Bibilia onloga wila Satana “onopupurutxa elabo yotene enkaliwa.” (Ovuhulela 12:9) Satana vamodha na adomonyo aye kanfuna wila niroromele Nzu na Mulugu, Bibilia. Awene anotamela wakosiha athu orumeela wila abale akwile ahikalawo wego wegovi wumburoni onkala muya. Ndoweni noone mukalelo onkosani eji.

Relijiau dhinji dhinsunziha wila kadda muthu ohikaana muzimu onvirela wumburoni onkala muya maningo a muthuya agamala okwa. Awene anovaddana ologa yawila muzimu kunkwa wene.

Mbwenye nzu na Mulugu kaninsunziha ejene. Bibilia onolagiha wila muzimu ddi muthuya, kayo elobo eli mwari mwa muthu. Motagiha, bagaloga mwaha wa othanddiwa wa Adamu, Bibilia onloga dhahi: “Venevo Yehova Mulugu wahimuba mulobwana na mbwebwe wa mathaka nanda bavudhelela mpunani mwaye muya wa egumi, nanda mulobwanaya bakala muzimu wokalawo.” (Wita 2:7) Dhaene Adamu kaavahiwe muzimu, iyenene ddali muzimu.

 Dhinama vina dhinotxemerhiwa mizimu.—Wita 1:20, 21, 24, 30.

Vowila nzu na Bibilia “muzimu” nintapulela muthu mwinyene, osunza wila mizimu podi okwa kunfanyeela onitikiniha, nanda dhinokwa wene txibarene. Malebo anloga dhahi:

• “Muzimu onthega—obwene onela okwa.”—Ezekieli 18:4.

• “Nanda Sansau wahiloga dhahi: ‘Muzimu waga okwe na akudda Filistia.’”—Anamathonga 16:30.

• “Jaderetu, okosa mabasa aderetu obe okosa mabasa abure, ovuna obe opa muzimu siku na Sabuddu?”—Markos 3:4.

Malebo mena anlagiha wila mizimu podi otolotxiwa (Wita 17:14), opiwa na supadda (Josue 10:37), ohogiwa (Jobi 7:15), vina obwinihiwa mmanjeni (Jona 2:5). Dhaene, muzimu onokwa.

Weyo ogamwengesa Bibilia ovenya omaromo mpaka omagomo, txipo kunaafanye mazu anloga “muzimu kunkwa.” Muzimu wa muthu kayo muya. Nsunziho nawila muzimu kunkwa, kayo nsunziho na Bibilia. Nthi nsunziho na Satana vamodha na adomonyo aye. Yehova onowidda  othambi wotene wa relijiau.—Vimarya 6:16-19; 1 Timoteo 4:1, 2.

Mukalelo mwina onanyengethana Satana athu bodheela alaula. Mulaula ddi muthu onwodha wakela miselu dhovenyedha kakamwe wumburoni onkala muya. Athu enjene vaddiddi, vamodha na alaulaya, anorumeela yawila miselu esi dhindela wa muya dha abale akwile. Mbwenye ninga moonelihu mBibiliani, eji kinwodheya.—Eklesiaste 9:5, 6, 10.

Kito miselu esi dhindela wa ani? Wa adomonyo! Adomonyo anowodha omwañgana muthu baliwo; awene anoziwa mukalelo waloga muthuya, kove yaye, esile dhakosiliye, vina esile dhaziwiliye. Dhaene awene kanrutxiwa watagiha athu akwile.—1 Samueli 28:3-19.

Mukalelo mwina onlaleyana Satana othambi mwaha wa abale akwile bodheela gahala. Gahala esi dila dhinjidhene dhinowapothotxa athu wibaribarini ya Bibilia.—2 Timoteo 4:4.

Mu Afrika muhikala dhothakiwa dhinjidhene mwaha wa athu ooniwe mumalelani okwa. Ninga munkoseyelagani,  dhowoona esi dhinkoseya wolapela vaddiddi na okule wakala muthuya. Kavivuze: ‘Muthu kokaana ewodhelo ya wiyela wa abale akwile, iyene ageyeleli wumburoni wolapela vaddiddi na okule onkala amudhi vina amarho aye?’

