Ndowe nubuwele ninga nili mukwatti wa Jeriko. Kwatti eji eli elabo ya o Kana, wenewo oli attu ahinimuroromela Yehova. Muyana ontxemerhiwa Raabe onkala mwenemwa.

Raabe valiye namwali mug’ono, iyene wahiwa mapadduwo a mukalelo wagwaddile Mizé Mwinje Wofila vina wahasogorhela ana Izrayeli ofiyedha obudduwa Wijipito. Iyene vina wahivuruwana mukalelo wakamihedhilena Yehova awene ofiyedha opemberha koddo dhotene dhaaraba awene na amwiddani awa. Ovano iyene onowiwa wi ana Izrayeli ahimaga misasa dhawa vakuvi va Jeriko!

Otxiguwo omodha, ana Izrayeli eeli anodhowa mukwatti mwa Jeriko wi areze. Awene ahifiya vatakulu va Raabe. Iyene ohawobela wi avolowe vina akale venevo. Omattiyuni, mwene wa Jeriko onoziwa wi anamareza ali mukwatti vina awene adhowile vatakulu va Raabe. Mwa dhawene mwene onowaruma alobwana wi adhowe aattidde. Raabe onowavita anamareza abale eli vamutompini va numba yaye vina onowawaddela alobwana a mwene: ‘Anamareza aali veneva, mbwenye awene ahittiya kwatti ejino. Akala nyuwo munodhowa ovanene, munele wattidda!’ Weyo onoziwa sabwaya enabarela Raabe anamareza aba?— Sabwaya jawi onomukuluvela Yehova vina ohiziwa wi elabo ya Kana enele ovahiwa ana Izrayeli.

Anamareza ahinatti ottiya numba ya Raabe, awene anomuroromeliha wi iyene vamodha na anamudhi aye anele ovuniwa Jeriko agatolotxiwaga. Weyo onoziwa enlogani wi akose?— Awene anologa: ‘Kattukula kabala eji yofila, vina omagelele vajanelani vawo. Ogakosa ejuwene, otene ali vatakulu vawo anele ovuneya.’ Raabe onokosa mowakwana esile dhimwaddelile anamareza. Weyo onoziwa empadduwa musogorhomwa?—

Malabo meena osogoro, ana Izrayeli anoweedda awereweraga kwatti yotene omaalene. Malabo matanu na nimodha anowerewera kwatti, dila mmodha kadda labo. Mbwenye siku nanotanu na wili, awene anowerewera kwatti yotene dila tanu na bili. Mumalelani awene otene anokuwa na lizu noliba. Yehova  onogujula marhinga a mukwatti. Mbwenye numba ena kabala yofila emageleliwe otakulu wa janela elivi yowimelene! Weyo onowodha woona ejoya vafotoni?— Raabe vamodha na amudhaye ahivuneya!

Txini ensunzavo weyo modheela Raabe?— Raabe wahikaana nroromelo wa Yehova sabwa ya dhilobo dhotene dhotikiniha dhisunziliye. Weyo vina onosunza dhilobo dhinji dhotikiniha modheela Yehova. Weyo okaana nroromelo ninga naana Raabe?— Iyo ninoziwa wi onorumeela!