1. Niniwamo dhavi okwela wa Mulugu?

“MULUGU ddi okwela” olebeli ddi murumiwi Joau. (1 Jo. 4:8) Mazu aba mang’onovi anonubutxedha ebaribari yamakamaka: Mulugu ddi muttanddi wa egumi vina ddi nipara na okwela. Yehova ononikwela! Okwela waye ononagalaliha vina ononilibiha.

2. Mowiwanana na Mateu 22:37-40, malamulo meli manddimuwa bavi vina ningumanelanani makattamiho a ovirihamo nanawili?

² Ninga Akristu kaninimusakula bani onamulagihehu okwela. Ntti nlamulo. (Kengesa Mateu 22:37-40.) Iyo nigamuziwa deretu Yehova ninela ovirihamo nlamulo ntti noroma. Yehova ddoligana, iyene ononikoya vina ononeddiha na oderetu. Mbwenye ninorutxiwaga ovirihamo nlamulo na nanawili. Sabwaya? Sabwani abali na arogora ehu—a mmulogoni vina anamwanddamani ehu—attu ohiligana. Mudhidhi mwina awene anologa dhilobo vina anokosa dhilobo dhinnittukulela iyo ohatanala vina ohalagiha okwela. Yehova onoziwa wi iyo ninogumanana makattamiho aba, nona iyene ohalabihedha attu wi amulebe Bibilia, mwenemo munfwanyihu malago annikamihedha olagiha okwelana muttu na mukwaye. Mwa anamalebaya aba mmodha ddi Joau.—1 Jo. 3:11, 12.

3. Txini ekokomezile Joau mwaha wa okwela?

³ Mmaleboni mwaye Joau ohileya wi Akristu anofwanyela olagihaga okwela. Iyene alogaga sabwa ya egumi ya Yezu, ohilabihedha venjene mazu aba “okwela” vina “okwelana’’  opitta Mittaka miraru dhilebiwe na Mateu, Marko na Luka. Nsaka nalebile Joau Muttaka vina makarta mena mararu, wana vyaka zana. Mazu aba ovudheleliwa ali mBibiliani anonisunziha wi okwela onofwanyelela opatta merelo otene a Mukristu. (1 Jo. 4:10, 11) Masiki dhawene, wahivira mudhidhi mwinje wi Joau asunzevo elobo.

4. Joau wanlagiha okwela mudhidhi wotene?

⁴ Muzombweni mwaye, Joau kalagihetxa okwela. Motagiha, Yezu na anamafara aye akosaga oleddo w’o Jeruzalemi mpaka o Samariya, anya a muruddaya ahikoodda wawakela mmawani mwawa. Joau wewilemo dhavi? Iyene wahikumbirha wi odhe motto odhulu watoletxe etene a muruddene obule! (Lk. 9:52-56) Mudhidhi mwina, Joau wahivonya walagiha okwela anamafwara akwaye. Iyene vamodha na mbalaye Tiago, ahiloga na mayiwa amukumbirhe Yezu wi avahe mpaddo wottukuwa Mumweneni mwaye. Anamafwara ena muziwelani ejile yakosile Joau na mbale Tiago, ahisilidhiwa vaddiddi! (Mt. 20:20, 21, 24) Masiki na dhovonya esi dha Joau Yezu wannimukwelavi.—Jo. 21:7.

5. Txini dhinasekeserhe iyo munsunzoni ntti?

⁵ Mwari mwa nsunzo ntti, iyo ninela wona mikalelo dhing’onovi esuwedhene dhilebiliye sabwa ya okwela. Dhahene, ninele osunza mikalelo dhinanikamihedhe watonyihedha okwela abali na arogora ehu. Vina ninela osunzavo mikalelo dhattima, esuwene dhinfwanyela okosa amwazambo a ntakulu wi atonyihedhe okwela vamuralani vawa.

