1, 2. Bani anthabela midhidhi dha obatizo?

AKALA onomulaba Yehova mwari mwa vyaka dhinjidhene, ohiwa diskursu gwe dha obatizo va mitugumanoni dhehu dha murudda na dha kwathi. Mbwenye peno okalilevo dila ngasi va mitugumanoni esi, onowiwavi oziva mudhidhi wotene onawooniwe abale agilatile mipaddo dha osogorho bavenyile, bavithwanyutxedhi obatiziwa. Mudhidhi obo, zumbi na oziveliwa ninomwadheya mwari mwa agumani otene, banisogorheliwa na wobiwa mada na murima wotene. Txino mintori dhinofumbuwa mmentoni mwawo venevo vanooniwe gatha eji eswa ya athu a thima asakulile onvuneela Yehova. Onkalaga othaba wopitha!

² Oku banigoona obatizo dila dhiñgonovi vari va yaka mmuruddani mwehu, anju ahikaana gari ya woona dila dhinjidhene ovenyedha odhulu. Onowodha otanaalela ‘othabeliwa onkala odhulu’ venevo vanawoonani athu matxikwi na matxikwi ozugunuwa elabo yotene bathiddile epaddi yowooneya ya nikuru na Yehova kadda sumana? (Luka 15:7, 10) Kavali waganyedha yawila anju anosanzaya vopitha woonaga winjiva oku!​—Ajewu 2:7.

3. Satana onrugunuwela eni “ninga poddogoma ongóroma,” nanda txini enfuniye okosa?

³ Mbwenye mothiyana vaddiddi, ohikala muya dhimpiwa mbani woonaga obatizo oku. Sabwani Satana na adomonyo  anosilidhiwa wawoona athu matxikwi na matxikwi banyanyali elabo eji yovirigana. Eji ebaribari sabwani Satana ohizivala baloga kuli muthu onimulaba Yehova sabwa ya omukwela vina kuli muthu onthiddeela nroromelo naye agehiwaga vaddiddi. (Kengesa Job 2:4, 5.) Mudhidhi wotene onsakula muthu oviperhekela Yehova, Satana onokoneya. Enkala ninga Satana onvadiwa mafuddadda na matxikwi a athu mwari mwa sumana dhotene dha yaka. Kintikiniha yawila ‘onorugunuwa ninga poddogoma ongóroma amutamelaga womuja’! (1 Pedro 5:8) “Poddogoma” oddu ohipiwa dala wila animedhekule mpaddi wa omuyani, aniputhule obe atolotxe wandana wehu na Mulugu.​—Masalmo 7:1, 2; 2 Timóteo 3:12.

4, 5. (a) Yehova obareli nipakelo na Satana mwa mikalelo gani mili? (b) Akristu anfanyeela okaana nikuluvelo gani?

⁴ Masiki vanwanihu na mwiddani wotabala vaddiddi, kaninfanyeela  opemberhiwa na wova. Sabwa yani? Sabwani Yehova ohibarela ewodhelo ya “poddogoma [oddu] ongóroma” mwa mikalelo mili dha makamaka. Sivi? Woroma bu obule wathagile Yehova ologa yawila “muthithi munddimuwa” wa Akristu a ebaribari ogahiviluwa va ‘goi enddimuwa.’ (Ovuhulela 7:9, 14) Mavuhulelo a Mulugu txipo kanvonya. Noona masiki Satana onoziwa yawila nlogo na Mulugu mumodhani kaninwodheya.

⁵ Nibarelo nanawili ninooneya mwa ebaribari ya makamaka elogiwe na mmodha mwa alobwana oororomeleya a Mulugu a nsaka na wale. Namavuhulela Azariya wahimpanga dhahi Mwene Asa: “Nabuya onokala na nyuwo, mugandana na Iyene.” (2 Mapadduwo 15:2; kengesa 1 Korinto 10:13.) Dhotagiha gwe dhilebiwe dhinolagiha yawila nsaka na wale, dila dhotene Satana kawodhile wamedhekula adhari a Mulugu abalene andanetxa na Mulugu. (Ahebreu 11:4-40) Nsaka na ovanene, Akristu anandanavi na Mulugu anela owodha ompambiha masiki ompemberha Ddiabo. Mwa txibarene, Nzu na Mulugu ninonikuluveliha: “Mmukoddege satana; iyene onere owuthawelani uddayi-wene.”​—Tiago 4:7.

