1. Dhilemelelo gani dhinfwara alobwana ena wi eddihena murala wawa?

MAZU aba “onddimuwa” obe osogorhela antapulela eni mwa weyo? Alobwana ena anfara dhilemelelo, yeddelo, obe mukalelo oleliwani na amambali awa, wila amweddihena mwadhiye, anaye obe asogorhelena murala waye. Katanalela yotagiha ya murogora Yanita, onkala elobo ya Europa, iyene bela: “Onkalimi ohikala elemelelo ya wawona ayana ninga attu ahina ttima vina anfwanyela weddihiwa ninga adhari.” Vina mbali dhahi onkuweliwa Luka, onkala elabo ya Estados Unidos de America ohiloga, “Ababi ena anowasunziha aniwa wi ayana kanfwanyela ovuruwaniwa vina monelo wawa kunna ttima.” Mukalelo obu vamentoni va Yehova kuli worumeliwa wi mulobwana amweddihegena mwadhiye. (Kaladdaniha na Marko 7:13.) Egali dhawene, mulobwana onawodhe dhavi okala musogorheli waderetu?

2. Txini enfwanyela oziwa mwazambo wa ntakulu, nanda sabwaya jani?

² Wi mulobwana akale mwazambo waderetu, iyene onofwanyela oziwa txini eninfunana Yehova. Iyene vina onofwanyela oziwa sabwa emuttomeli Yehova muttorho obu vina anawodhe dhavi ofwara yotagiha ya Yehova vamodha na ya Yezu. Ekaleleni yamakamaka mulobwana oziwa ejuwene? Sabwani Yehova onowavaha amamuni muttorho wa osogorhela, ajeedhaga wi awene anele osogorhela pama.—Lk. 12:48b.

3. Txini ensunzavo iyo sabwa ya osogorhela onfwanyeya va 1 Korinto 11:3?

³ Kengesa 1 Korinto 11:3. Versu eji enowooniha mukalelo osasanyedhi Yehova nikuru naye na wirimu vina velaboni ya vati. Vowi ddi Yehova onna “onddimuwa” wa osogorhela iyene vina onowattomela attu ena ewodhelo yosogorhela, mbwenye awene anela wakulela vamentoni va Mulugu mukalelo  onsogorhelani. (Rom. 14:10; Ef. 3:14, 15) Yehova ohimuttoma Yezu ninga musogorheli wa mutugumano, masiki dhawene Yezu onele wakulela vamentoni va Yehova sabwa ya mukalelo onneddihiye. (1 Kor. 15:27) Yehova vina ohimuttoma mamuni wi akale musogorheli wa mwadhiye vina anaye, masiki dhawene mamuni agahaweddiye deretu amudhaye onela wakulela vamentoni va Yehova vina Yezu.—1 Ped. 3:7.

4. Yehova vamodha na Yezu ana ewodhelo ya okosa eni?

⁴ Vowi Yehova ddinna ewodhelo ya osogorhela nikuru na wirimu vina elabo ya vati, ohikana ewodhelo ya wita malamulo abuwene anfwanyela anaye ovirihamo obe wiwelela. (Iza. 33:22) Vowi Yezu ddi musorho wa mutugumano Wokristu, iyene vina ohikana ewodhelo ya wita malamulo.—Gal. 6:2; Kol. 1:18-20.

5. Ewodhelo gani ya osogorhela enna mwazambo wa ntakulu, nanda maddile aye bavi?

⁵ Mwazambo wa ntakulu onofwanyela wasogorhela amudhaye afaraga ttarho dha Yehova vamodha na Yezu. (Rom. 7:2; Ef. 6:4) Masiki dhawene, osogorhela waye ohikana maddile. Ninga motagiha, dhogana dhaye dhinofwanyelela wiwanana na magano a Nzu na Mulugu. (Gano 3:5, 6) Vina musorho wa ntakulu kanfwanyelela wasogorhela anamudhi ahinkosa mpaddi wa ntakulu naye. (Rom. 14:4) Vina akala anaye analobwana peno anayana agonuwa avenyavo vatakulu anelege omurihavi, mbwenye iyene kanasogorhelege.—Mt. 19:5.

6. Yehova witelini osogorhela?

⁶ Yehova ohita osogorhela sabwani iyene ononikwela. Obu nvaho wa ttima onivahileyi. Osogorhela onokamihedha nikuru na Yehova weddaga na mukalelo wotadeya vina na murenddele. (1 Kor. 14:33, 40) Kowiliwa kuwali asogorheli, nikuru na Yehova kanigakanile murenddele vina wiwanana. Motagiha, kawo agawodhile okosa yogana yomariha vina kigawodheyile osogorhela dhoganadha dhikosiwe.