6. Yehova onitonyihedhile dhavi wi ononikwela?

⁶ Ninodhaga wubuwela wi okwela, onlagihiwa na mazu vina makani oziva. Wi okwela wehu okale wa txibarene iyo ninofwanyela olagiha na merelo. (Kaladdaniha na Tiago 2:17, 26.) Motagiha, Yehova ononikwela. (1 Jo. 4:19) Vina iyene ononilagiha okwela oku sabwa ya mazu apama anfwanyeya mBibiliani. (Masal. 25:10; Rom. 8:38, 39) Iyo nikana ebaribari wi Mulugu ononikwela, ottiya na mazuvi bahi na merelo vina. Joau ohileba: “Mulugu ohoniha okwela waye n’eji: Mulugu omúruma Nammodha waye mwilaboni, wi n’ovilevela waye nakele egumi.” (1 Jo. 4:9) Yehova ohimuruma Nammodha waye wi atabuwe vina anikwele. (Jo. 3:16) Nona, kaninaganyedha wila Yehova ononikwela!

7. Yezu olagihile dhavi wi ononikwela?

⁷ Yezu wahawaddela anamafara aye wi wanakwela vaddiddi. (Jo. 13:1; 15:15) Iyene wahatonyihedha wi onowakwela vaddiddi  vina ononikwela iyo ottiya na mazuvi bahi mbwenye mwa eji ekosiliye. Yezu ohiloga: “Kawo onna okwela ompitha ole onalevela akwaye egumi yaye.” (Jo. 15:13) Otanalela ejile enikosele Yehova vamodha na Yezu, ennittukulela okosa eni?

8. Mowiwanana na 1 Joau 3:18 txini enfwanyelihu okosa?

⁸ Iyo ninele olagiha omukwela Yehova na Yezu nigawiwelelaga. (Jo. 14:15; 1 Jo. 5:3) Yezu vina ohinivaha nlamulo ninoniha wi ninofwanyela okwelana muttu na mukwaye. (Jo. 13:34, 35) Iyo kaninfwanyela watonyihedha okwela abali vamodha na arogorihu a mmulogoni na mazuvi bahi, mbwenye ninofwanyela walagiha okwela wehu na mazu vina merelo. (Kengesa 1 Joau 3:18.) Mikalelo gani dhawoneya dhinakosihu dhinalagihe wila iyo ninowakwela?

9. Okwela wa Joau omuttukuleli okosa elobo gani?

⁹ Joau kokala mwina, agahikala na babe agumelaga kobiri mmabasani a ottadda vina n’oguliha oba. Mbwenye iyene wahilabihedha egumi yaye wi asunzihe attu ebaribari sabwa ya Yehova vamodha na Yezu. Yosakula yakosile Joau mwigumini mwaye kiyali yovevuwa. Iyene wahitabuwa na ofwara-fwariwa, vina omamalelo wa vyaka zana dhoroma boluvalile wahifiyedha ofugeliwa. (Mer. 3:1; 4:1-3; 5:18; Ovuh. 1:9) Masiki bafugeliwevi sabwa ya olaleya miselu dha Yezu iyene wahilagiha wi wanakwelavi abali ena. Ninga motagiha, iyene bali wofugeliwene vasuwani ya Pátmos, wahileba mavuhulo aakeliliye nanda wahivahedha milogo wi aziwe esile “dhinfuna opadduwa ovanene.” (Ovuh. 1:1) Vamalile Joau ofuruliwa vasuwani ya Pátmos, palebiliye Muttaka sabwa ya egumi ya Yezu vina mabasa aye a olaleya. Iyene vina ohileba makarta mararu wi aalibihe vina aapangarhaze abali na arogora. Weyo onawodhe dhavi omutagiha Joau, na mabasa akosiliye na guru mwigumini mwaye?

10. Onalagihe dhavi wi onowakwela attu?

¹⁰ Dhosakula dha mwigumini mwawo dhinele olagiha akala onowakwela attu. Elabo ya Satana ekana efunelo ya wukwekwettela ononga mudhidhi, guru na otamela kobiri vina okala muttu wovuwa. Ottiya ejo, kakosa guru ya olaleya miselu dha Omwene, dhahene ninga munkosela akristu enjene orugunuwa elabo yotene, anlaba mudhidhi mwinjene akamihedhaga attu okana mandano ofiyedheya na Yehova. Ena anolaba mudhidhi mwinjene mmabasani a olaleya vina osunziha.

