Satana na adomonyo aye kanaapupurutxe viina nlogo na athu na mudhidhi mwinjene. Yehova ohimala wavoka odhulu. (Ovuhulela 12:9) Musogorho mohigoneela, wili Yehova onela omusothotha Satana na Adomonyo aye. Mu yowoona yovenyedha wa Mulugu, murumiwi Joau walogile dhahi: “Nanda ddahimoona mungelo bagatita odhulu na mfugulo wa muti vina bana pingwi enddimuwa mmadani mwaye. Venevo iyene wahithidda nowa yawale, ejene eli Ddiabo vina Satana, nanda bamaga mpaka vyaka txikwi. Nanda bavokedha mmuti, bafugela vina bapidavo ezinddiyelo, wila ahinyengethe viina dhilabo mpaka ovira vyaka txikwi.” (Ovuhulela 20:1-3) Vasogorhova, Ddiabo na adomonyo aye anela otolotxiwa kakamwe.—Ovuhulela 20:10.

Athu abure a velaboni ya vati anela otolotxiwa vina.—Salmo 37:9, 10; Lukas 13:5.

Satana vamodha na adomonyo agamala oburutxiwavo, Yehova onela odheelana nlogo na athu mareeliho menjene. Weyo onowubuwela yawila abale akwile kana egumi, kawo. Yezu waladdanihile okwa na ogona—ogona ruthu s’oroha. (Joau 11:11-14) Iyene walogile dhaene sabwani wahiziwa wila ogahifiya mudhidhi ogaavenyihedhiwe okalawo wili abale angona mu okwani. Iyene walogile dhahi: “Ninodha nsaka nawila otene abale ali mmasiye owubuweliwa anela . . . obudduwa.”—Joau 5:28, 29; kaladdaniha na Merelo 24:15.

Awene anela wiyelihedhiwa okalawo wili apano velaboni ya vati. Othiya olaleyiwa wila athu ahikwa, miselu dhohagalaliha dhinela olaleyiwa mwaha wa abale aneyelihedhiwe okalawo wili! Onakale ohagalala gani wamoyela abale anakwela iyo bagadha o masiye!!