1, 2. Yehova onthithimihedhiwa eni agoonaga guru ya okaana murima wororomeleya? Kaladdaniha.

MAI na mwanaye muñgono anobudduwa-wene muloja vamodha. Saddu, mwanaya wimela, ohikaana kove yozuzuma. Mmadani mwaye ohithiddeela elobo eñgono yovegana ejene ethukulileye muloja. Ohidduwala wiyiha obe omukumbirha mamayaye wila amugulele. Iyeneya ohinyoonyeya venevo onomutxemerha mamayaye. Mamayayeya onomulibiha venevo beyelela vamodha muloja wila eyihe eloboya vina akumbirhe nlevelelo. Na ejene, murima wa mamayaye onothaba na ohagalala vina ethomo. Sabwa yani?

² Wili-wili amambali anohagalala agoonaga wila anawa anosunza ofuneya wa okaana murima wororomeleya. Yakakene enopadduwa na Babi wehu wa odhulu, “Mulugu wororomeleya.” (Masalmo 31:5) Anoonaga iyo nunuwaga omuyani, onohagalala onoona iyo nikukuthuwadhaga wila nikaane murima wororomeleya. Sabwa yawila ninfuna nimuhagalalihe nanda nikalevi mu okwelani mwaye, ninolagiha mewelo alagihile murumiwi Paulo: “Ninotamela wedda pama mwa dhetene.” (Ahebreu 13:18) Ndoweni nifwaseyele dhipaddi nai dha makamaka vaddiddi dha egumi mwenemo mungumanehuna makathamiho a okaana murima wororomeleya. Nigamala ninela osekeserha mareeliho abene anda sabwa ya ejene.

3-5. (a) Nzu na Mulugu ninnilaga dhavi mwaha wa wopiha wa ovinyengetha? (b) Txini enanikamihe okaana murima wororomeleya na iyo nanya?

³ Nikathamiho nehu noroma ku osunza okaana murima wororomeleya na iyo nanya. Kinnirutxa iyo ninga athu oohakwana  ogwela mu ovinyengethani. Motagiha, Yezu ohapanga Akristu a mu Laudisea yawila aahimala ovinyengetha obuwelaga wila aahireela oku txibarene, aali ‘ahawi, ayelegi, aliba ohoona,’ mpaddi wa omuyani​—txibarene mukalelo wosegedheya. (Ovuhulela 3:17) Ovinyengetha wawa wela okosiha mukalelo wawa okala wowopiha vaddiddi.

⁴ Txino vina onowubuwela wila, murumiwi Tiago wahilaga: “Muthu onubuwela wi ddinoweddana magano a Mulugu, ahiziwa omaga nlumi naye, onovinyengetha mwinya: omulaba waye Mulugu kunpurelo.” (Tiago 1:26) Kowiliwa ninowubuwela wila ninolabihedha nlumi na mukalelo wohifanyeela na dhaenevi nimwebedhaga Yehova na mukalelo worumeeleya, nelege ovinyengetha bahi. Omwebedha wehu Yehova ogakalile wa ebewe ogakalile ononga mudhidhi. Txini enanibarele othukula dila eji yoputhula?

⁵ Mu epaddene eji yakakene, Tiago onowiwananiha ebaribari ya nzu na Mulugu na supeyo. Iyene ononilaga wañgana mu nlamuloni nowakwana na Mulugu nanda niviwogolele mowiwanana na nlamulona. (Kengesa Tiago 1:23-25.) Bibilia podi onikamiha okaana murima wororomeleya na iyo nanya nanda banoona ejile enfunehu okosa wila nogolele. (Enthothobelana 3:40; Ajewu 1:5) Vina ninofanyeela olobelaga wa Yehova nimukumbirhaga wila anipepese, anikamihaga woona vina orumeela vina otamela wogolela yovirigana yotene. (Masalmo 139:23, 24) Murima wohiroromeleya oku wobana woviteya, nanda ninofanyeela woonaga ninga munoonela Babi wehu wa odhulu. Gano dh’olelana 3:32 onologa: “Nabuya onowugiwa mara nathu ahinna magano, oku andanaga nabale anvirihamo.” Yehova podi onikamiha wiwaga ninga muniweliye vina oviwoonaga ninga munnooneliye. Kobuwela yawila Paulo ohiloga: “Ninotamela wedda pama mwa dhetene.” Ovanene kaninwodha okala awakwana, mbwenye na murima wotene ninofuna vina ninotamela okaana murima wororomeleya.