11. Anamalaleya ororomeleya anlagiha dhavi wi anomukwela Yehova vamodha na abali vina arogora?

¹¹ Akristu enjene ororomeleya ahikana, mabasa ankosani wi avikamihedhe vina asapelena amudhawa. Masiki dhahene, abali aba ororomeleya anokamihedha nikuru na Yehova mpaka apale vanwodhelani. Ninga motagiha, ena onovivelela wila akamihedhe omagiwa wa numba dha omwene, vina okamihedha ogapadduwa efoyo, otene anoperheka mivaho dhawa dhinkamihedha mabasa a Mulugu ozugunuwa elabo yotene. Awene ankosela mabasa aba sabwa ya omukwela Mulugu vamodha na abalawa. Nigatugumanaga mmulogoni vina nigavahaga dhowakula dhehu sumana dhotedhene, ninela olagiha wi ninowakwela abali vamodha na arogora ehu. Masiki nikale olemene vina odhugudheyene, ninodhowa mmatugumanoni vina ninovaha dhawakula. Iyo notene ninofanyiwa makattamiho; masiki dhawene ninofwanyela olibihana muttu na mukwaye,  matugumano ahinatti vina omamalelo wa matugumanoya. (Aheb. 10:24, 25) Ninokaana wagalala onddimuwa vaddiddi olaba vamodha na abali ehu!

12. Mukalelo gani mwina otonyihedhile Joau wi wanakwela abali na arogora?

¹² Okwela waana Joau na abali vina arogora, kalagihile na watamalelavi bahi, mbwenye iyene wahavaha malago amakamaka. Motagiha, mukartani mwaye Joau wahatamaalela abali na arogora sabwa ya nroromelo nawa vina mabasa apama akosani, ottiya ejuwene, iyene wahavaha malago akokomezaga sabwa ya ottega. (1 Jo. 1:8–2:1, 13, 14) Moligana na Joau, iyo ninofwanyela watamalela abali na arogora mwa dhilobo dhotene dhapama dhinkosani. Mbwenye akala muttu onolagiha mikalelo obe merelo ohifanyeelela, ninomuttonyihedha okwela nimwaddelaga monyaala-mwene enfanyeliye okosa. Enofuneya oliba murima wi ninvahe malago marho wehu, mbwenye Bibilia onologa wi marho watxibarene onomusisigula mukwaye.—Gano 27:17.

13. Txini ehinfanyeelihu okosa?

¹³ Mudhidhi mwina, iyo ninolagiha wi ninowakwela abali ehu modhela ejile enkosihu vina ehinfanyeelihu wakosela. Motagiha, iyo kaninfanyeela osilidhiwa momaguva modhela dhilobo dhinlogani. Kobuwela yapadduwile waddamela omagomo wa egumi ya Yezu velaboni ya vati. Iyene wahawaddela anamafwara aye wi awene agahija maningo aye vina agahimwa nikami naye. (Jo. 6:53-57) Mazu aba ahanyimula anamafwara, awinjivaya ahittiya onfwara—mbwenye eji kiyapadduwile na anamafwara aye ororomeleya ninga Joau. Awene ali ororomeleya vina kattiyile wedda na iyene. Awene kanonelilemo mazu aye vina ahitikina. Mbwenye anamafwara aye ororomeleya kasilidhiwe na mazu alogiliye. Ottiya ejo, awene annimukuluvela vowi anziwa wi iyene waloga ebaribari. (Jo. 6:60, 66-69) Eji kahiye yotagiha yapama wa iyo, ohimaguvela osilidhiwa na esile dhinloga abalihu vina amarho ehu? Nona, ninofwanyela wavaha mudhidhi wi anitapulelemo ejile ehinonelihumo.—Gano 18:13; Koh. 7:9.

14. Sabwaya jani iyo kaninfanyeela wawidda abali na arogora?

¹⁴ Joau ohikokomeza wi kaninfwanyela wawidda abali na arogora. Iyo nigattiya weddana malago aba, ninonvaha Satana  mburo. (1 Jo. 2:11; 3:15) Eji yahapadduwela ena omamalelo wa vyaka zana dhoroma. Mudhidhene obule Satana wahiroma wattukulela ena widdana vina ogawana mmulogoni. Mudhidhi waleba Joau karta aye mmulogoni m’okristu mwahivolowa muya wa Satana. Ninga motagiha, Diótrefe wahiroma wita ogawana mmulogoni. (3 Jo. 9, 10) Iyene kaariha anameddelela milogo arumiwa na nikuru nolamulela. Iyene wanattamagiha mmulogoni abali etene atamela wawakela aleddo. Eji yali elobo yabure vaddiddi! Masaka abano Satana onotamela, ogawa nlogo na Yehova vina ogonjiha. Mbwenye iyo kaninfanyeela wawidda abali ehu vina ottiya wakamihedha.

