Ngani Satana na adomonyo aye anwararela eni wapupurutxa athu? Sabwani awene anfuna wila nimusadduwele Mulugu vamodha na awene. Anfuna wila nawebedhege awene. Anfuna wila niroromelege othambi wawa nanda nikosege dhilobo esile dhihinziveliwa Yehova. Merelo aba menjene anotaganyiheya na meddelo aniwanana na abale akwile.

Okwa wa oddule onimukwela iyo eji elobo empa vaddiddi, nanda okubanya oku kobaaliwana vina kofanyeela. Marho waye Lazaro mumaleliye okwa, Yezu “ohitomola kutho.”—Joau 11:35.

Ohikala meddelo menjene owiwanana na okwa, nanda aba anothiyana vaddiddi ozugunuwa elabo yotene. Menji kanvirigana na magano a Bibilia. Merelo mena, ba yubuwelo yawila abale akwile ahikalawo vina anowodha wawoona abale aliwo. Oyedhela, kutho yothabwa, mathanga a omweyana muthu dhotene esi dhindela mwa wova oludduwiha muya dha abale akwile. Vowila abale akwile “kanziwa wene elobo,” abale ankosa dhilobo ninga esi anlibiha othambi wa Satana.—Eklesiaste 9:5.

Meddelo obe mathanga mena andela mwa orumeela wila abale  akwile anofuna nikamihedho na abale aliwo nanda akala kansembezerhiwa awene anela waputhula. Mu dhilabo dhiina mathanga na mikutho dhinokosiwa txino vagavira masiku 40 obe yaka modha muthuya bamalile okwa. Eji enooniwa ninga omukamiha marafulaya wila ‘avirele’ mburo onkala muya. Yeddelo yina enkosiwetxa ku wavaha abale akwile dhoja vina dhomwa.

Dhilobo esi sabure sabwani esi dhintitedha othambi wa Satana mwaha wa abale akwile. Yehova agahirumeela wila nikose mpaddi wa meddelo andela mmasunzihoni a adomonyo? Txipo!—2 Korinto 6:14-18.

Adhari a Mulugu wa ebaribari kankosa mpaddi wa merelo abene ankamiha dha othambi wa Satana. Othiya eji, na okwela awene anfwasedha wakamiha vina wapangarhaza abale aliwo. Awene ahiziwa yawila muthu agakwa, Yehova bahi ddinwodha omukamiha muthu oddu.—Jobi 14:14, 15.

Athu ena anowiwanana kakamwe na adomonyo obe anokosa eji modheela mulaula. Oku ontxemerhiwa ologa na muya. Oñganga, okwiri, masalapitho, olaula, vina wavuza abale akwile aba otene merelo a ologa na muya.

Bibilia onokona dhilobo esi, bagaloga dhahi: “Kafanyiwe vari venyu . . . muliba makaga, namakosa masalapitho obe muthu ontamela masele obe mukwiri, obe muthu onatwa mento akwaye na meera, obe muthu ondowa wombeza wa mulaula, obe muliba waganyedha esile dhinfuna wireya, obe muthu onavuza abale akwile. Sabwani, wotene oddule onkosa dhilobo esi iyene elobo yonyakuwa vamentoni va Yehova.”—Deuteronomo 18:10-12.

Yehova onnilagela eni na guru mosadduwela merelo aba?

Sabwa ya oderetu wehu, Yehova ononilaga osadduwela makalelo otene a ologa na muya. Iyene onowakwela vina onowatanaala athu,  nanda iyene ohiziwa yawila abale anthiddeelana na adomonyo anowoona goi.

Muthu ninga oddwene wali Nilda, oddwene wali mulaula o Brasil. Adomonyo aahimutabutxa vaddiddi. Iyene onloga dhahi: “Muya . . . dhahiddithidda, mpaka oddipanga yafanyeela miyo okosaga. Miyo ddankaana midhidhi dhakaanimi zelu vina midhidhi dhahileya miyo, vina ddahibulela eredda ya othamaga musorho. Adomonyo aahiddifarafara vaddiddi mpaka opakela mubuwelo waga. Ddanja mirobwe dhintota thurho vina ddammwa dhomwa dholezeliha nanda ddanja fola s’ohivumela. Eji yahigoneela vyaka dhinjidhene.”

Na ovira wa mudhidhi, na nikamihedho na Yehova vamodha na Anamoona aye velaboni ya vati, Nilda wahifuruleya opakeliwa na domonyo nanda ovanene ohikaana egumi yaderetu vina yoreela. Iyene ohiloga dhahi: “Ddinowalibiha athu otene wila, txipo nne ngafuna vañgono muhiviwananihe na muya [dhabure].”