6. Atelani anfanyeelela eni okaana murima wororomeleya muthu na mukwaye, agakosa ejene anrabela ngovi gani?

⁶ Okaana murima wororomeleya onofanyeela okala  mutonyo wa murala wa Okristu. Mamuni na mwadhiye, txibarene anofanyeela opanganaga vina okaana murima wororomeleya muthu na mukwaye. Matelo a Akristu kanfanyeela okaana mweeddelo obu woputhula wa ogayelana na muthu wa otakulu wa matelo, okaana omarho woviteya modheela Interneti, obe woonaga foto dha athu bali yovi dha mukalelo mukalelovi. Akristu ena atelile obe ateliwe ahirava mweeddelo obu wabure anvitelaga mukwawa wa mmateloni ohinziwa-wene elobo. Okosa ejene kayo okaana murima wororomeleya. Koona mazu a Davidi Mwene wororomeleya: “Kaddinedda na athu anawebedha amulugu ebewene, Kaddinandana na abale anna mirima mili.” (Masalmo 26:4) Akala ohitela obe oteliwa, txipo kuthukule mweeddelo ogonyengetheli onvitela mukwawo wa mmateloni ejile eli weyo txibarene!

7, 8. Dhotagiha gani dha Bibilia dhinwodha wakamiha aima osunza thima ya okaana murima wororomeleya?

⁷ Aasunzihaga ana awa oderetu wa murima wororomeleya, amambali anokala a zelu olabihedha dhotagiha dha Bibilia. Wila nitonye dhotagiha dha okaana murima wohiroromeleya, nihikaana muselu wa Aká, oddwene weyile batamela ovita ombava waye; Jezi, oddwene walogile othambi atamelaga ogumela kobiri; vina Juda, oddwene weyile nanda baloga othambi na otimbwini wila amputhule Yezu.​—Josuwé 6:17-19; 7:11-25; 2 Amwene 5:14-16, 20-27; Mateu 26:14, 15; Joau 12:6.

⁸ Wila nitonye dhotagiha dhiina dhaderetu dha okaana murima wororomeleya, ohikala muselu  ninga obule wa Jakobi, oddwene wapangile anaye wiyiha kobiri dhafanyilani mmazumberhani mwawa sabwani iyene woona ninga dhekiwemo na ohiziwa; muselu wa Jefte na mwanaye wa muyana, oddwene wathithimihile nlibelo na babi waye na mukutho munddimuwa; vina muselu wa Yezu, oddwene wavithwanyutxile na oliba murima vamentoni va muthithi wa athu a otabala wila asorihe nivuhulo nanda abarele akwaye. (Wita 43:12; Anamathonga 11:30-40; Joau 18:3-11) Dhotagiha esi dhiñgonovi podi wavaha amambali mirugu dha muselu woñganimela onfanyeya mu Nzu na Mulugu ejene enwodha wakamiha, wasunziha ana awa wila akwele vina avahe thima murima wororomeleya.

9. Txini enfanyeela orabela amambali akala anfuna emetxe yotagiha ya okaana murima wororomeleya mwa ana awa, nanda ekaleli eni yotagiha yofuneya?