6. Satana onwana dhavi na kadda Mukristu?

⁶ Satana kanwodha opemberha kaniya, mbwenye kadda muthu agathiya okala mento onowodha ompemberha. Satana onoziwa yawila agobaniha wandana wehu na Yehova, onowodha onimedhekula. Satana ontamela dhavi okosa ejene? Modheela onibuddugela na guru, ombuddugela muthu yeka vina na osaringele. Ndoweni nisekeserhe mauje aba a makamaka a Satana.

7. Satana ombuddugelela eni na guru nlogo na Yehova?

⁷ Obuddugela na guru. Murumiwi Joau ologile dhahi: ‘Elabo yotene eli mmadani mwa Satana.’ (1 Joau 5:19) Mazu aba ahikaana nlago wa Akristu otene a ebaribari. Vowila Satana ohimala omedhekula elabo yotene yovirigana ya nlogo  na athu, ovanene onfwaseyeletxa wabuddugela na guru abale ahinafiyedhiye​—nlogo Yehova. (Mikeya 4:1; Joau 15:19; Ovuhulela 12:12, 17) Ohikaana owali vaddiddi sabwani onoziwa wila ohalinawo mudhidhi muñgonovi. Noona ohiwaraliha guru dhaye. Nsaka na ovanene, ninowoona owali waye wothabwa vina wa otolotxa. Dhaene, ovanene opitha mundduni, ninofanyeela ‘oziwelamo dhinfanyeelihu okosa.’​—1 Mapadduwo 12:32.

8. Murumiwi Paulo waddana eni mwalogeliye wila nihikaana ‘kani’ yosadduwela muya dhabure?

⁸ Kani ya muthu yeka. Murumiwi Paulo wahalaga Akristu akwaye dhahi: ‘Nihikaana kani . . . yosadduwela guru dhabure dha omuyani mmimburoni dha odhulu.’ (Éfeso 6:12, NM) Paulo olabihedheli eni nzu nthi ‘kani’? Sabwani nthene nintapulela koddo ya kove na kove vina mpaje wopirhinganyana. Dhaene, modheela olabihedha nzu nthile, Paulo ohooniha deretu yawila kadda muthu ohikaana mpaje na muya dhabure. Peno akala ninkala mmuruddani munrumeeliwa wila muya dhabure dhihikalawo obe kadhiwo, kanidduwale yawila muviperhekelihu Yehova, nikalile ninga niimelile vamburoni vanrabiwa koddo. Makamaka ovenya siku na oviperheka mpaka osogorho, kadda Mukristu oli mukoddoni. Noona Paulo wahoona-wene ofuneya wa wakokomeza Akristu akala mu Éfeso dila tharu wila “mukalevi awimelene”!​—Éfeso 6:11, 13, 14.

9. (a) Satana na adomonyo anlabihedhela eni ‘dhoshaga’ dhothiyana-thiyana? (b) Satana ontamelela eni oviriganiha mubuwelo wehu nanda niwodhe dhavi orabela guru dhaye? (Koona kaxa “ Pasope Na Osaringele Wa Satana!”) (c) Yoshaga gani enfunihu osekeserha ovanene?

⁹ Dhoshaga. Paulo onowakokomeza Akristu okala owimelene mosadduwela ‘dhoshaga’ dha Satana. (Éfeso 6:11) Koona yawila Paulo olabihedhi nzu ninloga dhilobo gwe. Muya dhabure kadhinlabihedha etagano modha yoshagana, mbwenye dhinolabihedha dhilobo gwe, nanda dhinothiddaga mpirha. Na ovira wa mudhidhi, eweleli ena aali owimelene na yoweha, mbwenye mufanyeliwani yoweha ya mukalelo  mwina ahigwa. Dhaene, Ddiabo na adomonyo anowañgana deretu mweeddelo wa kadda muthu bathidda apale vobanilehu. Awene onothiddihedha mabasa wobanavi onkaanihu mpaddi wa omuyani. Ninotamaalela yawila ninowodha ozinddiyela marhe menjene a Ddiabo sabwani ahimala ovuhuliwa mBibiliani. (2 Korinto 2:11) Mu nivuruni mpu, nihisekeserhamo marhe ninga ñgambo ya mazanga, omarho wabure na ojeberuwa. Ovanene ndoweni nisekeserhe yoshaga yina ya Satana. Ologa na muya.

10. (a) Ologa na muya txini? (b) Yehova onoona dhavi ologa na muya nanda weyo onoona dhavi?

