Mottiyana na muttu-muttuvi wa maningo, Yezu ahinatti odha velaboni yavati wakala odhulu ninga mungelo. (Joau 8:23) Iyene wali elobo yoroma epaddutxile Mulugu, mmalelani ohikala mukamihedhe wa opaddutxiwa wa dhilobodhotene. Ddi iyene bahi opaddutxiwe kakamwe na Yehova, sabwa ya ejene onotxemerhiwa mofanyeela ninga “nammodha” wa Mulugu. (Joau 1:14) Yezu ohilaba ninga Mwanamukatti, noona bagatxemerhiwa “Nzu.”—Kengesa Gano 8:22, 23, 30; Kolosi 1:15, 16.

Mulugu wahimuruma Mwana waye velaboni yavati modheela omwaliha egumi yaye odhulu beka mbani mwa namwali wa muyuda wahamuziwile mulobwana watxemerhiwa Maria. Noona Yezu kaana babi wa omuttu. (Luka 1:30-35) Yezu wahidha velaboni yavati wila (1) asunzihe ebaribari ya Mulugu, (2) anisunzihe mukalelo wa okosa ofuna wa Mulugu masiki nigakala mmakattamihoni, vina (3) aperheke egumi yaye yowakwana ninga ‘yobolo.’—Kengesa Mateu 20:28.

Yobolo bu muttengo ompitxeliwa omobolelana muttu wila anapiwe. (Obudduwa 21:29, 30) Okwa na wuluvala kawakosa epaddi ya efunelo yoroma ya Mulugu na nlogo na attu. Niziwile dhavi ejuwene? Mulugu wahimpanga mulobwana woroma Adamu wila kokosa ejile entxemerha Bibilia ‘yottega,’ iyene agahikwa. Noona Adamu kohittega txipo kagakwile. (Wita 2:16, 17; 5:5) Mowiwanana na  Bibilia, ‘ovolotxile’ okwa mu nlogoni na attu ddi Adamu. Dhaene, Adamu oharaviha anaye otene ottega na okwa. Ninofuna yobolo wila enobole mu okwani obaliwihuna mwa Adamu.—Kengesa Roma 5:12; 6:23.

Bani agawodhile onipitxela yobolo wila anobole mu okwani? Nigakwa, nimpitxela dhottega dhehu bahi. Kuli muttu wohakwana onwodha opitxela dhottega dha attu akwaye.—Kengesa Masalmo 49:7-9.

Mottiyana na iyo, Yezu wali wowakwana. Noona kakweli dhottega dhaye sabwani iyene txipo kakosile yottega nne ngafuna modha. Mbwenye, Yezu okweli dhottega dha attu ena. Sabwa ya Mulugu omuruma Mwana waye wila anikwele, venevo ohilagiha yawila onokwela vaddiddi nlogo na attu. Yezu vina wahilagiha okwela modheela omwiwelela Babi waye vina operhekela egumi yaye dhottega dhehu.—Kengesa Joau 3:16; Roma 5:18, 19.

Bali velaboni yavati, Yezu ohavulumutxa aredda, ohavenyiha akwile vina ohavuna attu mwa dhowopiya. Dhaene wahilagiha ejile enfuniye okosa musogorho mwa oderetu wa attu aniwelela. (Mateu 15:30, 31; Joau 5:28) Yezu mumaleliye okwa, Mulugu wahinvenyihedha okalawo ninga muya. (1 Pedro 3:18) Venevo Yezu wahijeedha bagilatile mono woja wa Mulugu mpaka Yehova onvaha ottonga ninga Mwene velaboni yotene yavati. (Ahebreu 10:12, 13) Ovanene Yezu onolamulela ninga Mwene odhulu, nanda anamafara aye anolaleya muselu obu wapama ozugunuwa elabo yotene.—Kengesa Daniyel 7:13, 14; Mateu 24:14.

Mohigoneela, Yezu onele olabihedha ottonga waye ninga Mwene wila agomihena goi vamodha na abale antota goi eji. Otene abale animuroromela Yezu modheela omwiwelelaga, anele wakela egumi mparaizu velaboni yavati.—Kengesa Masalmo 37:9-11.