Ndowe nisunze mwaha wa muzombwe ovunile egumi ya titiyu waye. Muzombwe oddu titiyu waye wali murumiwi Paulo. Iyo kaninziwa nzina na muzombwe oddu, mbwenye iyo ninoziwa wi ekosile iyene elobo yolibiha murima. Ogahiziveliwa oziwa ekosile iyene?—

Paulo wali mukambura Ojeruzalemi. Iyene wahifugeliwa sabwa ya wi wela olaleya mwaha wa Yehova. Munddimuwa wa anyakoddo wahilamula omuruma Paulo sidadi yina, yatxemerhiwa Sezarea. Attu eena abure afuna ampe Paulo, na dhahene ahikosa masasanyedho otabala. Awene adhowa ovitala rampa yadhowa o Sezarea. Paulo koovirawo na anyakoddo, alobwana abale atabala agayimuttidda!

Labo nimodha Paulo ahinatti odhowa o Sezarea, mwana wa murogora wa Paulo wahiwa masasanyedho abale a attu abure. Txini egakosile iyene? Iyene wahidhowa mukambura mwali Paulo bamwaddela dhigapadduwile. Momaguva, Paulo wahimwaddela wi ampange munddimuwa wa anyakoddo odheela wa masasanyedho abale abure. Weyo onubuwela wi kayali yorutxa mwana wa murogora wa Paulo ologa na munddimuwa wa anyakoddo?— Nne, sabwa yawi munddimuwa wa anyakoddo wali muttu wa makamaka. Mbwenye mwana wa murogora wa Paulo wali woliba murima nanda wahiloga na munddimuwa wa anyakoddo.

Munddimuwaya wa anyakoddo wahiziwa yokosa. Iyene wahagumaniha anyakoddo owakwana 500 wi ambarele Paulo! Wahawaddela wi omattiyu obule anvelele Paulo o Sezarea. Koddi Paulo wahifiya deretu?— Indde, alobwana abale atabala kawodhile omuttidda! Yogana yawa ya otabala kiyalabile, egumi ya Paulo yahivuneya.

Weyo onsunzavo eni na nipadduwo ntti?— Weyo vina podi oliba murima ninga mwana wa murogora wa Paulo. Iyo ninofanyeela oliba murima nigalogaga na attu eena odheela wa miselu dha Yehova. Weyo onele okala woliba murima vina onele odhowavi bugaloga miselu dha Yehova?— Weyo ogakosa dhawene, onele ovuna egumi ya muttu mwina.