¹⁰ Akala muthu onologa na muya obe dhodomonyo iyene ohigumana kakamwe na muya dhabure. Wombeza makaga, muniya, opandda murobwe wa epipi na wavuzaga amarafula, ba makalelo mena a ologa na muya. Ninga muziwelihu deretu, ologa na muya ‘onomugiha mara’ Yehova. (Olibiha 18:10-12; Ovuhulela 21:8) Vowila iyo vina ninofanyeela ‘othawa eli yabure,’ kaninrumeela-wene okosa omarho na muya dhabure. (Roma 12:9) Okosa omarho na muya dhabure ogakalile omusadduwela Yehova Babi wehu wa odhulu na mukalelo wopitha vina wonyakavala vaddiddi!

11. Ogakaleli eni mperhe munddimuwa vaddiddi Satana koninyengethela ologaga na muya? Kaladdaniha.

¹¹ Mwa dhaene, sabwa yawila otokonya vañgono ologa na muya ontapulela omusadduwela Yehova vopitha, Satana ohigana onikwekwethela ogwela mwenemwa. Mudhidhi wotene onimmeziye Mukristu bavolowela dhodomonyo, Satana onothaba na mathanga manddimuwa a opemberha. Sabwa yani? Katanaalela oladdanihiwa oku: Kowiliwa munyakoddo ononyengethiwa banyanyala gatha yaye bavolowa mu gathani ya amwiddani, kazembeya wa amwiddani agahithaba. Agamoona musadduweli oddu ninga mperhe, wila anveyihena kazembe wa nikuru nthile ninyanyalile munyakoddo oddu. Na mukalelo wakakene, akala Mukristu onoroma ologa na muya, iyene ohimunyanyala Yehova na ofuna vina  woziwene, bavika kakamwe mwa osogorheliwa na Satana. Otanaalele othaba wa Satana bagamutonya musadduweli oddu ninga mperhe wa koddo! Mwa iyo, akala agafunile onvaha Ddiabo mperhe ninga obu? Kaninfuna-wene! Kanili asadduweli.

12. Marhe gani anlabihedha Satana wila apakele moonelo wehu wa ologa na muya?

¹² Nigathawaga ologa na muya, Satana kaneeddeleya deretu agalabihedha ejene wila animezena. Venevo onozinddiyela yawila onofanyeela osaddula mutanaalelo wehu. Na mukalelo gani? Onotamela makalelo a waviriganiha Akristu mpaka ena wubuwela yawila ‘dhaderetu sabure; dhabure, saderetu.’ (Izaiya 5:20) Wila akose ejene, dila dhinjidhene Satana onlabihedha marhe athiddihedhiye mabasa boona wila anolaba​—onowita mavuzo wila atote waganyedha.

13. Satana olabihedhi dhavi marhe a wita mavuzo wila atotena waganyedha?

¹³ Koona mukalelo walabihedhi Satana marhe aba nsaka na wale. Mmunddani mwa Edeni wahinvuza Eva dhahi: “Txibarene Mulugu oukoddihani oja milima dha miri dhili muddebe-mpuno?” Nsaka na Job, vari va banja ya anju odhulu, Satana wahitavo nivuzo nthi: “Munona ninga [Job] onulabelani yovene?” Nanda omaromo wa olaleya wa Yezu velaboni ya vati, Satana wahinvaanela Kristu baloga dhahi: “Akala nyuwo muli Mwana-Mulugu, lamulaní wi malugu aba asadduwe akale oja.” Katanaalela, mwa ejile yampadduweli Yezu, Satana wahivaanela obedda mazu aalogile mwinyene Yehova myeri mitanu na mmodha mundduni yawila: “Oddu ddi mwanaga wa vamurimani vaga; mwa iyene pulí oziveliwa waga”!​—Wita 3:1; Job 1:9; Mateu 3:17; 4:3.

14. (a) Satana onlabihedha dhavi marhe aye a wita waganyedha mwaha wa ologa na muya? (b) Ovanene ninfuna nisekeserhe eni?

¹⁴ Nsaka na ovanene, Ddiabo onlabihedha marhe akakene mwa guru dhaye dha otota waganyedha akala ologa na muya kwabure. Mokubanyeya, onoweeddeleyaga deretu mwa otota waganyedha mmusorhoni mwa eweleli ena. Ahiroma ovuza  akala makalelo mena a ologa na muya babure-wene txibarene. Mwatxibarene, anubuwela dhahi: ‘Ejiya jabure-wene?’ (2 Korinto 11:3) Nakamihe dhavi athu aba osaddula mubuwelo wawa? Nikaane dhavi ebaribari wila ninaviriganihiwe na marhe a Satana? Wila nakule mavuzo aba, nisekeserhe dhipaddi biili dha mwigumini esene dhiviriganihile Satana na dhitagano dha ologa na muya. Ku ovega na otanaala oredda.

