NSUNZO 3
Miselu Esi Dhapama sa Mulugu Wene?
1. Bibilia mwinyaya bani?
Miselu dhapama dhinloga wila attu anele okalawo na mukalakala velaboni yavati, dhilebiwe Mbibiliani. (Masalmo 37:29) Bibilia ona manivuru 66 mang’ono. Mulugu walabihedhi alobwana oororomeleya 40 baleba manivuru aba. Manivuru ooroma matanu alebiwe na Mizé wang’anana vyaka 3.500 mundduni. Nivuru nomariha nilebiwe na murumiwi Joau okwaranya vyaka 1.900 mundduni. Abale amulebile Bibilia alebilemo dhubuwelo dhaani? Mulugu wela ologa na anamaleba Bibilia modheela muya waye wokoddela. (2 Samuwel 23:2) Kalebile dhubuwelo dhawa, mbwenye alebile dhubuwelo dha Mulugu. Noona Yehova ddi Mwinyaya wa Bibilia.—Kengesa 2 Timóteo 3:16; 2 Pedro 1:20, 21.
2. Niziwe dhavi wila Bibilia ddoligana?
Nihiziwa yawila Bibilia ddwa Mulugu sabwani onottaga ologa monyaala dha musogorho na dhilobodha dhinfuna opadduwa modha-modha. Kuli muttu onwodha okosa ejene. (Josuwé 23:14) Mulugu bahi Wowodha-wodha ddinwodha ovuhulela musogorho mwa nlogo na attu.—Kengesa Izaiya 42:9; 46:10.
Nigahijeedhela yawila nivuru na Mulugu nikale na vawoka, nanda txibarene tta vawoka. Matxikwi na matxikwi a Bibilia onopakiwaga na dhilogelo mazana na mazana. Masiki vakaliliye wa wale, Bibilia onowiwanana kakamwe na dhilobo dha siensia dhihinpambihiwa. Vina, anamalebaya 40 kanpambihana. * Mowenjedha ejuwene, Bibilia agalogaga okwela, onaddana okwela wa Mulugu watxibarene, nanda okwela oku ohikaanavi ewodhelo ya osaddula dhigumi dha attu badhikala deretu. Ebaribari eji enowatomola murima attu matxikwi na matxikwi yawila Bibilia tti Nzu na Mulugu.—Kengesa 1 Tesalónika 2:13.
3. Bibilia onloga eni?
Bibilia onlogetxa miselu dhapama dhawila Mulugu ohikaana efunelo ya okwela wa nlogo na attu. Malebo anotapulela mukalelo wayeleeli muttu gari ya okala mparaizu velaboni yavati omaromowene, vina mukalelo onfuna ovenyihiwa wili paraizu.—Kengesa Ovuhulela 21:4, 5.
Nzu na Mulugu nihikaana malamulo, magano na malago. Mowenjedha, Bibilia ohikaana dholebiwa dha esile dhikosile Mulugu na nlogo na attu, mapadduwo anlagiha ekalelo ya Mulugu. Dhaene, Bibilia onowodha wukamiha omuziwa Mulugu. Onotapulela mukalelo onawodhe weyo okala marho waye.—Kengesa Masalmo 19:7, 11; Tiago 2:23; 4:8.
4. Omunonelemo dhavi Bibilia?
Brochura ntti ninele wukamiha omunonelamo Bibilia modheela olabihedha mukalelo wakakene walabihedhi Yezu. Wanromola malebo a Bibilia nimodha-nimodha agamala batapulela ‘dhili Mmalebonimwa.’—Kengesa Luka 24:27, 45.
Ottiya miselu dhapama dha Mulugu, oli dhilobo dhing’onovi dhintikiniha. Masiki dhaene, attu ena kantanaala miselu esi dhapama nanda ena anonyonyeyana. Kunyimuwe. Njeedhelo nawo na okaana egumi ya mukalakala nili mwa weyo omuziwa Mulugu.—Kengesa Joau 17:3.
^ par. 3 Koona brochura Um Livro Para Todas as Pessoas.
