Olejela bandera. Anamoona a Yehova anorumeela yawila okokorela obe olejela bandera, wili-wili onkosiwa na hino nacional, oku webedha okwene onloga ovuneya, kayo ovuniwa na Mulugu, mbwenye ovuniwa na Estado obe na asogorheliya. (Izaiya 43:11; 1 Korinto 10:14; 1 Joau 5:21) Musogorheli ninga oddu wali Mwene Nabukoddonozori wa Babilonia wa wale. Wila aatikinihena athu na onddimuwa waye vina guru yaye ya onyarelijiau, mulamuleli oddu munddimuwa wahimetxa nladdaniho nddimuwa venevo balibiha alamuleliwi aye wila akokorele oku jibo ninga hino nacional bigeebiwa. Txibarene, Ahebreu araru—Sadraki, Mezaki na Abedinego—aahikoodda okokorela nladdanihona, masiki na osothothiwana okwa.—Daniyel, kapitulu 3.

Masiku abano, namaleba mapadduwo Carlton Hayes olebile wila “ezinddiyelo ya onyelabo ya nroromelo vina elobo ya makamakaya ya webedha thi bandera. Alobwana anowarula atxapewawa bandera nigaviraga; nanda wila athithimihe bandera anamaleba, anoleba poema nanda aima anowiba jibo enimuthithimiha muthu.” Iyene ohenjedhavo yawila onyelabo vina ohikaana “masikuya a feriado,” ninga 4 ya Julho  elabo ya Estados Unidos, ninga vina “akoddeliya vamodha na apemberhiya (heróis)” vina “miparhadha,” obe dhibuwa dhokoddela. Alogaga mwambo wa vathaddo wa o Brazil, kazembe murumiwi wa anyakoddo ohirumeela: “Bandera ninorhemeziwa vina ninowebedhiwa . . . na mukalelo onebedhiwa Mwene.” Indde, nivuru Encyclopedia Americana nahilogaga: “Bandera, ninga vina mwigimanyo, sokoddela.”

Nivuru nthi encyclopedia nimalile ologiwa, ovanenevi nihiloga yawila hino nacional obu ‘mulagiho wa onyelabo nanda wili-wili enotaganyiheya na osembezerha musogorhelo wa Mulugu vina nibarelo na nlogo obe alamuleliya.’ Adhari a Yehova kayo wila kanna etanaalelo, txibarene, anoona ninga webedha myambo dha onyelabo dhintaganyiheya na olejela bandera vina hino nacional. Txibarene, alogagamo okoodda wa ana a Anamoona a Yehova olejela bandera obe olibelela ororomeleya onyelabo mu dhiskola dha elabo ya Estados Unidos, nivuru The American Character nihiloga: “Yawila myambo esi dha kadda siku sa relijiau ehikoseliwa onamoona na Suprema Corte mmithegoni.”

Oku akooddaga okamihedha myambo esene dhinoonani wila kayo dha Mmaleboni, nlogo na Yehova txibarene ninoriha oderetu wa athu ena okosa enfunani. Awene vina anoriha mabandera a dhilabo vina dhizinddiyelodha nanda anoziwelamo malamulo a guvernoya ninga ‘othomeliwe othonga elabo’ alabaga ninga ‘athomiwe na Mulugu.’ (Roma 13:1-4) Vina, Anamoona a Yehova anowiwelela nlago na walobelelaga ‘amwene vamodha na otene ana mpaddo.’ Efunelo yehu, txibarene, “[ja] wi niwodhe okalawo n’ofwasa, nijagavo murenddele, nimuthithimihaga Mulugu, neddagana ekalelo yofwanyelela.”—1 Timóteo 2:2.

