Yehova * Mulugu ohita matelo oroma. Bibilia ononipanga wi iyene omuttandda muyana woroma vina “omperhekela mulobwanayá.” Adamu wahagalala vaddiddi ofiyedha ologa: “Oddu txibarene nigogoddo na magogoddo aga vina nama ya namaga.” (Wita 2:22, 23) Yehova onofunavi wi atelani agalale.

Weyo ogatela, txino weyo poddi wubuwela wi dhetene dhigeedda moligana. Noona, mwebaribari, masiki akala muteli na muteliwi anokwelana muttu na mukwaye anojeedha wi anele ofanya makattamiho. (1 Akadda Korinto 7:28) Mwari mwa brochura ntti, weyo onele ofanyamo magano a Bibilia, nanda agalabihedhiwa, anowuvaha wagalala mmateloni awo vamodha na muralaya.—Masalmo 19:8-11.

TXINI ENLOGA BIBILIA: Mamuni bu musorho wa ntakulu.—Akadda Éfeso 5:23.

Akala weyo wamulobwana otelile, Yehova onjeedha wi weyo omweddihe mwadhiyo na nrhemezo. (1 Pedro 3:7) Iyene omukosile wi akale mukamihedhi wawo onfuna wi weyo omweddihe na nrhemezo vina nokwela. (Wita 2:18) Weyo onofanyeela omukwela venjene mwadhiyo ofiyedha weka dhifunelo dhaye vadhulu opitta dhawo wamwinya.—Akadda Éfeso 5:25-29.

Akala weyo wamwiyana oteliwe, Yehova onjeedha wi omurihe mamunawo na murima wotene vina omukamihedhe wi akwanihedhe mpaddi waye. (1 Akadda Korinto 11:3; Akadda Éfeso 5:33) Omukamihedhe na dhosakula dhaye vina omwiwelele na murima wotene. (Akadda Kolosi 3:18) Akala onokosa dhawene, weyo onele okala wokoddela vaddiddi vamentoni va mamunawo vamodha na Yehova.—1 Pedro 3:1-6.

TXINI ENFANYEELA WEYO OKOSA:

• Kanvuze mwadhiyo obe mamunawo elobo enfanyeela weyo okosa wi okale mamuni obe muyana waderetu. Kanvuruwane na okurumuwa, vina okose ejile onwodha wi dhilobodha dhikale mbwenye-mbwenye

• Kakala muttu wovilela. Onele ovira mudhidhi mwinji muhinatti osunza mukalelo wa wagalalihana muttu na mukwaye

TXINI ENLOGA BIBILIA: Onofanyeela ozuzumela dhifunelo dha mwadhiyo obe mamunawo. (Akadda Filipi 2:3, 4) Kamweddihe mwadhiyo obe mamunawo ninga elobo ya ttima, wubuwelaga wi Yehova onjeedha wi mwimeleli waye akale “woleleya oneedda na attu otene.” (2 Timóteo 2:24) ‘Makani ohitanaaleliwa anosuva ankala ninga supadda, mbwenye nlumi na muziwi murobwe.’ Noona kasakula mazu awo nofwaseya. (Gano dh’olelana 12:18) Muya wa Yehova onele wukamihedha ologa na nriho vina na okwela.—Akadda Galásia 5:22, 23; Akadda Kolosi 4:6.

TXINI ENFANYEELA WEYO OKOSA:

• Kalobela wi owodhe okalavi wofwaseya vina kafugula mubuwelo wawo ohinatti otanaalela makani a makamaka na mwadhiyo obe mamunawo

• Na okurumuwa kobuwela dhologa dhawo vina makaleloya analoge weyo

TXINI ENLOGA BIBILIA: Weyo ogatela, venevo onokala ‘nningo nimodha’ na mwadhiyo obe mamunawo. (Mateu 19:5) Mbwenye muli attu eli venevo txino munokaana dhosakula dhottiyana. Noona munofanyeela osunza wiwananiha dhubuwelo dhenyu. (Akadda Filipi 2:2) Wiwanana elobo yamakamaka mugakosaga dhosakula dhenyu. Bibilia onloga wi: ‘Modheela wiwanana, dhofuna dhenyu dhinele weedda pama.’ (Gano dh’olelana 20:18) Kattiyani wi gano dha Bibilia dhuweddiheni mudhidhi onkosinyu dhosakula dha makamaka bamuli motene.—Gano dh’olelana 8:32, 33.

TXINI ENFANYEELA WEYO OKOSA:

• Mugawelane na mwadhiyo obe mamunawo kahiyo miselu obe dhosakula, mbwenye vina dhubuwelo dhenyu

• Orome omwiwa mwadhiyo obe mamunawo ohinatti okosa nlagano na muttu mwina