Mulugu onfuna wila nikalegewo na murenddele vina osanzaya wa mukalakala mparaizu velaboni yavati!

Txino weyo onotikina bugobuwela dhahi: ‘Ejuwene egapadduwile dhavi?’ Bibilia onloga wila Omwene wa Mulugu onele okosa ejene, vina Mulugu onfuna wila attu otene asunze dha Omwene obu na ejile enfunani onikosela.​—Masalmo 37:11, 29; Izaiya 9:7.

Mulugu onfuna wila nipuremo.

Ninga babi waderetu munafuneliyena anaye ejile ekaliletxe, Babi wehu odhulu onfuna wila nijevo osanzaya wa mukalakala. (Izaiya 48:​17, 18) Ohiroromeliha wila ‘oddule onkosa ofuna wa Mulugu onokalawovi.’​—1 Joau 2:17.

Mulugu onfuna wila needdege mudilani mwaye.

Bibilia onloga wila Mpaddutxi wehu onfuna ‘anisunzihe dila dhaye’ wila ‘needdege mudilani mwaye.’ (Izaiya 2:2, 3) Ohisasanyedha ‘nlogo wila nimelele nzina naye.’​—Merelo 15:14.

Mulugu onfuna wila nimwebedhege mumodhani.

Ottiya ogawaga malogo, webedha wapama wa Yehova onowiwananiha malogo aba mu okwelani wa txibarene. (Joau 13:35) Nsaka na ovanene bani onasunziha alobwana na ayana mpaddi wotene mukalelo wa omulaba Mulugu mowiwanana? Ninowuwobela wila ozinddiyele esene modheela brochura ntti.