Namakwela wa Yehova:

Yezu wahiloga dhahi: ‘Munela oziwa ebaribari, nanda ebaribari enela wufurulani.’ (Joau 8:32, Tradução do Novo Mundo) Mazu aba anolibiha vaddiddi! Pu mwenemo, enowodheya oziwa ebaribari masiki mmasakani aba “omariha” oorutxa, veneva vadhaaliwo dhothambi na dhovirigana. (2 Timóteo 3:1) Onowubuwela dila yoroma yazinddiyeliwe ebaribari ninga muntapuleliwani mu Nzu na Mulugu? Ejilene yali elobo yohagalaliha vopitha!

Noona, oku bili ya makamaka okaana eziwelo yonyaala ya ebaribari vina okamihedha wili-wili wapanga athu ena ebaribari, needdege vina mowiwanana na ebaribari eji. Wila nikosege ejene, ninofanyeela okalavi mu okwelani mwa Mulugu. Eji entaganyiheya na eni? Mazu a Yezu alogiliye omathiyu ahinathi okwa anowakula nivuzo nthi. Wahapanga arumiwi aye oororomeleya: “Mugavirihamo magano aga, munokalavi mukwelani mwaga; ninga enira miyo ddivirihilemo magano a Babaga, ddinkalavi mukwelani mwaye.”​—Joau 15:10.

Koona yawila Yezu wahikalavi mu okwelani mwa Mulugu modheela ovirihamo magano a Babi waye. Yakakene enothiddihedheya mabasa wa iyo nsaka na ovanene. Wila nikalevi mu okwelani mwa Mulugu, ninofanyeela othiddihedha mabasa ebaribari mwigumini yehu ya siku na siku. Omathiyu obule wakakene, Yezu wahiloga dhahi: “Ovano muziwa meddeloyá; mugavirihagamo, panafwanyenyu ojavo.”​—Joau 13:17.

Ofuna wehu na murima wehu wotene kwawila nivuru nthi nukamihe othiddihedhagavi mabasa ebaribari mwigumini mwawo, dhaene bukalavi “mukwelani mwa Mulugu” bugajeedhela wakela “egumi yohimala.”​—Juda 21.