Oromana nsaka nttile Samuwel valiye muzombwe, iyene wakala vina walaba mutabernakulu, mburo wadha attu wi amwebedhe Yehova. Weyo onoziwa mikalelo dhimukosihile Samuwel ofiyedha okala mutabernakulu? Ndowe nisunze vamaromo modheela mai wa Samuwel, Ana.

Mwari mwa mudhidhi mwinjene, Ana wanunlela okaana mwana, mbwenye iyene kawodha okaanawa. Noona iyene wahilobela wa Yehova vina wahimukumbirha wi amukamihedhe. Iyene wahilibela wi kokaana mwana, agahinvaha iyene wi akalege vina alabege mutabernakulu. Yehova wahakula nlobelo naye, vina iyene wahifiyedha okaana mwana. Wahinvaha nzina na Samuwel. Mwa dhawene ninga mwalibelile Ana, Samuwel vaniyena vyaka ttaru obe nai, iyene wahimudhowana mutabernakulu wi amulabelege Mulugu mwenemwale.

Eli wali namakutta munddimuwa wa mutabernakulu. Anaye eeli vina alaba mwenemwale. Kobuwela, tabernakulu yali numba ya omulabelamo Mulugu, mwadhahene yanjeedheliwa wi attu akosege dhilobo dhofanyeela mwenemwale. Mbwenye aima a Eli akosa dhilobo dhabure. Samuwel wahoona esile dhakosa awene. Koddi Samuwel ohikosa dhilobo dhabure ninga dhakosa aima a Eli?— Nne, iyene wahidhowa bagakosa esile dhali dhaderetu, dhawene ninga mwasunzihiwe iyene okosa na ababi aye.

Weyo onubuwela wi Eli agakosile eni na anaye eeli?— Iyene agahasosotta awene. Kagattiyile wi awene alabegevi vanumbani ya Mulugu. Mbwenye Eli kakosile ejuwene, noona Yehova wahinyoonyeya na iyene vamodha na aima aba eeli. Yehova wahilibela wasottotta.

Omattiyu dhahi Samuwel bagagona, iyene wahimwiwa muttu bagamukuwela: ‘Samuwel!’ Iyene wahittamagela wali Eli, mbwenye Eli wahiloga: ‘Miyo kaddukuwele.’  Ejoya yahipadduwa dila bili. Vamalile dila yaneeraru, Eli wahiloga na Samuwel wi akala onowiwa dila yina, weyo onofanyeela ologa: ‘Ddinowukumbirha, Yehova, kaloga, miyo ddinowiwa.’ Noona jijuwene ekosile Samuwel. Noona Yehova wahiloga na Samuwel: ‘Kamwaddele Eli wi miyo ddinele wasottotta amudhaye sabwa ya dhilobo dhabure dhinkosa awene.’ Weyo onubuwela wi yali yohirutxa Samuwel ologa muselu ninga obuwene na Eli?— Nne, ejo kayali. Mbwenye masiki Samuwel valiye wawova, iyene wahikosa ejile yamurumile Yehova wi akose. Ejile yalogile Yehova epadduwa. Aima eeli a Eli ahipiwa, Eli vina ohikwa.

Samuwel yotagiha yaderetu wa iyo. Iyene wahikosa yali yaderetu Masiki vawoniye attu eena akosaga dhabure. Kito weyo? Weyo onele okala ninga Samuwel vina onelege okosa dholigana? Akala weyo onokosa, onele wahagalaliha ababi awo vamodha na Yehova.