⁹ Masunziho aba anowika mabasa a makamaka mwa amambali. Murumiwi Paulo ohivuza: “Dhavito, weyo wàsunzihaga ena, kunwodha ovisunziha wamwinya? Weyo onlaleya wi kwiye, oniyela nni?” (Roma 2:21) Amambali ena anowaviriganiha ana awa modheela wasunziha okaana murima wororomeleya oku awenene akosaga dhilobo na murima wohiroromeleya. Txino awene anovevutxa ombava wawa mwa dhilobo dhiñgono vina na mazu oonyengetha abene anilani “Anyaya anfuna wila athu athukulege dhilobo esi” obe “Kayo othambi-wene.” Mwa txibarene, wiya wiya-wene, peno eloboya yiyiwe ekaane thima gani, vina othambi othambi-wene, peno elobo gani enlogiwa obe muyevelo wa othambiya. * (Kengesa Luka 16:10.) Aima anowaguvela ozinddiyela malumi meeli nanda podi oputhuleya. (Éfeso 6:4) Txibarene, ana agasunza okaana murima wororomeleya na yotagiha ya ababi awa, txino anela wunuwa amuthithimihaga Yehova mwilaboni mpuno mwa mirima dhohiroromeleya.​—Gano dh’olelana 22:6.

10. Mowiwanana na okaana murima wororomeleya mwari mwa Akristu akwehu, oviwañganela gani onfanyeelihu wubuwelaga?

¹⁰ Otugumana na Akristu akwehu ononivaha midhidhi dhinji wila nirave murima wororomeleya. Ninga musunzelihu mu Kapituluni 12, ninofanyeela okala pasope na mukalelo onlabihedhihu mvaho wa ologa, makamaka mwari mwa abali na arogori ehu a omuyani. Makani a siku na siku podi osadduwa bakala waba, mpaka vina omageedha! Nigavirihagamo dhowireya dhihiziwilehu wila dhihipadduwa-wene, txino ninela okamiha omwadha othambi, noona jaderetu okoya mulomo wehu. (Gano dh’olelana 10:19) Mpaddi mwina, txino ninoziwa elobo eli ebaribari, mbwenye kintapulela wila enofanyeela ologiwaga. Motagiha, makaniya txino kannipatha, obe kaninfanyeela ologamo abene. (1 Tesalónika 4:11) Athu ena anovilelana oduduruwa alogaga wila oku okaana murima wororomeleya, mbwenye mazu ehu anofanyeela ozivaga vina okala a oderetu.​—Kengesa Kolosi 4:6.

11, 12. (a) Athu avolowile mmereloni abure vaddiddi anthabwiha dhavi nikathamihona? (b) Dhothambi gani dhiina dhinvuwiha Satana mowiwanana na dhothega dhinddimuwa, nanda niwodhe dhavi owanana ejiya? (c) Niwodhe dhavi olagiha murima wororomeleya na nikuru na Yehova?

¹¹ Ja makamaka vaddiddi wila nikaane murima woromeleya vamentoni va abale ansogorhela mmulogoni. Ena abene  anvolowa mmakathamihoni anothabwiha makathamihoya sabwa ya otamelaga ovita dhothega dhawa vina wapangaga othambi anddimuwa a mmulogoni agavuzaga yothegaya. Athu aba anoroma othukula egumi ya malumi meeli, afunaga omulaba Yehova oku athukulaga egumi ya dhothega dhinddimuwa. Txibarene, mweeddelo obu onokosiha egumi yotene ya muthuya okala ya othambi. (Masalmo 12:2) Ena anapanga anddimuwa a mmulogoni mpaddi muñgonovi wa ebaribariya oku avitaga dhibaribari dhofuneya. (Merelo 5:1-11) Otuwa murima wororomeleya oku wili-wili onroma na ororomela othambi okwene onvuwiha Satana.​—Koona kaxa enloga “ Dhothambi Dha Satana Mwaha Wa Dhothega Dhinddimuwa.”

¹² Vina jofuneya okaana murima wororomeleya na nikuru na Yehova nigaakulaga mavuzo anlebiwa. Motagiha, nigalebelaga mabasa ehu a olaleya, ninokala pasope wila nihilebe othambi. Yakakene, nigalebaga jangarha na mabasa a Mulugu, txipo kaninfanyeela ologa othambi mwaha wa mukalelo wehu watxibarene wa egumi obe elobo yina ya omuthu vina mabasa ehu.​—Kengesa Gano dh’olelana 6:16-19.

