NSUNZO 8
Mulugu Onttiyela Eni Obure na Goi Okalawovi?
1. Obure oromile dhavi?
Mulugu onowattiyaga attu olamulela mudhidhi mwinjene wila awoonihe wila kanwodha ogomiha makattamiho a nlogo na attu
Obure oromile velaboni yavati Satana mwalogeliye ottambi woroma. Omaromowa Satana wali mungelo wowakwana, mbwenye “keemelile mwibaribarini.” (Joau 8:44, Tradução do Novo Mundo) Wahita efunelo ya webedhiwa, okwene onfanyeela okoseliwa Mulugu bahi. Satana wahimuzivalela muyana woroma Eva nanda bamukwekwettela omwiwelela iyene attiyaga omwiwelela Mulugu. Adamu bavitaganyiha na Eva mwa onvanya Mulugu. Ejile yakosile Adamu venevale ehitota goi na okwa.—Kengesa Wita 3:1-6, 19.
Satana mwalogeliye wila Eva anvanye Mulugu, venevale wela oroma osadduwela olamulela onddimuwa wa Mulugu obe mpaddo waye ninga Namadhulu-dhulu. Attu enjiya mwa nlogo na attu ahivitaganyiha na Satana bamukoodda Mulugu wila kayo Mulamuleli wawa. Dhaene, Satana ohidha okala “mwene wa elabo ejino.”—Kengesa Joau 14:30; 1 Joau 5:19.
2. Yopaddutxiwa ya Mulugu yali yoragala murima?
Mabasa otene a Mulugu bowakwana. Attu na angelo apaddutxiwe na Mulugu ela owodha omwiwelela Mulugu mowakwana. (Olibiha 32:4, 5) Mulugu onipaddutxile na ofuru wa osakula okosa yaderetu obe okosa obure. Ofuru obu ononiwodhiha omukwela Mulugu.—Kengesa Tiago 1:13-15; 1 Joau 5:3.
3. Mulugu onttiyela eni goi okalagawovi mpaka ovanene?
Mwari mwa mudhidhi mung’onovi Yehova ohattiya attu osadduwela olamulela waye onddimuwa. Sabwa yani? Wila alagihe yawila kuli olamulela womusadduwela iyene onapurela attu. (Kohelét 7:29; 8:9) Muvireli vyaka 6.000 dha okalawo wa nlogo na attu, ejene enowooneya-wene. Alamuleli a attu kawodhile ogomiha koddo, opanga, dhovirigana obe maredda.—Kengesa Jeremiya 10:23; Roma 9:17.
Mottiyana na olamulela wa omuttu, olamulela wa Mulugu onowapurela abale anrumeela. (Izaiya 48:17, 18) Mohigoneela, Yehova onele ogomiha malamulelo otene a omuttu. Attu ansakula olamuleliwa na Mulugu bahi banakale velaboni yavati.—Izaiya 11:9.—Kengesa Daniyel 2:44.
4. Ovilela wa Mulugu onniwodhiha okosa eni?
Satana ologile wila kuli muttu agamulabile Yehova sabwa ya omukwela bahi. Ogahiziveliwa opambiha ottambi obu? Weyo onowodha! Ovilela wa Mulugu ononiwodhiha olagiha akala ninfuna olamulela wa Mulugu obe wa attu. Na mukalelo onkalihuwo ninotonya epaddi esakulilehu.—Kengesa Job 1:8-12; Gano 27:11.
5. Nimusakule dhavi Mulugu ninga Mulamuleli wehu?
Esile dhinkosihu dhinotonya akala nininfuna Mulugu ninga Mulamuleli wehu
Ninomusakula Mulugu ninga Mulamuleli wehu modheela osunzaga vina ottiddihedhaga mabasa webedha watxibarene oli mu Nzuni na Mulugu, Bibilia. (Joau 4:23) Ninomukoodda Satana ninga mulamuleli wehu modheela orabelaga politika vina oraba koddo ninga mwakoseli Yezu.—Kengesa Joau 17:14.
Satana onolabihedha ewodhelo yaye wila amwadhena mararuwo na merelo anvoreya. Nigakoodda merelo aba, txino amarho ehu na amudhi ena anonibedda obe anonsadduwela. (1 Pedro 4:3, 4) Noona ninofanyeela osakula. Ninofuna wandana na attu animukwela Mulugu? Ninofuna wiwelela malamulo aye a zelu vina ookwela? Nigakosa dhaene, ninolagiha yawila Satana walogile ottambi mwalogeliye wila kuli muttu onsegedhiwa nanda bewelela dhinloga Mulugu.—Kengesa 1 Korinto 6:9, 10; 15:33.
Okwela onkaanela Mulugu nlogo na attu onororomeliha yawila obure na goi onele ogoma. Abale anroromela ejene anele ojavo egumi ya mukalakala velaboni yavati.—Kengesa Joau 3:16.
