NSUNZO 2
Mulugu Bani?
1. Ninfanyeelela eni omwebedha Mulugu?
Mulugu watxibarene ddi Mpaddutxi wa dhilobo dhotene. Iyene kaana maromo, vina txipo kanakaane magomo. (Masalmo 90:2) Ddi Nipara na miselu dhapama dhinfanyeya Mbibiliani. (1 Timóteo 1:11) Ninofanyeela omwebedha iyene bahi sabwani ddi Mulugu onivahile egumi.—Kengesa Ovuhulela 4:11.
2. Mulugu oli dhavi?
Kuli muttu wamoonilege Mulugu sabwani iyene Muya, ejene entapulela yawila bu mukalelo munddimuwa vaddiddi wa egumi opitta attu velaboni yavati. (Joau 1:18; 4:24) Masiki na ejene, ninowodha ozinddiyela ekalelo ya Mulugu modheela dhilobo dhikosiliye. Motagiha, sabwa ya okalawo misapo dhottiyana-ttiyana na marhuwa oottiyana-ttiyana ejene enonipanga yawila Mulugu ononikwela vina ddwa zelu. Munuwelo wa erimu ononipanga owodha waye.—Kengesa Roma 1:20.
Ninosunza dhoririmela dha ekalelo ya Mulugu modheela omwengesa Bibilia. Motagiha, Bibilia ononipanga ejile enziveliwa Mulugu vina ejiele ehinziveliwiye, mukalelo oneeddiye na attu vina monelo waye mwa dhilobo dhotene.—Kengesa Masalmo 103:7-10.
3. Mulugu ohikaana nzina?
Yezu walogile dhahi: ‘Baba wehu muli odhulu, nzina nenyu nittittimihiwe.’ (Mateu 6:9) Masiki Mulugu vakaaniliye mazina menjene a ettomo, ona nzina nimodha bahi na makamaka. Nzina ntti ninromoliwa mowiwanana na elogeloya. Mu elogelo ya Etxuwabo, ninromoliwetxa “Yehova.” Mbwenye attu ena anromola “Jová.”—Masalmo 83:18 onloga: ‘Attu aziwe wi nzina nenyu muli Yehova ddi nyuwo bahi muli Namadhulu-dhulu mwilaboni mwetemwene’. Tradução do Novo Mundo da Bíblia Sagrada.
Mmabibiliani menjene nzina na Mulugu nihiburutxiwamo banitxinjiwa na Nabuya obe Mulugu. Mbwenye Bibilia mwalebeliwiye, nzina na Mulugu nahikalamo wang’anana dila 7.000. Yezu bagaasunziha attu wahivuwiha nzina na Mulugu. —Kengesa Joau 17:26.
4. Yehova ononitanaala?
Ninga munkosela babi wokwela, Mulugu onozuzumela oderetu wehu wa mukalakala
Goi eli mpaddi wotene entapulela yawila Yehova kannitanaala? Attu anologa yawila Yehova ononitabutxa wila anehe, mbwenye ejo kayo ebaribari.—Kengesa Tiago 1:13.
Mulugu ohinvaha muttu ewodhelo ya ofuru wa osakula. Kanintamaalela ofuru wehu wa osakula omulaba Mulugu? (Josuwé 24:15) Attu enjene ansakula wakosela attu ena dhilobo dhabure, noona attu gwe bagatabuwa. Yehova agoonaga dhovirigana eso kadhinimuzivela.—Kengesa Wita 6:5, 6.
Yehova ddi Mulugu onnitanaala. Onfuna wila nisanzayege na egumi. Mohigoneela onele ogomiha goi na abaleya antota goi. Ejene ehinakoseya, ohikaana sabwa dhaderetu dha ottiya goi okalagawo mwari mwa mudhidhi mung’onovi. Mu Nsunzoni 8 ninele osunzamo sabwaya.—Kengesa 2 Pedro 2:9; 3:7, 13.
5. Nandanetxe dhavi na Mulugu?
Yehova ononiwobela wandana na iyene modheela ologana mu nlobeloni. Onomutanaala muttu ddi muttu. (Masalmo 65:2; 145:18) Onolevelela. Onowoona guru dhinkosihu wila nimuhagalalihe masiki akala dila dhiina ninovonya. Noona masiki na ohakwana wehu, ninowodha wandana vaddiddi na Mulugu txibarene.—Kengesa Masalmo 103:12-14; Tiago 4:8.
Vowila Yehova ohinivaha egumi, ninofanyeela omukwela opitta muttu-muttuvi. (Marko 12:30) Venevo vanimukweliwe Mulugu modheela osunzaga dhaye bugakosa dhilobo ninga munkumbirheliye, panandanitxiwe na iyene.—Kengesa 1 Timóteo 2:4; 1 Joau 5:3.
