YOWENJEDHA
Omaga Musorho—Mudhidhi Gani vina Sabwa Yani?
Muyana wa Mukristu onfanyeelela eni vina sabwa yani omaga musorho mowiwanana na webedha waye? Ndoweni nisekeserhe makani owubuwelihiwa a murumiwi Paulo sabwa ya mutoma obu. Iyene ohiperheka mweeddihedho onfunihu wila nikose dhosakula dhaderetu, esene dhinimuthithimiha Mulugu. (1 Korinto 11:3-16) Paulo onovuhula dhibaribari tharu dhinfanyeela opepesiwa: (1) mabasaya aninfunana muyana omaga musorho, (2) mikalelodha dhifanyeeleliye omaga musorho, nanda (3) efuneloya ya iyene othiddihedha mabasa magano aba.
Mabasaya. Paulo onologa mabasa meeli: olobela vina ovuhulela. (Maversikulu 4, 5) Txibarene, olobela, oku webedha onkoseliwa Yehova. Ddabuno, ovuhulela ogaaladdanihiwe na masunziho otene a Bibilia abene ankosa murumiwi wa Mukristu. Ki Paulo onloga wila muyana onofanyeela omaga musorho mudhidhi wotene onlobeliye obe onsunzihiye ebaribari ya Bibilia? Nne. Mukaleloya onfanyeela muyana omaga musorho agalobelaga obe agasunzihaga onothiyana.
Mikalelodha. Mazu a Paulo anlagiha mikalelo mili, obe dhipaddi biili dha mabasa—murala na mulogo. Iyene onologa: “Mulobwana ddi munddimuwa wa mwadhye; . . . vano muyana ohimmaga omusorho alobelaga obe alaleyaga nzu na Mulugu, onomveyiha mamune.” (Maversikulu 3, 5) Va muralani, mamuni ddisakuliwe na Yehova okala musorho wa muyana. Muyana agahinonelemo musogorhelo wa mamunayeya, ononvaha manyazo mamunayeya agakosaga mabasa athomeliwe mulobwana na Yehova. Motagiha, egafuneya wila muyana eeddihe nsunzo na Bibilia vamentoni va mamunayeya, muyanaya agahinonelamo musogorhelo wa mamunayeya modheela omaga musorho. Muyana onkosa ejene peno akala mulobwanaya ohibatiziwa obe kabatiziwe, vowila ddi mulobwana oli musorho wa murala. * Kowiliwa iyene onfuna alobele obe asunzihe vamentoni va mwanaye muñgono wa mulobwana obatiziwe, iyene agahifanyeela omaga musorho, kayo wila mwanayeya wa mulobwana ddi musorho wa murala, mbwenye sabwa ya mpaddo onvahiwa mulobwana obatiziwe mmulogoni mwa Okristu.
Paulo onologa mukalelo wa mulogo, alogaga: “Akala mwina onofunavi opambiha makani aba, aziwe wi nne iyo, nne mitugumano dha Mulugu, kaninna mweddelo mwina.” (Versikulu 16) Mmulogoni mwa Okristu, anvahiwa mabasa a osogorhela ba alobwana abatiziwe. (1 Timóteo 2:11-14; Ahebreu 13:17) Ba alobwana bahi anthomiwa okala anddimuwa a mmulogoni vina adhari orumeelela na mabasa avahiwani na Mulugu wila atanaale nikuru na Mulugu. (Merelo 20:28) Mudhidhi na mudhidhi, txibarene modheela mikalelodha podi ofuna wila muyana wa Mukristu akumbirhiwe okosa mabasa anfanyeela okosiwa na mulobwana wofanyeela obatiziwe. Motagiha, txino enofuneya muyana weeddiha mutugumano wa mabasa a olaleya sabwani kavali mulobwana wofanyeela. Obe muyana txino onoweeddiha nsunzo na Bibilia nimalileye olagana na mulobwana obatiziwe. * Sabwa yawila mabasa aba anokosa epaddi ya mweeddelo wa mulogo wa Okristu, muyanaya onofanyeela omaga musorho wila anonelemo yawila muyana oddu, onkosa nibasa ninthomeliwaga alobwana.
Mpaddi mwina, dhilobo dhinji dha webedha kadhininfunana murogori omaga musorho. Motagiha, iyene kammageleliwa omaga musorho agakulaga mmatugumanoni a Okristu, mmabasani a olaleya numba na numba na mamunaye obe mulobwana mwina obatiziwe, obe agalobelaga vina agasunzaga na anaye añgono ahibatiziwe. Txibarene, mavuzo mena podi otatamuwa, nanda akala murogoriya kanziwa deretu enfanyeeliye okosa, onofanyeela opepesagavi. * Akala kankaanavi ebaribari enfanyeeliye okosa nanda akala mobuwelo aye anomuthukulela okosa dhawene, omaga musorho kugakalile yabure, ninga munlagihedhiwani va fotoni apa.
Yofunaya. Va versikuluni 10, ninofanyavo sabwa biili dhinfanyeelela muyana wa Mukristu omaga musorho: “Mwaha wa wariha anju, muyana eeke omusorho ezinddiyelo.” Voroma, koona nzuna, “mwaha wa wariha.” Omaga musorho obu mukalelo wa muyana olagiha wila onoziwa mpaddo onvahile Yehova mulobwana obatiziwe mmulogoni. Vina, iyene onolagiha omukwela vina omuroromela Yehova Mulugu. Sabwa yanawili enfanyeya mmazuni aba awila ‘sabwa ya anju.’ Muyana ompakela dhavi dhothanddiwa esi dha omuyani dha guru vaddiddi modheela omaga musorho?
Anju anofuna woona wila mpaddo wa Mulugu onoziwiwa modheela nikuru na Yehova, odhulu vina velaboni ya vati. Awene vina anopuramo dhotagiha dha athu oohakwana na sabwa eji. Vadhulu va dhotene, awene vina anofanyeela okala owiwelela musasanyedho wa Mulugu—onamoona wawila muthengo wowinjivelavo wa anju ohivirigana mmasakani avirile. (Juda 6) Dhaene, anju podi woona dhotagiha muyana wa Mukristu agakaana malago vaddiddi, eziwelo enddimuwa, vina zelu enddimuwa opitha mulobwana obatiziwe oli mmulogoni; masiki dhaene, iyene onolagiha wiwelela onddimuwa wa mulobwana. Mudhidhi mwina, muyanaya Mukristu wothikitheliwa oddwene onakale mmodha mwa abale analamulele na Kristu. Muyana oddu onela okaana mabasa a mpaddo munddimuwa vaddiddi mpaka wapitha anju vina olamulela na Kristu odhulu. Eji yotagiha yaderetu vaddiddi enfanyeela woona anju ovanene! Txibarene, arogori otene ahikaana gari ya olagiha wiwelela woviyeviha modheela mweeddelo wawa wororomeleya vina woviyeviha vamentoni va anju oororomeleya matxikwi na matxikwi!
^ par. 3 Muteliwi wa Mukristu kagalobeli na lizu nowiweya vamentoni va mamunaye wa Mukristu s’ohikala mmukaleloni worutxa, ninga akala mamunayeya kanwodha ologa sabwa ya okala muredda.
^ par. 1 Murogora kanfanyeela omaga musorho ageddihaga nsunzo akala oli na namalaleya wa mulobwana ohili mamune vina ohibatiziwe.
^ par. 2 Wila okaane muselu mwina, koona Mwang’aneli, 15 ya Feverero 2015, nikuku 30; 15 ya Julyu 2002, makuku 26-27; 15 ya Agosto 1977 makuku 509-512 (wa ezugu).
