Rebeka wali muyana wamukwela Yehova. Nzina na mamunaye wali Izaki. Iyene vina wannimukwela Yehova. Rebeka wamuziwile dhavi Izaki? Iyene walagihile dhavi wi wanfuna omwagalaliha Yehova? Ndoweni nisunze modheela iyene.

Ababi a Izaki aali Abramu na Sara. Awene akala elabo ya Kana, attu a wenewale kamwebedha Yehova. Mbwenye Abramu wafuna wi mwanaye amutele muyana wamulabela Yehova. Noona iyene wahimuruma mwimeleli waye, txino Eliezer, wi anvede muyana wi Izaki amutele wego watxemerhiwa Hara, wenewale wakala anamudhi eena a Abramu.

Eliezer wahimaga oleddo vamodha na emeleli eena a Abramu. Oku wali oleddo wolapela vaddiddi. Awene ahidhowana akamelo kumi attukulile dhoja vina dhovaha dhina. Eliezer agamuziwile dhavi muyana wanfanyeelela Izaki? Eliezer vamodha na emeleli eena vafiyilani o Hara, awene ahimela vatxelani sabwani Eliezer wahiziwa wi attu agahidheela oruga manje. Iyene wahilobela wa Yehova vina wahiloga: ‘Akala miyo ddinomukumbirha namwali wi addivahe manje vina iyene addivaha miyo vamodha na akamelo aga, venevo miyo ddinele oziwa wi oddu ddi muyana omusakulile nyuwo.’

 Vamalelani muzombwe Rebeka wahidha vatxelani. Bibilia onologa wi iyene wali wokoddela vaddiddi. Eliezer wahimukumbirha iyene manje wi amwe vina iyene wahiloga: ‘Txibarene. Miyo ddinele wuvaha manje, vina miyo ddinele odhana meena a akamelo awo.’ Kobuwela! Akamelo agapiwa nttona anomwa manje vaddiddi, noona Rebeka wandhowa vina bageyela adhagana manje dila dhinjidhene. Weyo onowona vafotoni guru enddimuwa enkosa iyene?— Eliezer wahikala wotikina sabwa ya woona mukalelo wakulile Yehova nlobelo naye.

Eliezer wahinvaha Rebeka nvaho wokoddela vaddiddi. Iyene wahimuwobela Eliezer vamodha na amwimeleli eena vatakulu va anamudhi aye. Eliezer wahitapulela sabwa yamurumile Abrahamu wenewale vina mukalelo wakulile Yehova nlobelo naye. Anamudhi a Rebeka awagalala mwa omuttiya wi akale mwadhi wa Izaki.

Mbwenye weyo onubuwela wi Rebeka wafuna oteliwa na Izaki?— Rebeka wahiziwa yawi wali Yehova wamurumile Eliezer wenewale. Anamudhi a Rebeka ahinvuza akala iyene agahifuna odhowa o Kana vina wi akale mwadhi wa Izaki, iyene wahakula: ‘Indde, Miyo ddinofuna odhowa.’ Momaguva, iyene wahidhowa na Eliezer. Vafiyilani o Kana, iyene wahiteliwa na Izaki.

Sabwa ya Rebeka okosa yamurumile Yehova wi akose, Yehova wahimureliha iyene. Vyaka dhinji dha musogorho, Yezu obaaliwe modheela ziza naye! Weyo ogakala ninga Rebeka vina omwagalaliha Yehova, weyo onele orelihiwa na iyene.