Otonya mmasakuloni a politika. Akristu a ebaribari anoriha oderetu wa athu ena otonya. Awene kankosela mbigiddi osakula, nanda anowawiwelela abale asakuliwe. Na dhaenevi, awene anovikoma wila ahikose epaddi mwa dhilobo dha politika ya elabo. (Mateu 22:21; 1 Pedru 3:16) Txini enfanyeela okosa Mukristu mu dhilabo mummageleliwa athu odhowa otonya obe agafanyiwa owali onkoseliwa abale ahindowa wumburoni wa otonya? Obuwelaga wila Sadraki, Mezaki na  Abedinego ahidhowa mmuretheni mwa Dura, Mukristu oli mutxiddo mwa mikalelo dhakakene, podi odhowa wumburoni wa otonya akala mubuwelo waye onomurumeela odhowa. Mbwenye akale pasope wila ahitwe ohikosa mpaddi wa politika. Iyene onofanyeela wubuwela magano matanu na nimodha andawo:

1. Anamafara a Yezu ‘kankosa epaddi ya elabo.’—Joau 15:19.

2. Akristu animwimelela Kristu vamodha na Omwene waye.—Joau 18:36; 2 Korinto 5:20.

3. Mulogo wa Okristu onowiwanana mu nroromeloni, nanda athuyamo ali mumodhani na okwela wa Okristu.—1 Korinto 1:10; Kolosi 3:14.

4. Abale animusakula mwimeleli anokamihedha ejile enkosiye.—Koona nigano nili mmazuni alebiwe va 1 Samuwel 8:5, 10-18 na 1 Timóteo 5:22.

5. Yehova wahoona efunelo ya Izrayel na mwaha wa mwene wowooneya na mento ninga ezinddiyelo yawila aahimukoodda Mulugu.—1 Samuwel 8:7.

6. Akristu anofanyeela okaana ofuru wa ologa agalogaga na athu anrumeela politika mowiwanana nlamulelo na Omwene wa Mulugu.—Mateu 24:14; 28:19, 20; Ahebreu 10:35.

Mabasa a apaizano. Mu dhilabo dhiina, estado enfuna wila oddule onkoodda mabasa a onyakoddo akose mabasa a apaizano mwari mwa mudhidhi onthomiwa. Nigagumana na osakula oku, ninofanyeela olobelela mwahaya, txino vina ninofanyeela osekeserha na Mukristu mukwehu wowarala, venevo banisakula mowiwanana na mubuwelo wehu wosunzihiwa.—Gano dh’olelana 2:1-5; Filipi 4:5.

Nzu na Mulugu ninonipanga wila ‘nakurumuwelege anddimuwa a elabo na anameeddihaya, arumeelege, ahirutxiwege othidda mabasa etene apama, nikale ofwaseya.’ (Tito 3:1, 2) Na eji mmubuweloni, ninofanyeela ovivuza mavuzo aba: ‘Orumeela mabasa aba a apaizano atonyiwe onela oviriganiha Okristu waga wa ohikosa mpaddi wa politika obe onodditotela ovolowa mu relijiauni ya othambi?’ (Mikeya 4:3, 5;  2 Korinto 6:16, 17) ‘Okosa mabasa aba ogahiddirutxiha okosa mabasa a Okristu obe vina oddikathamiha osoriha mabasaya a Okristu?’ (Mateu 28:19, 20; Éfeso 6:4; Ahebreu 10:24, 25) ‘Mpaddi mwina, okosa mabasa aba onotaganyiheya na ddima ejene egaddirumeeli omwadha mabasa aga, txino okamihedha mmabasani a mudhidhi wotene?’—Ahebreu 6:11, 12.

Na mubuwelo waderetu akala Mukristu onosakula okosa mabasa aba a apaizano othiya ofugeliwa mu kambura, Akristu akwaye anofanyeela oriha ejile esakulileye. (Roma 14:10) Nanda akala onoona wila kanfanyeela okosa mabasa aba, Akristu akwaye vina anofanyeela oriha yimelelo eji.—1 Korinto 10:29; 2 Korinto 1:24.