13. Niwodhe dhavi okaanavi murima wororomeleya nigakaana mandano a marhondda na Akristu akwehu?

¹³ Okaana murima wororomeleya na Akristu akwehu onofiyedha vina dhilobo dha marhondda. Mudhidhi na mudhidhi, abali na arogori a Akristu txino podi oroma marhondda a wasikanela. Anofanyeela okala pasope wila dhilobo esi dhivapane na webedha onkosani vamodha mu Numba ya Omwene obe mmabasani a olaleya. Mandano a marhondda txino podi okala okule wa patarau na namalaba. Nigaavaha ganyo abali obe arogori, ninofanyeela okala pasope wila naweeddihege na murima wororomeleya, wapitxaga na mudhidhi, muthengo olaganiwe, vina na dhopuramo obe esene dhinfuna nlamulo. (1 Timóteo 5:18; Tiago 5:1-4) Yakakene, akala nivahiwe ganyo na mbali obe murogori, ninvahege muthengo wotene wa mabasa akosilehu. (2 Tesalónika 3:10) Kaninjeedhela weeddihiwa wa vawoka sabwa ya wandana wehu wa Okristu, okalaga  ninga patarau wehu ononifiyari mudhidhi wila nihilabe, anivahe sagwati obe dhopuramo dhiina esene dhihinna anamalaba ena.​—Éfeso 6:5-8.

14. Akristu agaasikanela okosa marhondda, anfanyeela obazedha dhilobo gani na zelu, nanda sabwa yani?

¹⁴ Ki akala marhondda ehu anotaganyiheya na kumpaniya yowasikanela, txino opitxela kobiri elobo obe ofiyari? Bibilia onoperheka nigano na makamaka vina nolabihedheya: Kalebelani dhilobo dhotene! Motagiha, muguleli Jeremiya mundda, wahikaana jangarha nalebiwe wilimo, na anamoona, nanda banikoyeliwa olabihedha musogorho. (Jeremiya 32:9-12; koona vina Wita 23:16-20.) Nigakosaga marhondda na Akristu akwehu, olebela deretu dhitagano dhotene, vina majangarha oolebiwavo mazina vina ookoseliwa onamoona kuntapulela wila kaninroromelana. Othiya eji, enokamiha obazedha makathamiho, oludduwelana vina ohiwanana ontota opatulana vina wila makathamiho aba ahirome-wene. Akristu otene ankosa marhondda vamodha anofanyeela wubuwelaga wila kavanfanyeela okala marhondda anfanyeela otxutxa wiwanana vina murenddele wa mulogo. *​—1 Korinto 6:1-8.

15. Yehova oniwamo dhavi mwaha wa otuwa murima wororomeleya mmarhonddani, nanda Akristu ankosa dhavi na emanya eji?

¹⁵ Murima wororomeleya wa Mukristu kungomela mmulogonivi. Paulo ohiloga: “Vowi ninotamela wedda pama mwa dhetene.” (Ahebreu 13:18) Ogakala mwaha wa marhondda a mwilaboni, Muthanddi wehu onotanaala vaddiddi okaana murima wororomeleya. Mu nivuruni na Gano dh’olelana bahi, muhikala dila tharu mazu anaddana balansa dhojela. (Gano dh’olelana 11:1; 16:11; 20:10, 23) Mmasakani a wale, athu alabihedhetxa balansa vamodha na mpimo mmarhonddani wila apime dhilobodha dhiguliwe vina kobiri dhiguliwena. Anyamarhondda oohikaana mirima dhororomeleya alabihedha mpimo mili vina na balansa yohikala, wila anyengethena  vina aapelena malago anamagula awa. * Yehova onowidda merelo aba! Wila nikalevi mu okwelani mwaye, ninorabela kakamwe otuwa murima wororomeleya wotene wa merelo a marhondda.

16, 17. Mukalelo gani wa otuwa murima wororomeleya wakwaneliwe mwilaboni mwa ovanene, nanda Akristu a ebaribari aganile okosa eni?

