Ninga musunzile weyo mbrochurani mpu, Bibilia ohikaana malago menjene anawukamihedhe weyo na murala wawo. Yehova onfuna wi weyo okale wowagalala. Iyene onowuroromeliha wi ogeka webedha waye vanburoni voroma, ‘dhinagu dhetene dhinowenjedhedhiwavo.’ (Mateu 6:33) Iyene onofuna vaddiddi wi okale marho waye. Kalabihedha mudhidhi wotene wi wunuwihe omarho wawo na Mulugu. Eji gari enddimuwa vaddiddi ena muttu.—Mateu 22:37, 38.

TXINI ENLOGA BIBILIA: “‘Ddinere okala babinyu, nyuwo alobwana na ayana munokala anaga, onloga ddi nabuya wa guru dhotene.” (2 Akadda Korinto 6:18) Mulugu onfuna wi weyo okale mukwaye wofiyedheya. Olobela mukalelo mmodha wa okosa ejuwene. Yehova onowuwoba wi ‘olobele s’olema.’ (1 Akadda Tesalónika 5:17) Iyene ohikaana efunelo ya ovuruwana dhubuwelo dhawo dha vawoka vamodha na dhifunelo. (Akadda Filipi 4:6) Akala weyo onolobela na anamudhi awo, awene anele woona mukalelo oli Mulugu ninga mukwawo.

Mowenjedhedha mwa ologa na Mulugu, weyo vina onofanyeela onvuruwana iyene. Weyo poddi okosa ejuwene modheela osunza nzu naye vina manivuru andela Mbibiliani. (Masalmo 1:1, 2) Katanaalela ensunza weyo. (Masalmo 77:11, 12) Woona matugumano a Okristu anotonyihedha vina wi weyo ononvuruwana Mulugu.—Masalmo 122:1-4.

Ologa mwaha wa Yehova na attu eena dila yina yamakamaka enlibiha omarho wawo na iyene. Venevo vandhowa weyo bugakosa esuwene, weyo onelege ovoona vakuvi vaye.—Mateu 28:19, 20.

TXINI ENFANYEELA WEYO OKOSA:

• Katamela mudhidhi wa kadda labo wi omwengese Bibilia vina olobele

• Ninga anamudhi, mweke vamburoni woroma mabasa a omuyani ottiya mavego na ovipwaza

TXINI ENLOGA BIBILIA: “Mmususele Mulugu, iyene onowususelani.” (Tiago 4:8) Weyo onofanyeela ofarihedha porograma ya webedha ya anamudhi malabo otene. (Wita 18:19) Mbwenye dhihikalawo dhilobo dhinji dhofuneya. Mulugu onofanyeela okosa epaddi ya egumi yawo vamuralani siku-siku. Kalibiha wandana wa murala wawo na Mulugu modheela ologa mwaha wa iyene “mufwaseyelagavi mmawani mwenyu, peno mweeddaga, peno mugunantigi, peno muvenyaga.” (Olibiha 6:6, 7) Kakosa eji ninga yofuna yawo ninga mukoseli Josuwé, ologile: ‘Miyo na amudhaga, ninomulabavi Yehova.’—Josuwé 24:15.

TXINI ENFANYEELA WEYO OKOSA:

• Onofanyeela okaana programa yodhowavi ya mashagiho modheela efunelo ya muttu-muttu wa anamudhi awo