15. (a) Athu enjene mu dhilabo dha Omaddowelo wa Nzuwa anoona dhavi ologa na muya? (b) Akristu enjene anviriganihiwa dhavi na mukalelo onoona elabo ologa na muya?

¹⁵ Makamaka mu dhilabo dha Omaddowelo wa Nzuwa, athu anoveviha ororomela mizimu, dhokwiri na makalelo mena a ologa na muya. Mafilme, manivuru, programa dha televizau na mpirha dha mukomputadorini dhinothabwavi otonyihedha merelo a odomonyo ninga dhilobo dha ovegana, dhotxenjerha vina dhihinkosa yabure. Mafilme na manivuru mena anloga dha ororomela mizimu na mauje a Satana, ahakwaneliwa vaddiddi mpaka aroromeliya osasanyedha mimburo dha oveganamo esene. Mowooneyamwene, adomonyo anoweeddeleya deretu mwa ovevutxa wopiha wa ororomela mizimu. Emanya eji ya ovegana ologa na muya ehiravihiwa Akristu? Wubuwela wa athu ena ohimala oviriganihiwa. Na mukalelo gani? Wila nivahe yotagiha empadduwetxa, Mukristu dhahi mwamaleliye woona filme yatonyihedha ororomela mizimu, wahiloga dhahi: “Ddihoona filmeya mbwenye kaddinloga na muya.” Wubuwela oku okaleli eni wowopiya?

16. Ekaleli eni yowopiya osakula dhovegana dhili dha ororomela mizimu?

¹⁶ Masiki vakalilaniwo othiyana vari va othiddihedha mabasa ologa na muya na woonaga mu televizauni obe mfilmeni, ejene kintapulela wila woonaga esene kunopiya. Sabwa yani? Katanaalela eji: Nzu na Mulugu nintonyihedha  wila nne Satana nne adomonyo aye kana ewodhelo ya wengesa dhubuwelo dhehu. * Dhaene, ninga mumalelani oromoliwa, wila aziwe esile dhinubuwelihu vina azinddiyele wobana wobanavi wa omuyani onihuna, muya dhabure dhinofanyeela wañgana na ofwaseya esile dhinkosihu, vamodha na osakula wehu dhovegana. Akala Mukristu onoziveliwa mafilme obe manivuru apanddeliwe otonyihedha dha okwiri, muniya, merelo a opariwa na domonyo obe dhitagano dhiina dha odomonyo, dhaene onowaperhengezela adomonyo mpaganyo. Mwatxibarene, onowapanga adomonyo wila miyo ddobanile apa! Mowakula, adomonyo anela owaraliha kani yawa na Mukristu oddo wila apure yowobana eji yatonyihedhiliye mpaka awene omutarutxa bampemberha kakamwe. Mwebaribari, abale aromile oziveliwa dha ologa na muya sabwa ya dhovegana dhasakulilani, esilene dhali dha ororomela mizimu, musogorhomwa ahifiyedha othiddihedhaga mabasa-wene ologa na muya.​—Kengesa Galásia 6:7.

17. Satana onimpuranya muthu modheela olabihedha yoshaga gani na muthu ombulela?

¹⁷ Satana kantamela opuravi edhivi-dhivi yehu ya ovega mbwenye vina ofuna wehu otanaala oredda. Na mukalelo gani? Mukristu ombulela, bakosile dhilobo gwe wila avulumuwe, txino onosegedheya. (Marko 5:25, 26) Ejene podi onvaha Satana na adomonyo mudhidhi wa otamela ompuranya. Anoziwa deretu yawila Nzu na Mulugu ninokooddiha otamela nikamihedho na ‘avuti na abale ankosa dhovuta.’ (Izaiya 1:13) Wila amukosihe Mukristu osadduwela nlago nthi, txino adomonyo anomunyengetha muthu oli muredda wila eredda yaye ehirutxa venevo basakula masasanyedhiwo obe myambo dhinlabihedha ‘masalapitho,’ obe ologa na  muya, elobo yovoreya vaddiddi. Yoshaga eji ya adomonyo egathidda mpirha, enowobaniha wandana wa muthu oddu na Mulugu. Na mukalelo gani?

18. Makalelo gani a myambo agakooddile Mukristu, sabwa yani?

¹⁸ Yehova wahalaga Aizrayel abalene alabihedha ‘masalapitho’: “Mugavenyihedhaga myono dhenyu olobela, miyo kaddinuwanganani; mugaddoddobelelaga malobelo enyu gwe, miyo kaddinvuruwana.” (Izaiya 1:15) Txibarene, dila dhotene nirabelege yotene egakathamihile malobelo ehu ovuruwaniwa vina ogwadda nibarelo ninnikosela Yehova, makamaka muthu agabulelaga. (Masalmo 41:3) Dhaene, Mukristu webaribari agoona wila mukalelo onfuna okosiwa analizi obe osasanyiwa ereddaya ohitaganyiheya na ologa na muya, onofanyeela okoodda. * (Mateu 6:13) Na mukalelo obu, onelege okamihiwavi na Yehova.​—Koona kaxa enloga “ Oku Ologa-wene Na Muya?”

