Txini enkosa weyo ogattiddiwa wova?— Txino weyo onottamagela oli babo obe mayo wi awukamihedhe. Mbwenye ohikalawo muttu mwina onwodha wukamihedha weyo vina. Odduwene ohikaana guru vaddiddi opitta muttu mwina. Weyo onomuziwa muttuya oddo?— Indde, ddi Yehova Mulugu. Ndoweni niloge modheela muzombwe onlogiwa mbibiliani na nzina na David. Iyene wanziwa wi Yehova agamukamihedha, noona iyene koova.

Oromana nsaka nttile David valiye mwana mug’ono, ababi aye ahimusunziha omukwela Yehova. Ejo yahimukamihedha David okala wohova mudhidhi wampadduwela dhilobo dhowopiya. Iyene wanziwa wi Yehova wali Mukwaye vina Iyene agamukamihedha. Mudhidhi dhahi, David bagasapiha mabila, poddogoma munddimuwa wahinfiyedha nanda wattidda nibila nimodha na mwano mwaye! Weyo onoziwa yakosile David? Iyene wahinfara poddogomaya vina wahifiyedha ompa na mada aye! Mudhidhi mwina wattiddile nikurukumwa nibila naye, David wahifiyedha opa vina! Weyo onubuwela wi bani wamukamihedhe David?— Indde, wali Yehova.

Wakalawo mudhidhi mwina wali David na oliba murima. Ana Izrayel ela owana na nlogo natxemerhiwa Afilistia. Munyakoddo mmodha wa Afilistia wali mulobwana wolapa, wolapa vaddiddi, mukango! Nzina naye wali Golias. Mukango oddu wanabedda anyakoddo a Wizrayeli vina a Yehova. Golias wankosa mavurhano na anyakoddo a Wizrayeli wi adhe awane na iyene. Mbwenye akadda Izrayeli otene anova owana na iyene. Mudhidhi wewale David ejoya, iyene wamwaddela Golias: ‘Miyo ddinele owana na weyo! Yehova onele oddikamihedha, vina miyo ddinele owupemberha!’ Weyo kunubuwela wi David muttu woliba murima?— Indde, woliba murima vaddiddi. Weyo onofuna oziwa yapadduwile musogorhomwa?

David wahittukula fijiga vina wahiddodda myarha mig’ono mitanu dhoburhunga, nanda badhowa owana na mukango. Golias vamooniliye wi David wali muzombwe vaddiddi, iyene wahimuteya David. Mbwenye David wamwaddela: ‘Weyo onddidhelana supadda, mbwenye miyo ddinuwufiyedha na nzina na Yehova!’ Mwadhahene iyene wahéla mwarha nfijigani, battamegela wali Golias, bamukasulela.  Mwarhaya wahinfanya Golias vakoveni! Mukango bagwela vati, wokwene! Akadda Filistia ahittiddiwa wova vina ahittawa otene. Muzombwe ninga David owodhile dhavi ompemberha mukango?— Yehova ddumukamihedhe iyene, vina Yehova wali waguru vaddiddi okwaranya mukango ole!

Weyo onsunza eni mwa nipadduwo na David?— Yehova ddwa guru dhinddimuwa dhokwaranya muttu mwina. Vina iyene ddi Mukwawo. Noona mudhidhi onattiddiwe weyo wova, wubuwele, Yehova onowodha oukamihedha weyo okala wa oliba murima!