¹⁶ Sabwa yawila Satana ddili mulamuleli wa elabo eji, kanintikina woona okaana murima wohiroromeleya oli mpaddi wotene. Kadda siku iyo podi ogumana na manyengetho a okala a murima wohiroromeleya. Athu agalebaga ejile esunzilani (currículo) wila afanye ganyo, ehakwaneliwa ologa othambi vina othabwiha, apanddaga vina aparhapathelaga esile dhihisunzilani. Athu agalebaga majangarha a ovolowana elabo ya otakulu, misoko, seguro, na majangarha mena ninga abene, awene anowakulaga othambi wila afanye ejile enfunani. Anamasunza enjene anopelana malago, obe agalebaga mabigiho a oskola, vina agalogaga dha oskola, txino anodhowa mu Internetini batagiha dhinfanyani mwenemwale, aperhekaga mabasa a muthu mwina na othambi okalaga ninga ba awene akosile ejileya. Athu ageeddaga na asogorheli oovirigana, wili-wili anowavaha manyigalo wila afanye ejile enfunani. Ninojeedhela mukalelo obu wa mweeddelo mwilaboni mudhaalile “anamakumbela vawa, anamajiwa murima na kobiri, . . . awuma murima.”​—2 Timóteo 3:1-5.

¹⁷ Akristu a ebaribari ahigana okoodda orava merelo aba otene. Ejile enkaliha nivurhano okaana murima wororomeleya mudhidhi mwinji jawila abale ankosa merelo aba ookaana murima wohiroromeleya ankala ninga aneeddeleya deretu vina anodhowa vasogorho mwilaboni mpuno. (Masalmo 73:1-8) Noona, Akristu txino anotabuwa mpaddi wa muhaku sabwani awene anfuna akale a murima wororomeleya ‘mwa dhotene.’ Guru yotene enofanyeela? Txibarene enofanyeela!  Ki sabwa yani? Mareeliho gani anda sabwa ya mweeddelo wokaana murima wororomeleya?

18. Ovuwa wa okaana murima wororomeleya okaleli eni wofuneya vaddiddi?

¹⁸ Kuli dhilobo dhinjidhene esene dhinafanyiwe mwigumini esene dhina thima vaddiddi opitha ovuwa ninga muthu wa murima wororomeleya vina okala muthu wokuluveleya. (Koona kaxa enloga “ Ddikalile Muthu Wa Murima Wororomeleya Na Muthengo Gani?”) Vina katanaalela eji​—athu otene podi okaana ovuwa oku! Kingayela thotho dhawo, oziwa, mukoddelelo, musunzelo obe dhilobo dhiina dhihinwodhiwe wañganela. Na dhaenevi, athu enjene anojomba ogumela thima ya okaana ovuwa waderetu. Enorameya vaddiddi. (Mikeya 7:2) Athu ena podi wubedda sabwa ya okala wa murima wororomeleya, mbwenye ena anela otamaalela murima wawo wororomeleya, nanda anela wuthuva na nikuluvelo nawa vina nriho. Anamoona a Yehova enjene ahifiyedha woona wila murima wawa wororomeleya ohapurihamo mpaddi wa muhaku. Ahibarela ganyo dhawa oku anamalaba ena anna murima wohiroromeleya eela othamagihiwa va ganyoniva, obe ahifanya ganyo venevo vatameliwa anamalaba a murima wororomeleya.

19. Dila ya egumi ya okaana murima wororomeleya empakela dhavi mubuwelo wehu vina wandana wehu na Yehova?

¹⁹ Peno akala eji enowupadduwela obe kinupadduwela, onela woona wila okaana murima wororomeleya onela vina odhana mareeliho manddimuwa. Onela okaana mareeliho a mubuwelo wokoddela. Paulo ohileba: “Iyo ninowona wi murimehu kunnisumulula.” (Ahebreu 13:18) Mowenjedhedha mweeddelo wawo kunlupiwa, na Babi wehu wokwela wa odhulu, nanda iyene onowakwela athu a murima wororomeleya. (Kengesa Masalmo 15:1, 2; Gano dh’olelana 22:1.) Indde, okala wa murima wororomeleya onowukamiha okalavi mu okwelani mwa Mulugu, kanintamela ethuvo yina enddimuwa opitha ejene. Vasogorhova ndoweni nisekeserhe mwaha oniwanana na obwene: Mukalelo onoona Yehova mabasa.