7. Mowiwanana na Éfeso 5:25, 28, Yehova onfuna wila mulobwana amweddihege mwadhiye na mukalelo gani?

⁷ Akala jaderetu mulobwana wasogorhela amudhaye, ki ayana a masaka abano anivyonelani ninga amamunawa anowatabutxa vina anowawang’anela? Eji enpaduwela sabwani amamuni enji anottiya ofwara magano a Yehova wi aweddihena amudhawa baroma ofwara yeddelo vina dhilemelelo dha mmuruddani munkalani. Atamelaga wira enazivela anotamela watabutxa awadhawa. Ninga motagiha, muteli onotamela onpittiha mwadhiye wi onihe wi ohikana ‘ttima’ opitta mwadhiye. Masiki dhawene, iyene onoziwa wi mwadhiye kanamukwelege sabwa ya iyene ommagelela, mbwenye onomukosiha wi amovege. * Mulobwana onkosa vina onubuwela dhawene onofwanyela oziwa wi dhinkosiye dhilobo dhotakala vina kadhili dhorumeleliwa vamentoni va Yehova.—Kengesa Éfeso 5:25, 28.

8. Mulobwana anawodhe dhavi okala mwazambo waderetu?

⁸ Mulobwana anawodhe okala mwazambo waderetu wa ntakulu agamutagiha Yehova vamodha na Yezu mukalelo onsogorhelani. Katanalela mikalelo minli dhitonyihedhile Yehova vamodha na Yezu, ninga mwazambo wa ntakulu kobuwela marhe otonyihedha mikalelo esi minli wi omweddihena mwadhiyo vamodha na anawo.

9. Yehova otonyihedheli dhavi ovyeviha?

 ⁹ Ovyeviha. Ozugunuwa elabo yotene Yehova ddina eziwelo opitta muttu-muttuvi, masiki dhawene iyene onovuruwana monelo dha alabeli aye. (Wita 18:23, 24, 32) Iyene vina onorumela malago a abale analamuleliye. (1 Amwe. 22:19-22) Yehova ddoligana mbwenye iyene kanjeedhela wila iyo nikale oligana. Ottiya ejo, iyene onowakamihedha adhari aye wi amulabele na mukalelo wofanyeela. (Masal. 113:6, 7) Mwebaribari Bibilia onologa wi Yehova ‘ddinikamihedha.’ (Masal. 27:9; Aheb. 13:6) Mwene David wahinonelamo wi agahiwodha okosa mabasa manddimuwa avahiwiye sabwa ya ovyeviha wa Yehova.—2 Sam. 22:36.

10. Yezu otonyihedhile dhavi ovyeviha?

¹⁰ Katanalela yotagiha ya Yezu. Masiki valiye Namasunziha vina Nabuya wahisuwa manyalo a anamafwara aye. Txini emuttukuleli Yehova ottiya nipadduwo ntti olebiwa Mbibiliani? Wirele wi asogorheli a mirala asunze. Mwinyene Yezu ohiloga: “Ddirele outonyehedhani dila, nyuwo mwirelagane.” (Jo. 13:12-17) Masiki valiye musogoreli munddimuwa iyene kajeedha olabiwa. Ottiya ejo iyene wannalaba ena.—Mt. 20:28.

11. Mwazambo anawodhe dhavi okala wovyeviha amutagihaga Yehova na Yezu?

¹¹ Yosunziha. Mwazambo wa ntakulu onofwanyela otonyihedha ovyeviha na mukalelo wottiyana-ttiyana. Motagiha, iyene kanjedhele wi mwadhiye na anaye akale oligana. Iyene onofwanyela wavuruwana amudhaye na ofwaseya agavahaga monelo dhawa, masiki akala awene kanrumela monelo waye. Marley murogora onkala elabo ya Estados Unidos ohiloga: “Miyo na mamunaga masiku mena ninokanaga monelo dhottiyana. Mbwenye ddiziwa wi iyene onodditanala vina onoddiriha sabwani iyene onovuruwana monelo dhaga vina ahinatti okosa yogana onotanalela.” Mowenjedhedha, mamuni wovyeviha onokosa mabasa a vatakulu masiki mmuruddani mwaye yoniwaga ninga mabasa a muyana. Okosa eji masaka mena kahiye elobo yovevuwa. Sabwaya? Murogora onkuweliwa Raquel ohiloga, “Obaliwemi mulobwana agattiddaga mabasa vatakulu, amudhaye na anamwanddamani anubuwela wi iyene kahiye ‘mulobwana wa txibarene.’ Awene anloga wi mulobwana kanfwanyela wang’aneliwa na mwadhiye.” Akala yubuwelo eji  mmuruddani mwawo ehikalamo, kobuwela wi Yezu bali velaboni ya vati wahisuwa manyalo a anamafwara aye masiki valani mabasa akosiwa na adhari. Mwazambo waderetu, kankumbela vaye, iyene onotamela okosa dhilobo dhinimwagalaliha mwadhiye vina anaye. Ottiya ovyevihavi, mukalelo mwina wa makamaka onimukosiha mwazambo okala waderetu buvi?

