Johirutxa mudhidhi mwinji wawiwelela ababi awo?— Mudhidhi mwina jorutxa. Weyo wahiziwa wi Yezu wannimwiwelela Yehova na ababi aye?— Yotagiha yaye enele wukamihedha wawiwelela ababi awo masiki egakala yorutxa. Ndowe nisunze modheela eji.

Yezu ahinatti odha mwilaboni, iyene wali na Babi waye, Yehova, wirimu. Mbwenye Yezu wahikaana anamudhi velaboni yavati. Mazina awa aali Zuze na Maria. Weyo onoziwa na mukalelo gani wali awene ababi aye?—

Yehova wahittukula egumi ya Yezu wirimu beka mbani mwa Maria wi Yezu abaaliwe velaboni ya vati. Ejo yali ntikiniho! Yezu ohunuwa mbani mwa Maria dhahene ninga mununuwela aima eena mbani mwa amamayawa. Mwa meri mitanu na minai, Yezu wahibaaliwa. Obu bu mukalelo okalile Maria na mamune, Zuze, ababi a Yezu apano velaboni ya vati.

Yezu vaniyena vyaka 12 dhobaaliwana, iyene wahikosa elobo yalagihile okwela waye wa Babe, Yehova. Ejo epadduwile mudhidhi wali Yezu na anamudhi aye akosaga oleddo onddimuwa mpaka o Jeruzalemi oja mattanga a Paskwa. Mudila eyelelaga vatakulu, Yezu waharimeela ababi aye Zuze na Maria. Weyo onoziwa wali iyene?—

Zuze na Maria ahiyelela momaguva Ojeruzalemi anvedaga mburo wotene. Awene ahizuzuma sabwa yawi kanfanyile. Mbwenye muvirile malabo mararu, ahinfanya munumbani ya Mulugu! Weyo onoziwa sabwaya yakalile Yezu mumparhani mwa Mulugu?— Sabwaya jawi iyene wanziveliwa osunza modheela Babi waye, Yehova. Iyene wannimukwela vina wanfuna osunza omuziveliha iyene. Yezu mudhidhi wotene wannimwiwelela Yehova, masiki ekalaga yorutxa iyene omwiwelela. Txino Yezu wahimwiwelela vina Zuze na Maria?— Indde, Bibilia onologa wi iyene wahawiwelela.

Weyo onsunzavo eni mwa yotonyihedha ya Yezu?— Weyo onofanyeela wawiwelela ababi awo, masiki egakala yorutxa. Onele okosa ejo?—