Vina, kigakalile sabwa yawila muthu oddule wooniwe ohiladdana bahi na muthu oddule okwile? Motagiha, arumiwi eeli a Akristu aalaleya mu themba aahimoona mulobwana dhahi wa munakalaba oddwene wafarile mwa mawora mañgonovi. Mwanvuzelani, awene aahiziwa yawila mulobwana oddule woona ninga mmodha mwa arumiwi abale wali mbali waye oddwene wakwile wale vaddiddi. Txibarene, iyene wela waganyedha, mbwenye iyeneya wahikoodda orumeela yawila wela waganyedha. Kobuwela esile dhalogile munakalaba oddule vasogorhova bagaapanga amarho aye na amwaddamani aye!

Mohaganyedha weyo ohiziwa dhilobo dhonyangarisa nthithi dhoonile athu, dhiwilani, obe dhirohilani. Dila dhinjidhene dhowireya ninga esi dhotikineya dhinowatxutxa abale ankaanaya. Marein, oddwene wakala Omaddowelo  wa Nzuwa wa Afrika, dila dhinjidhene wanniwa lizu na marafula bibi waye banigamutxemerha na mathiyu. Na otxutxeya, Marein wankuwa, bagaavenyiha athu otene a ntakulu naye. Omagomelowa, wahitaduwa.

Ovanene, akala txibarene abale akwile ahikalawo, ja mirugu wila awene agahatxutxa abale anakwelani? Nne. Nipara na miselu esi dhabure ba adomonyo.

Ki miselu esile dhinkala ninga dhinkamiha vina dhimpangarhaza? Motagiha, Gbassay, wa o Serra Leoa, wali muredda. Iyene wahimuroha marafula babe oddwene wamuthwanyuweli. Oddu wahimpanga odhowa vamurini dhahi wila athukule ntabana, ataganyihe na manje, nanda amwe. Gbassay ahinathi okosa eji kafanyeela ologa na muthu. Iyene wahikosa eji nanda bavulumuwa.

Muyana mwina wahiloga wila omathiyu dhahi mamunaye wahimuthwanyuwela mwamaleliye okwa. Iyene walogile wila mamunayeya wahikaana mooneyelo waderetu vaddiddi vina wabalile guwo dhokoddela vaddiddi.

Miselu vina dhowoona ninga esi dhinkala ninga dhaderetu vina dhokamiha. Esi dhindela wa Mulugu? Nne, esi kadhindela wa  Mulugu. Yehova ddi “Mulugu wa ebaribari.” (Salmo 31:5) Txipo iyene kagarumeeli onipela malago obe oninyengetha. Adomonyo bahi bankosa ejene.

Ki ohikala adomonyo aderetu? Nne. Masiki dila dhiina vankalani ninga anokamiha, otene babure. Ddiabo mwalogeliye na Eva, iyene wakala ninga wa omarho. (Wita 3:1) Ki txini yampadduweli mwamaleliye onvuruwana vina okosa ejile yalogile Ddiabo? Iyene ohikwa.

Weyo onoziwa yawila muthu wabure onotamela okosa omarho na abale anfuniye wanyengetha vina wapanga othambi. Emarya dhahi ya mu Afrika enloga dhahi: “Meno ootxena mbuu, murima woriba.” Nanda nzu na Mulugu ninloga dhahi: “Satana onovisaddula bakala mungelo wa txeza.”—2 Korinto 11:14.

Mulugu kanloga viina na athu velaboni ya vati modheela maroho, dhowoona obe lizu nodheela wumburoni onkala muya. Iyene onowaweeddiha vina onowasunziha modheela Bibilia, oddwene onwodha omukosiha muthu “wowabalela mowakwana okosa mabasa otene aderetu.”—2 Timoteo 3:17.

Dhaene, Yehova aganisaddeyaga mosadduwela dha othambi wa Ddiabo, iyene onkosa dhaene sabwa ya onikwela. Iyene ohiziwa yawila adomonyo amwiddani owopiya.