Dhipaddi dhiñgono dha nikami. Esi dhinda mwa dhipaddi nai dha makamaka dha nikami dhintxemerhiwa na ezugu—glóbulos vermelhos, glóbulos brancos, plaquetas na plasma. Motagiha, glóbulos vermelhos dhihikaana proteína ya hemoglobina. Dhitagano dhipanddiwena hemoglobina ya athu obe dhinama dhinothiddihedhiwaga mabasa wila dhisasanyiwena aredda ahinetxa nikami obe akuthuwiwe vaddiddi nikami.

Plasma—aba manje muthengo wa pursento 90—enotheba hormónios gwe, sais inorgânicos, enzimas vamodha na dhitagano dhinruviha vina minerais na sokiri. Plasma vina enothukula fatores de coagulação, anticorpos wila dhithamagihe maredda mmaningoni vina proteina albumina. Akala muthu oli vego vali eredda dhahi, adotoro txino anomuruma opopiwa engasau ya gamaglobulina eburutxiwe mu plasma ya athu ahinrava eredda ejo. Glóbulos brancos thi nipara na interferons vina interleucinas, dhinlabihedhiwa osasanyiwana infecções virais na câncro.

Mukristu onofanyeela orumeela masasanyedhiwo anlabihedha dhipaddi dha nikami? Bibilia kanloga dhitagano esi, noona kadda muthu asakule yeka bagaziwa vamentoni va Mulugu. Athu ena anokoodda dhipaddi dhotene, obuwelaga wila Nlamulo navahile Mulugu Aizrayel nalamula wila nikami na  enama esijiwe nanfanyeela ‘okuthuleliwa vati.’ (Olibiha 12:22-24) Athu ena, oku bagakoodda wikiwa nikami kakamwe obe dhipaddidha dha makamaka, txino anorumeela masasanyedhiwo anlabihedhiwa epaddi modha ya nikami. Txino anubuwela yawila epaddi eji eñgono eburutxiwe mu nikamini kintapulela egumi ya yothanddiwaya eburutxiwe epaddi eji.

Ogasakulaga dhilobo dhiniwanana na dhipaddi dhiñgono dha nikami, otanaalele mavuzo aba: Ddinoziwa yawila okoodda dhipaddi dhiñgono dhotene dha nikami ontapulela yawila kaddinarumeele masasanyedhiwo mena antaganyiheya na dhitagano dhinthamagiha maredda mmaningoni obe dhinkamiha nikami okotha wila nihikuthuwe? Ddigahiwodha omutapulela dotoro sabwa enkooddelimi obe enrumeelelimi olabihedha epaddi modha obe dhinji dhiñgono dha nikami?

Meeddihedho a Operasau. Abene anotaganyiheya na hemodiluição na winanela nikami. Hemodiluição egakosiwaga, nikami ninoburutxiwa mmaningoni na makina banipothotxedhiwa mpaddi mwina, vamburoniva pavekiwa dhitagano dhinrhengutxa nikami wila niruwe nanda vasogorhova nikami nthile naburutxiwemo baniyihedhiwa mmaningoni. Winanela nikami ku oddoddela nikami nthile ninkuthuwa mudhidhi wa operasau baniyihedhiwa mmaningoni. Nikami ninorugiwa veloddani obe apale vagwaddiwe, banisuwiwa obe banisanyiwa venevo banikiwa wili mmaningoni mwa mureddaya. Sabwa yawila malabihedho a dhitagano esi anothiyana kadda dotoro, Mukristu onofanyeela oziwa ejile enfuna omukosana dotoro onimusasanya.

 Ogasakulaga meeddihedho aba ovivuze: ‘Akala mpaddi mmodha wa nikami naga onopothotxedhiwa wego wina nanda weeddelanawa buwimetxiwa mudhidhi muñgonovi, mubuwelo waga onela oddithiya woona nikami nthi wila thaga, baddikoodda ofuna wila “nikuthuleliwe vati”? (Olibiha 12:23, 24) Mubuwelo waga osunzihiwe na Bibilia onela odhugudheya akala vari va operasau nikami naga ninoburutxiwamo, banikiwa dhitagano dhiina venevo banikiwa kakamwe mmaningoni mwaga? Ddinoziwa yawila okoodda meeddihedho otene a dotoro vamodha na olabihedhiwa nikami naga ontapulela  wila kaddinarumeele oburutxiwa nikami wila nikosiwena analizi, kaddinarumeele hemodiálise obe máquina de coração pulmão?’

Mukristu onofanyeela ovisakulela mukalelo onfuniye othiya nikami naye olabihedhiwa vari va operasau. Yakakene enothiddihedheya mabasa okosa analizi vina masasanyedhiwo a nsaka na ovanene abene amburutxiwa muthengo muñgonovi wa nikami na muthu, txino banitaganyihiwa na dhitagano dhiina vasogorhova baniyihedhiwa mmaningoni.