12. Okwela onimuttukulela Yehova na Yezu okosa eni?

¹² Okwela. Dhotene dhinkosa Yehova onkosa na okwela. (1 Jo. 4:7, 8) Sabwa ya onikwela, iyene ononijiha mpaddi womuyani modhela Mazu aye—ali Mbibiliani—vina nikuru naye. Sabwa ya onikwela weye, iyene ononizuzumela vina onfuna wila iyo nikale ottugareyene. Iyene ononizuzumela na dhojombeliwa dhehu? Ndde. Vowi Yehova “onnivaha dhetene vawinjivavene, wi nithabena.” (1 Tim. 6:17) Iyo nigavonya iyene ononilaga vina kanattiye onikwela. Sabwa ya okwela, Yehova ohikosa masasanyedho wi anobole muttegani. Yezu vina ohilagiha onikwela modhela oniperhekela egumi yaye wi nakele egumi yohimala. (Jo. 3:16; 15:13) Kavo elobo enambarele Yehova vamodha na Yezu watonyihedha okwela abale ali oweddeyana na awene.—Jo. 13:1; Rom. 8:35, 38, 39.

13. Ekaleleni yamakamaka mwazambo wa ntakulu wakwelaga amudhaye? (Kang’ana kasha “ Mulobwana Otelile Ovanenevi Onawodhe Dhavi Omuriha Mwadhiye”)

¹³ Yosunziha. Mwazambo wa ntakulu onofwanyela okosa dhilobo dhotene na okwela. Ejoya ekaleleni yamakamaka? Yowakulaya jiji elebile murumiwi Joau: “Akala muthu oní: “Miyo ddinomukwela Mulugu” oku amwiddanaga mukwaye, onkala muthambi. Txibarene ohinimukwela mukwaye onimoniye, kanwodha omukwela Mulugu ohinimoniye.” (1 Jo. 4:11, 20) Na mukalelo wakakene, mwazambo wa ntakulu onakwela amudhaye vina onfuna omwagalaliha Yehova vamodha na Yezu, onowazuzumela amudhaye mpaddi womaningoni vina womuyani modhela wasunziha anaye vina walaga. (1 Tim. 5:8) Iyene onowashagiha vina onowalaga anaye. Vina onelege odhowavi akosaga dhosakula dhinimuttittimiha Yehova vina  dhinawagalaliha amudhaye. Ninfuna nisekesere ttarho modhamodha dhinamukamihedhe mwazambo wa ntakulu omutagiha Yehova vina Yezu.

14. Mwazambo wa ntakulu onalagihe dhavi wi onowazuzumela amudhaye?

¹⁴ Wazuzumela amudhaye mpaddi womuyani. Yezu wahimusanza Babe wa wirimu, modhela wazuzumela anamafwara aye mpaddi womuyani. (Mt. 5:3, 6; Mk. 6:34) Na mukalelo wakakene, mwazambo onofwanyela wazuzumela amudhaye vamaromo vene mpaddi womuyani. (Olib. 6:6-9) Iyene onakose ejuwene modhela otamela mudhidhi wi ansunze Nzu na Mulugu vamodha na amudhaye, odhowaga omatugumanoni, obudduwa mmabasani a olaleya vina okana mandano oliba na Yehova.

15. Mwazambo wa ntakulu anawodhe dhavi wakosiha amudhaye okala ottugareyene vina obareleyene?

¹⁵ Kalagiha wi onowakwela amudhawo. Yehova wahimwaddela Yezu wi wanimukwela vamentoni va attu ena. (Mt. 3:17) Yezu wahatonyihedha anamafwara aye wi wanakwela, iyene wonihile okwela oko mwa esile dhakosiliye vina dhilogiliye. Anamafwara aye vina ahoniha wi annimukwela. (Jo. 15:9, 12, 13; 21:16) Mwazambo wa ntakulu onofwanyela olagiha wila onomukwela mwadhiye vamodha na anaye modhela omusunzaga Bibilia vamodha vina mwa wawaddela wila onowakwela vina onowatanala. Egawodheya enofuneya wattittimiha vari va attu ena.—Gano 31:28, 29.