19. (a) Ddiabo wapeli athu malago bagaroromela eni mwaha wa ewodhelo yaye? (b) Gahala gani dhinfanyeela Akristu a ebaribari orabelaga?

¹⁹ Oku athu enjene mu dhilabo dha Omaddowelo wa Nzuwa vanvevihani wopiya wa ewodhelo ya Satana, dhipaddi  dhiina dha elabo empadduwawo kayo ejene. Mwenemo Ddiabo ohimala wapela malago bagobuwela yawila ohikaana ewodhelo vaddiddi opitha ejile eniyena-wene. Athu ena ankalawo, anja vina angona bagova muya dhotakala. Ohikala gahala gwe dhinloga merelo a guru a adomonyo. Dila dhinjidhene gahala esi dhinlogiwa badhigazivihiwa; athu anotikina. Nimwadhege vina gahala esi? Nne, sabwani adhari a Mulugu webaribari anorabela okosa ejene na sabwa biili dha makamaka.

20. Muthu onwodha dhavi omwadha miselu dha othambi dha Satana s’ohifuna?

²⁰ Yoroma, modheela opakaga gahala esi dhinloga mperhe dha adomonyo, muthu onovuwiha ofuna wa Satana. Na mukalelo gani? Nzu na Mulugu ninologa txibarene yawila Satana onowodha okosa dhilobo dhinddimuwa, mbwenye ononilaga vina yawila Satana onolabihedha dhizinddiyelo “dhopelana malago” vina ‘onyengetha.’ (2 Tesalónika 2: 9, 10) Vowila Satana ddi munyengethi wosarhapitha, onoziwa mukalelo wa oviriganiha dhubuwelo dha abale anfunetxa ologa na muya vina mukalelo wa waroromeliha dhilobo dhihili ebaribari. Txino athu aba anororomela na murima wotene yawila ahoona vina ahiwa dhilobo venevo bagaloga esile dhapadduweli ninga ebaribari. Na mudhidhi, gahala dhawa dhinothabwihiwa sabwa ya okooddaga omaalihiwa mwano. Akala Mukristu onomwadha gahala esi, mwatxibarene onkosa ofuna wa Ddiabo, ‘baba wa othambi.’​—Joau 8:44; 2 Timóteo 2:16.

21. Ninfuna wila makani ehu akalege a eni?

²¹ Yanawili, masiki akala nsaka na wale Mukristu wahigumana-wene na muya dhabure, onofanyeela orabela wavegihaga eweleli akwaye na gahala dha muya dhabure. Sabwa yani? Sabwani ninokokomeziwa wila: “Nlibele omwañgana Yezu: ddi iyene witile dila ya nroromelo, ddi iyene onnakwaniha muroromelanimwá.” (Ahebreu 12:2) Pu mwenemo, ninimwañgana Kristu, kaninimwañgana Satana. Ja makamaka yawila Yezu bali velaboni ya vati kaavegiha anamasunzaye na gahala dha muya dhabure, masiki vagawodhileye ologa vaddiddi mwaha wa esile dhinwodha obe dhihinwodha Satana okosa. Mbwenye Yezu wekile vasogorho mpaganyo wa Omwene. Noona, momutagiha Yezu na arumiwi aye, ninfuna wila makani ehu akalege a “matikiniho a Mulugu.”​—Merelo 2:11; Luka 8:1; Roma 1:11, 12.

22. Nikamihedhege dhavi odhulu okalegevi ‘oteyela onddimuwa’?

²² Txibarene, Satana onolabihedha dhoshaga dhothiyana-thiyana vamodha na ologa na muya bagatamela otolotxa wandana wehu na Yehova. Mbwenye modheela othawa ejile eli yabure vina othiddeela ejile ekalile, kaninanvahe Ddiabo mudhidhi wa wobaniha ogana wehu wa okoodda mikalelodha dhotene dha ologa na muya. (Kengesa Éfeso 4:27.) Katanaalela ‘oteyela onddimuwa onakale odhulu’ nigakalavi owimelene, wila ‘niwodhe ovyamelela dhoshaga dha Ddiabo’ mpaka orimeelihiwa waye!​—Luka 15:7; Éfeso 6:11.