Ninga mulebeliwani va 1 Korinto 6:1-8, murumiwi Paulo ohisekeserha osumelana omuthegoni vari va Akristu. Iyene wahilagiha onyoonyeya yawila Akristu ena a mu Korinto ‘andhowa operheka muladdu mmuthegoni.’ (Versikulu 1) Paulo ohiperheka sabwa dholiba vaddiddi dhihinfanyeelela Akristu osumelana omuthegoni wa mwilaboni mbwenye wila asasanyedhege magudulano awa mmulogoni. Ndoweni nisekeserhe sabwa dhiina dha nlago nthi nowubuwelihiwa nigamala noone mikalelo dhiñgonovi esene dhihinthiddihedheyetxa mu nlagoni nthi nowubuwelihiwa.

Akala nihikaana magudulano a marhondda na Mukristu mukwehu, voroma ninofanyeela otamela osasanyedha muladduya mowiwanana na mukalelo wa Yehova, othiya mukalelo wehu. (Gano dh’olelana 14:12) Ninga mulagihedhi Yezu, jaderetu osasanyedha magudulanoya momaguva vaddiddi ahinathi wunuwa. (Mateu 5:23-26) Noona, mokubanyiha, Akristu ena anopambihana vaddiddi, mpaka odhowa osumelana omuthegoni. Paulo ohiloga: “Owana-wana wenyu onowoniha wi muthiya dila yokristu.” Sabwa yani? Mwaha wa makamakaya bwawila merelo aba podi oviriganiha mooneyelo wa mulogo vina Mulugu onimwebedhihu. Noona ninowiwelela nivuzo na Paulo: “Kigakalile orumela opujeya vañgono?”—Versikulu 7.

Paulo vina wahitanaalela yawila Mulugu ohika mmulogoni musasanyedho waderetu wa ogomihana magudulano. Anddimuwa a mmulogoni awene alobwana ana zelu sabwa ya eziwelo yawa ya ebaribari ya Malebo, nanda Paulo ologile wila aweneya ‘anere othonga vari va abali’ dhigakala dhilobo “dhavati apano.” (Versikulu 3-5) Yezu wahilagiha wila magudulano antaganyiheya na ovirigana onddimuwa, ninga omageedha na ojela, anofanyeela osasanyedhiwa mowiwanana na tharho tharu: tharho yoroma, owararela osasanyedha mwahaya abale ali mmarhonddanimwa wokiwavo bahi; tharho yanawili, akala tharho yoroma kinthidda mpirha,  kamuthukule namoona mmodha obe eeli; tharho yanoraru, akala tharho yanoraru vina kinthidda mpirha, kadhowana mwahaya mmulogoni onimeleliwa na anddimuwa a mmulogoni.—Mateu 18:15-17.

Txibarene, anddimuwa a mmulogoni a Akristu kayo aziwi malamulo obe aliba marhondda nanda nibasa nawa kayo ovaha malamulo obe malago a marhondda. Awene kanimetxa maddile a osasanyedhana magudulano a marhondda vari va abali. Mbwenye, antamela okamihedha dhipaddi dhotene dhili mmwahanimwa wila athiddihedhe mabasa Malebo wila ewanane ekagavo murenddele. Mwaha onrutxa vaddiddi, awene podi onvuza musogorheli wa milogo obe olebela o filiali ya Anamoona a Yehova. Txibarene, ohikala mwaha dhihinlogiwa mu nlagoni na Paulo. Dhiinadha sivi?

Mmwahani dhiina, osumelana omuthegoni txino anowooneya okala elobo yohirutxa obe ofuneya wa nlamulo otamela ohikaana nrima vina otamela murenddele. Motagiha, osumelana omuthegoni txino buli mukalelo mmodha bahi onfanyeya wa omwalana na nlamulo, ofanyeela wakoya ana, olamula multa onfanyeela opitxiwa, oliviwa dhilobo, vina olebeliwa mwari mwa anamaboleya kobiri o banko sabwa ya mpinddu ogwile, vina testamento. Txino vina ohikala mwaha oniwamo mbali yawila enofuneya ofanya wila avibarele agasumeliwa. *

Osumelanawa ogakosiwa s’ohikalavo opambihana, txino kunlupa nlago nowubuwelihiwa na Paulo. * Na dhaenevi, yofuna yoroma ya Mukristu enofanyeela okala okoddeliha nzina na Yehova vina murenddele vamodha na wiwanana wa mulogo. Anamafara a Kristu anzinddiyeliwa voroma sabwa ya okwelana wawa, nanda “onkwela, kanna nrima.”—1 Korinto 13:4, 5; Joau 13:34, 35.