Yehova onjeedhela wila atelani akalevi ororomeleya mu nlibeloni na matelo nikosilani. Amugumanihaga mulobwana na muyana woroma va mateloni, Yehova ohiloga: “Nona mulobwana . . . akale na mwadhye; obili akale muthu mmodha.” Vasogorhova, Yezu Kristu ohivirihamo mazu abale, venevo benjedhedha: “Nona, emagile Mulugu, muthu ahitapule.” (Wita 2:24; Mateu 19:3-6) Vina, Yehova vamodha na Yezu anoona matelo ninga nifunddo na okalawo wotene wa muthu nanda ningoma bahi mmodhaya agakwa. (1 Korinto 7:39) Vowila matelo bokoddela, omwalana kunfanyeela ovegiwana. Txibarene, Yehova onowidda omwalana ohinna matibeelo a Malebo.—Malakiya 2:15, 16.

 Bavi ali matibeelo a Malebo a omwalana? Mbo, Yehova onowidda oraruwa vina ojeberuwa. (Wita 39:9; 2 Samuwel 11:26, 27; Masalmo 51:4) Txibarene, iyene onoona ojeberuwa okala wonyakuwa mpaka orumeela okala matibeelo a omwalana. (Ogafuna osekeserha ejile entaganyiheya na ojeberuwa, koona Kapitulu 9, ddima 7, veneva vantapuleliwa ojeberuwa.) Yehova ononvaha oddule ohiraruwile ofuru wa osakula akala onfuna akalevi na mukwayeya oraruwile obe otamela omwalana. (Mateu 19:9) Vina, akala oddule ohiraruwile onfuna amwalane, odduya kanthukula tharho enidda Yehova. Mudhidhi wakakene, txibarene, mulogo wa Okristu kunimulibiha muthu otamela omwalana. Txibarene, mikalelo dhiina podi omuthukulela oddule ohiraruwileya okalavi na oddule oraruwile, makamaka namararuwaya agatxinuwa na murima wotene. Na dhaene, omagomowa, abale ana matibeelo a Malebo a omwalana anofanyeela osakula anya nanda arumeele peno elobo gani enapadduwevo.—Galásia 6:5.

Mmikaleloni dhothabwetxa, Akristu ena ahisakula omuthiya obe ommwala mukwayeya masiki akala mmodhaya kajeberuwile. Eji egapadduwa, Bibilia onlamula wila oddule ommwalaya “[katele] obe kateliwe vina; atamele omwiyelela [mwadhiye] obe mamune.” (1 Korinto 7:11) Mukristu oddu kana ofuru wa omutamela muthu mwina na efunelo ya omagana matelo. (Mateu 5:32) Katanaalela apano mikalelo dhothabwetxa dhiñgonovi esene dhoonile athu ena ninga matibeelo a omwalana.

Okoodda osapela murala na pudha. Murala txino onoyelega vaddiddi, otuwiwaga dhofuneya dha egumi, sabwa ya mulobwanaya ojomba osapela, masiki bana ewodhelo ya okosa ejene. Bibilia onologa: “Ole ohinatanala amudhaye . . . a tákulu modhene, orimeliwa nroromelo, otakala murima opitha ole ohineddana magano a Mulugu.” (1 Timóteo 5:8) Mulobwana oddu agakoodda osaddula mukalelo waye, muyanaya agahifanyeela osakula akala onfuna abarele oderetu waye vina oderetu wa anaye modheela ogumela omwalana wa nlamulo. Txibarene, anddimuwa a mmulogoni a Akristu anofanyeela opepesa deretu ologa oku wawila ohikala Mukristu  onkoodda osapela murala waye. Muthu podi obuddutxiwa mmulogoni sabwa ya okoodda osapela murala waye.

Obubudda wothabwa. Muthu oli mmateloni ombubudda txino onkosa na otimbwini vaddiddi mpaka wika va ngovini egumi vina okalawo wa oddule ombubuddiwaya. Akala odduya onkosa dhotimbwini Mukristu, anddimuwa a mmulogoni anofanyeela opepesa akala ejiya ebaribari obe kayo. Owali wothabwa vina merelo a otimbwini aba matibeelo a obuddutxedhiwa mmulogoni.—Galásia 5:19-21.

Wika va ngovini vaddiddi egumi ya omuyani. Muthu mmodha wa mmateloni txino onomukathamiha mukwayeya owararela webedha webaribari obe txino onotamela ommagela mukwayeya wila atwe malamulo a Mulugu na mukalelo mwina. Eji egapadduwa, oddule oli va ngovini agahifanyeela osakula akala mukalelo mmodha bahi wa ‘omurumeela Mulugu opitha athu’ ku ofanya omwalana wowiwanana na nlamulo.—Merelo 5:29.

Mwa dhilobo dhotene dhintaganyiheya na mikalelo dhothabwa ninga esi dhimalile ologiwa, kavakale muthu ontamela omudidela oddule ohinna muladdu wila athiyane obe wi akalevi na mukwaye wa mmateloni. Oku amarho owarala omuyani vamodha na anddimuwa a mmulogoni vamperhekani nikamihedho vina nlago na Mbibiliani, awene kanwodha oziwa dhitagano dhotene dhimpadduwa vari va mulobwana na mwadhiye. Onwodha woona ddi Yehova bahi. Txibarene, muteliwi oli Mukristu kagamuthithimihile Mulugu obe othithimiha matelo kowiliwa onothabwiha makathamiho aye a vamuralani na efunelo ya ohikalaga na mamunaye, obe mulobwana okosa yakakene na mwadhiye. Yehova onoziwa marhe otene a omwalana, peno mmodha atamele na mukalelo gani ovita. Txibarene, “vamentoni vaye, dhetene dhinowoneya nyimwa. Iyene ddinanivuze dhirilehu.” (Ahebreu 4:13) Mbwenye akala ngovi yothabwa enodhowavi, kavakale muthu onimusumulela Mukristu onsakula omwalana. Na ejene, “muthu-muthu wehu onere othongiwa na Mulugu.”—Roma 14:10-12.