16. Elobo gani enfwanyela mwazambo okosa, nanda onawodhe dhavi okala muttu wovipimelela?

¹⁶ Wazuzumele amudhawo mpaddi womaningoni. Yehova wahazuzumela ana Izrayel na dhojombeliwa dhawa masiki vasaddeyiye sabwa ya ovuruvuru wawa. (Olib. 2:7; 29:5) Iyene vina masaka abano ononivaha dhinjobeliwehu. (Mt. 6:31-33; 7:11) Na mukalelo wakakene, Yezu wahajiha abale anfara muleddoni mwaye. (Mt. 14:17-20) Vina wannavulumutxa aredda na aragali. (Mt. 4:24) Wi mwazambo amwagalalihe Yehova onofwanyela wasapela amudhaye mpaddi womaningoni. Masiki dhawene, onofwanyela okala muttu wovipimelela. Iyene kanfwanyela ozuzumeletxa vaddiddi mabasa aye ofiyedha ottiya wakwela amudhaye vina wazuzumela mpaddi womuyani.

17. Yotagiha gani ettiyile Yehova vamodha na Yezu sabwa ya onisunziha vina onilaga?

¹⁷ Wasunzihe anawo. Yehova ononisunziha vina ononishagiha sabwani onfuna anikamihedhe. (Aheb. 12:7-9) Dhahene ninga Babe, Yezu wahasunziha abale asogorheliye na mukalelo w’okwela. (Jo. 15:14, 15) Iyene wanavaha malago oliba mbwenye na okwela. (Mt. 20:24-28) Iyene onoziwa wi iyo nili attu ohiligana nona masaka mena ninovonya.—Mt. 26:41.

18. Wila mulobwana akale mwazambo wa deretu txini enfanyeliye wubuwela?

¹⁸ Mwazambo onimutagiha Yehova vamodha na Yezu, onononelamo wila amudhaye kahiye  attu owakwana. Iyene kanfwanyela omweddiha mwadhiye na anaye na mukalelo ‘wowanyanyuwela.’ (Kol. 3:19) Mottiyana-mwene iyene onofwanyela ovirihamo yoleba ya Galásia 6:1 onofwanyelela wawogolela na “murima wofewa” obuwelaga wi iyene vina muttu wohiligana. Ninga Yezu, iyene onofwanyela okala tagiha yapama ya amudhaye.—1 Ped. 2:21.

19-20. Mwazambo wa ntakulu agafunaga okosa yosakula onawodhe dhavi omutagiha Yehova vamodha na Yezu?

¹⁹ Onofwanyela okosa dhogana ahizuzumelaga dhayevi. Yehova onokosa dhogana obuwelagana opama wa attu ena. Ninga motagiha, Yehova attanddaga egumi kattanddeli wi avihagalalihena mwinya, mbwenye wi attu ena ajevo wagalala wa okalawo. Kavo onmageleli Yehova omuruma Mwanaye Yezu wi adhe obolele dhotega dhehu. Iyene ohigana oniperhekela mukutto wi nipurelemo. Yezu vina onokosa dhogana wi voromavene attu ena apurelemo. (Rom. 15:3) Motagiha, masiki valiye wolemene iyene wahisunziha muttitti wa attu ottiya odhowa ovuma.—Mk. 6:31-34.

²⁰ Mwazambo waderetu onoziwa wi kahiye yovevuwa okosa yogana na malago wi dhapurele amudhaye, iyene onotanalela venjene muthoro obu. Iyene onorabela okosa dhosakula ahinatti otanalela afaraga esile dhinubuwelihe bahi. Ottiya ejo, iyene onorumela weddihiwa na malago a Yehova. * (Gano 2:6, 7) Agakosa dhawene dhogana dhaye dhinela wapurelamo attu ena ottiya ozuzumela dhayevi bahi.—Fil. 2:4.

21. Txini dhinasunzehu na mutoma ondawo?

²¹ Yehova ohinvaha mwazambo wa ntakulu muttorho worutxa, masiki dhawene iyene onomukamihedha mukalelo onawodhiye wakwaniha muttorhoya. Mwazambo agafwara yotagiha ettiyile Yehova vamodha na Yezu, onele okala musogorheli wapama wa ntakulu. Muteliwi agakosa mpaddi waye anela okamihedha wi vamuralani vakale wagalala. Muteliwi onawodhe dhavi orumeelela onddimuwa vina ongumanana makattamiho gani? Nsunzo nindawo ninela wakula mavuzo aba.