Mpaddutxi wehu ddwa zelu vaddiddi opitta iyo. Ninga Babi wokwela, iyene ononitanaala. Mowenjedha, iyene kanfuna wila nikale na ofuru kakamwe nihikaanile musogorhelo waye. (Jeremiya 10:23) Ninga mwana mung’ono ontamela osogorheliwa na amambali aye, iyo notene ninofuna osogorheliwa na Mulugu. (Izaiya 48:17, 18) Magano a Bibilia anovaha musogorhelo obwene oli mvaho wa Mulugu.—Kengesa 2 Timóteo 3:16.

Malamulo na magano a Yehova anonisunziha mukalelo okaliletxe wa egumi ovanene vina anonilagiha mukalelo onwodhihu wakela mareeliho a mukalakala musogorho. Vowila ddi Mulugu onipaddutxile, jofanyeela kakamwe iyo wiwelelaga banigatamaalela musogorhelo waye.—Kengesa Masalmo 19:7, 11; Ovuhulela 4:11.

Magano a Bibilia ebaribari yamakamaka. Mpaddi mwina, malamulo anolabihedhiwa elobo mwa mpaddi wottiyana. (Olibiha 22:8) Ninofanyeela olabihedha ewodhelo ya wubuwela wila ninonelemo mukalelo onlabihedhiwa magano mwa elobo ejuwene enfuneya. (Gano 2:10-12) Motagiha, Bibilia ononisunziha wila egumi mvaho wa Mulugu. Nigano ntti na makamaka ninonsogorhela omabasani, vatakulu vina nigakosaga oleddo. Ninoneeddiha wila nittawege ngovi.—Kengesa Merelo 17:28.

Yezu wahiloga magano meeli alitxi a makamaka. Noroma ninloga efunelo enddimuwa enkalelawo attu, omuziwa Mulugu,  omukwela vina omulaba na nroromelo. Nigano ntti noroma ninofanyeela wubuweliwaga mwa dhotene dhinkosihu. (Gano 3:6) Abale ankalawo mowiwanana na nigano ntti anokaana omarho na Mulugu, osanzaya watxibarene na egumi ya mukalakala.—Kengesa Mateu 22:36-38.

Nigano nanawili ninonisogorhela wila nandanege na attu akwihu. (1 Korinto 13:4-7) Ottiddihedhaga mabasa nigano ntti nanawili onotaganyiheya na otagihaga mukalelo oneedda Mulugu na attu.—Kengesa Mateu 7:12; 22:39, 40.

Magano a Bibilia anosunziha wiwanana na okwela vamuralani. (Kolosi 3:12-14) Nzu na Mulugu ninobarela vina mirala modheela osunziha nigano niina ninsogorhela, nawila matelo anofanyeela okala a mukalakala.—Kengesa Wita 2:24.

Modheela ottiddihedhaga mabasa masunziho a Bibilia ninobarela oderetu wehu wa omaningoni. Motagiha, dila dhinjidhene alabiwi anafunetxa anamalaba anttiddihedha mabasa magano a Bibilia, sabwa ya ororomeleya wawa vina opulihaga mabasa. (Gano 10:4, 26; Ahebreu 13:18) Nzu na Mulugu vina ninonisunziha osanzaya na dhilobo dhinfuneya bahi vina wikaga ttima omarho na Mulugu opitta dhoreela.—Kengesa Mateu 6:24, 25, 33; 1 Timóteo 6:8-10.

Ottiddihedhaga mabasa magano a Bibilia onobarela egumi yehu. (Gano 14:30; 22:24, 25) Motagiha, wiwelela malamulo a Mulugu ankooddiha olezela ononibarela orava maredda anapa attu vina antota ngovi. (Gano 23:20) Yehova kankooddiha omwa dholezeliha, mbwenye onfuna wila dhimwiwege na mpimo. (Masalmo 104:15; 1 Korinto 6:10) Magano a Mulugu anonipurela modheela onisunziha wang’anelaga merelo ehu na dhubuwelodha. (Masalmo 119:97-100) Masiki dhaene, Akristu atxibarene kanrihela magano a Bibilia sabwa ya opuramo bahi. Ankosela ejene wila amuttittimihe Yehova.—Kengesa Mateu 5:14-16.