Adomonyo Apanga!
Satana na adomonyo anokalaga atabala vina owopiya vaddiddi. Mmasakani ooroma Satana wahipa dhifuwo vamodha na adhari a Jobi muthu wororomeleya. Mumaleliye wahaapa ana kumi a Jobi modheela okosiha “pevo enddimuwa” ogujula numba mwali awene. Mumaleli eji, Satana wahimooniha goi Jobi na “eredda ya tugu dhowopiya, ovenya mu thebeni ya manyalo aye mpaka va thomelani.”—Jobi 1:7-19; 2:7.
Mmasikuni a Yezu, adomonyo ahaakosiha athu ena ohiloga vina ohoona. (Mateus 9:32, 33; 12:22) Adomonyo aahimutabutxa mulobwana dhahi nanda bamukosiha ovisuva na myarha. (Markos 5:5) Awene vina aahimukosiha muzombwe dhahi okuwa, bamugwihedha vati, vina “bamugulugudha na owali.”—Lukas 9:42.
Nsaka na wale, adomonyo ahaabuleliha athu ena, vina aahagulugudha enagu
Ovanene, Satana na adomonyo anothabwavi otabalawa opitha mundduni. Txibarene, merelo awa a obure ahenjedheya oromana vavokiwani odhulu. Dhokoseya dha ozugunuwa elabo yotene ya vati dhinolagiha otabala wawa. Awene anowavoreya athu ena na maredda. Ena anowawooniha goi na mathiyu, bagaakathamiha ogona obe warohiha dhilobo dhowopiya. Ena anowagoniha na mukalelo wabure. Nanda ena anowatadutxa, okala apanga obe ovipa.
Nsaka na ovanene adomonyo anowakosiha athu ena okala atimbwini; ena anowawooniha goi na mathiyu, bagaarohiha dhilobo dhowopiya
Lintina, onkala o Suriname, ohiloga yawila domonyo dhahi, obe muya wabure, wahaapa athu 16 a murala waye vina bamutabutxa iyene omaningoni vina musorho mwari mwa vyaka 18. Modheela yowireya empadduweli iyene, ohiloga yawila adomonyo “anowiwa oziva na wasosa athu anamagani mpaka okwa.”
Mbwenye Yehova onowodha wabarela adhari aye obuddugeliwa na Satana.—Vimarya 18:10.