15. Txini ehinfanyeela odduwala mwazambo wa ntakulu?

¹⁵ Mukalelo mmodha wa ttima onfwanyela mwazambo wa ntakulu otonyihedha okwela bwa wasapela amudhaye. (1 Tim. 5:8) Masiki dhawene, iyene onofwanyela oziwa wila dhilobo dhomaningoni kandhinakamihedha amudhaye wunuwa mpaddi womuyani. (Mt. 5:3) Koona yotagiha yattiyedhi Yezu amazambo a ntakulu. Mowiwanana na Muttaka olebile Joau, Yezu atabuwaga vapingirhizini wahilagiha wi onowazuzumela amudhaye. Joau wemelile vamodha na mai wa Yezu mudhidhi watabuwa Yezu vapingirhizini. Masiki na goyi yopitta yana Yezu, wahivilibihedha ologa na Joau wi amukoye maye Maria. (Jo. 19:26, 27) Yezu kaganyedha wi maye agahikamihedhiwa na dhamujombela, masiki eziweyaga wi mudhidhene obule Maria kooniwa ninga namafara wa Yezu. Mbwenye Yezu wafuna wi maye akamihedhiwe na dhamujombela wila adhowegevi amulabelaga Yehova.

16. Muttorho gani wana Joau?

¹⁶ Joau wahikaana muttorho munddimuwa vaddiddi. Ninga murumiwi, iyene wali musogorheli wa mabasa a olaleya. Iyene vina wahitela, nona wanfanyeela ovipimelela wi asapele amudhaye mpaddi womaningoni vina womuyani. (1 Kor. 9:5) Txini ensunzavo amazambo a ntakulu a masaka abano?

17. Ekaleleni yamakamaka mwazambo wa ntakulu ozuzumela wakamihedha amudhaye mpaddi womuyani?

¹⁷ Mbali oli mwazambo wa ntakulu ohikana muttorho munddimuwa vaddiddi. Ninga motagiha, iyene onofwanyela olaba deretu omabasani waye wi amuttittimihe Yehova.  (Ef. 6:5, 6; Tito 2:9, 10) Akala iyene ohikaana ettomo mmulogoni, ninga okala munddimuwa wa mulogo vina onosogorhela mabasa a olaleya, onofwanyela omusunzaga Bibilia na mwadhiye vina na anaye. Amudhaye anela omutamaalela sabwa ya guru enkosiye ya wakamihedha mpaddi womaningoni vina womuyani.—Ef. 5:28, 29; 6:4.

18. Joau waana ebaribari yani?

¹⁸ Joau wahikalawo vyaka dhinjidhene. Mwigumini mwaye, wahigumanana makattamiho ottiyana-ttiyana agadhile wobaniha nroromelo naye. Masiki dhawene, Joau wankosa guru vaddiddi wi avirihemo malamulo a Yezu ewanana na wakwela abali vamodha na arogora. Mwa dhahene Joau wahikaana ebaribari wi Yehova vamodha na Yezu annimukwela vina agahimukamihedha owanana makattamiho. (Jo. 14:15-17; 15:10; 1 Jo. 4:16) Nne Satana, nne elabo yaye, kimukosihile Joau ottiya watonyihedha okwela abali na arogora.

19. 1 Joau 4:7 onilibiha okosa eni nanda sabwaya jani?

¹⁹ Dhahene ninga Joau, iyo ninkala mwilaboni enlamuleliwa na Satana. (1 Jo. 3:1, 10) Iyene onfuna wi iyo nittiye wakwela abalihu na arogora, mbwenye kanawodhe iyo nigahinvahe mburo. Nona ninofanyela ovilibihedha wakwela abali na arogora na mazu vina merelo. Nigakosa dhahene, ninele wagalala vina ninela omwagalaliha Yehova. —Kengesa 1 Joau 4:7.