha wehu, noona ninofanyeela omulobelelaga Mpaddutxi wehu bahi, Yehova. (Mateu 4:10; 6:9) Mowenjedha, vowila nili attu ohakwana ninofanyeela olobelaga mu nzina na Yezu sabwani iyene okweli dhottega dhehu. (Joau 14:6) Yehova kanfuna wila niromolege wili-wili malobelo akakene apameliwe mmusorhoni obe alebiwe munivuruni. Onfuna wila nilobelege banigaloga esile dhili mmirimani mwehu.—Kengesa Mateu 6:7; Filipi 4:6, 7.

Mpaddutxi wehu onovuruwana masiki malobelo a mmirimani. (1 Samuwel 1:12, 13) Ononiwobela wila nilobelege mudhidhi-mudhidhivi onfunihu, ninga omaromo na omagomo wa siku, nigafunaga oja vina nigagumanaga na makattamiho.—Kengesa Masalmo 55:22; Mateu 15:36.

Onfiyedha Mulugu onorutxa sabwani ninkalawo vari va attu ahinimuroromela Mulugu vina ambedda ejile eroromelihiliye,  yawila velaboni yavati vanele okala murenddele. (2 Timóteo 3:1, 4; 2 Pedro 3:3, 13) Noona ninofanyeela otugumanaga na aroromeli akwihu, nanda awene vina anonifuna.—Kengesa Ahebreu 10:24, 25.

Otugumanaga na attu animukwela Mulugu ononikamiha onfiyedha Mulugu. Matugumano a Anamoona a Yehova anovaha midhidhi dhattima vaddiddi dha olibihiwa na nroromelo na attu akwihu.—Kengesa Roma 1:11, 12.

Onowodha onfiyedha Mulugu modheela otanaalelaga esile dhisunzile weyo mu Nzuni naye. Kobuwelaga mabasa aye, malago aye vina dhogana dhaye. Otanaalela na nlobelo ononikaaniha murima wa otamaalela okwela na zelu ya Mulugu.—Kengesa Josuwé 1:8; Masalmo 1:1-3.

Oninfiyedha Mulugu bahi akala onomukuluvela vina akala onomuroromela. Nroromelo nili ninga muri wopweta ontamela wekiwa manje wi wunuwe. Onofanyeela ojiha nroromelo nawo mudhidhi wotene modheela otanaalelaga sabwa enrumeelela weyo esile dhinroromeliwe.—Kengesa Mateu 4:4; Ahebreu 11:1, 6.

Yehova onowatanaala abale animukwela. Onowodha wabarela mwa elobo jilobo eganongile nroromelo nawa vina njeedhelo nawa na okaana egumi ya mukalakala. (Masalmo 91:1, 2, 7-10) Ononifugula mento wila nirabelege meeddelo annonga egumi na osanzaya wehu. Yehova ononisunziha mukalelo olitxi waderetu wa okalawo.—Kengesa Masalmo 73:27, 28; Tiago 4:4, 8.