Nsunzo 4
Mukwelanege N’ekalelo Y’obali
“Mukwelanege n’ekalelo y’obali.”—ROM. 12:10.
JIBO 109 Nikwelege na Murima Wotene
DHINASUNZE IYO *
1. Txini enoniha wi mirala dhina kadhinlagiha okwelana?
NINGA munlogela Bibilia, iyo ninkalawo masaka omariha sabwani attu enji ‘kanlagiha okwela.’ (2 Tim. 3:1, 3) Eji enlagiha wila mavuhulo a mBibiliani anowakwanihedheya. Ninga motagiha, atelani enji masaka abano anomwalana sabwa yohiwanana, aimaya anofiyedha ovoona ninga kankweliwa. Namalaga murala dhahi ohiloga wi: “Masiki anamudhi akalaga murala mmodha kankaana mudhidhi wa ologa makani, mudhidhi wawa annonga na matelefoni makomputador obe gemi.” Iyene onowenjedhedha alogaga: “Masiki anamudhi aba akalaga ntakulu nimodha awene kanziwana mwawakwana.”
2-3. (a) Mowiwanana na Roma 12:10, ninfwanyelelani ottonyiyedha okwela nekalelo y’obali? (b) Txini dhinasekeserihu mwari mwa nsunzo ntti?
2 Iyo kaninfara yeddelo ya attu a mwilaboni mpuno ahinlagiha okwela. (Rom. 12:2) Ottiya ejo, ninofwanyela wunuwiha wakwela amudhehu vina abalihu na arogora a mmulogoni. (Kengesa Roma 12:10.) Okwelana n’ekalelo y’obali txini? Okwelana nekalelo y’obali, mukalelo wa olagiha okwela ononeya vari va anamudhi ofiyedhana. Iyo ninofwanyeela walagiha mukalelo obu wokwela amudhihu omuyani, abali na arogora ehu ali Akristu. Iyo nigalagiha mukalelo obu wa ofiyedhana ninela wakamihedha attu ena omulabela Yehova na iyo nowagalala.—Mik. 2:12.
3 Wi nunuwihe mukalelo obu wa okwela, ndoweni nooneni dhotagiha dhing’onovi dhinfwanyeya mBibiliani.
YEHOVA—‘DDANTTEBWA’
4. Tiago 5:11, onimpanga eni mwaha wa okwela wa Yehova?
4 Bibilia ononaddela mikalelo dhapama dha Yehova. Motagiha, ononaddela wi “Mulugu ddi okwela.” (1 Jo. 4:8) Mikalelo esi dhapama, dhinonittukulela okala amarho aye. Bibilia onaddela vina wi Yehova ‘ddanttebwa.’ (Kengesa Tiago 5:11.) Mazu aba anowoniha kakamwe wi Yehova ononikwela vaddiddi!
5. Yehova onlagiha dhavi ttagaraga, nanda iyo ninawodhe dhavi omutagiha?
5 Kona wi Tiago 5:11 ononaddela mukalelo mwina onnittukulela okala wofiyedheya na Yehova—ttagaraga yaye. (Obud 34:6) Mukalelo modha onitonyihedha Yehova ttagaraga yaye ja onilevelela dhottega dhehu. (Masal. 51:1) Mbibiliani, nzu ntti ttagaraga kintapulela bahi olevelelavi. Enotapulela okubanya onddimuwa onkanihu onnittukulela omukamihedha muttu agatabuwaga. Yehova ononaddela efunelo eniyena ya onikamihedha empitta supaje enimukanela mambali mwanaye wa nyenye. (Iza. 49:15) Iyo nigafwanyiwaga makattamiho, ttagaraga ya Yehova enomuttukulela onikamihedha. (Masal. 37:39; 1 Map. 10:13) Iyo ninowattonyihedha abali na arogora ttagaraga yehu, modhela walevelelaga vina ohakoyela ntxiga aganikosela elobo yohikala. (Ef. 4:32) Mukalelo mwina wa walagiha abali na arogora ttagaraga, bwa wakamihedha agakala mmakattamihoni. Okwela ononittukulela waweddela ttagaraga nimutagihaga namadhulu-dhulu wehu Yehova.—Ef. 5:1.
JÓNATA NA DAVID —‘AHANDDANA VINA MIRIMA DHAWA DHATTIDDANA’
6. Jónata na David alagihile dhavi okwelana muttu na mukwaye?
6 Mbibiliani mukala mapadduwo a attu ohiligana atonyihedhilena okwelana muttu na mukwaye vina ana mandano ofiyedheya. Katanalela yotagiha ya David na Jónata. Bibilia onloga: “Jónata oroma wanddana na iyene [David], mirima dhawa dhithiddana; wanimukwela David ninga munvikwelela iyenene.” (1 Sam. 18:1) David wahisakuliwa ninga mwene wi amuhabe mpaddo Saul. Mmalelani Saul wahimukaanela ntxiga vina wantamela ompa David. Mbwenye Jónata mwana Saul, kavitaganyihile na babe vina kamukamihedhi wi ampe David. Jónata na David ahimaga nipagano na omarho vina ahikamihedhana muttu na mukwaye.—1 Sam. 20:42.
Ottiyana wa yimo kumukosihile Jónata ohikana mandano oliba na David (Kang’ana ddima 6-9)
7. Dhilobo gani dhigawodhihile Jónata na David ohikala amarho?
7 Okwelana vina omarho wana Jónata na David ononittikiniha, sabwani nigattanalela ninowona wi vahikala dhilobo dhinjidhene dhigattukuleli awene ohikala amarho. Motagiha, Jónata na David kaana vyaka dholigana, vahikala ottiyana wa vyaka 30 na David. Jónata agahifiyedha wubuwela wi David kafwanyela okala marho waye, sabwani wali mwana vina kana mirugu. Mbwenye Jónata kakosile dhawene vina kamweddihile ninga mwana.
8. Sabwaya jani yakaleli Jónata marho wapama wa David?
8 Jónata agahimukanela nrima David. Ninga mwana Mwene, Iyene agahiwanyedha omwene vampaddoni va babe. (1 Sam. 20:31) Mbwenye Jónata kakosile dhawene, iyene wali woviyeviha vina wanneddeyana na Yehova. Iyene wahimukamihedha venjene David vowi wasakuliwe na Yehova wi akale mwene musogorho. Iyene wali waweddeyana na David masiki vaziwiye wi Babe Saul agasilidhiwa vaddiddi.—1 Sam. 20:32-34.
9. Jónata womona David ninga mwiddani waye? Katapulelamo.
9 Jónata wanimukwela venjene David iyene kamoona ninga mwiddani waye. Jónata wanziwa oponya pama ura vina wali munyakoddo woliba murima vaddiddi. Jónata na Babe ali ovuwa vaddiddi sabwani “anvava opitha epungu, anliba opitha poddogoma.” (2 Sam. 1:22, 23) Jónata agahikala muttu wovittukulela sabwa ya esile dhawodhiye okosa. Masiki dhawene, Jónata katamela oviladdaniha vina kazuzumela omukanela ntxiga David sabwa ya dhilobo dhapama dhakosiye. Ottiya ejo Jónata wanimutikina vaddiddi David sabwa ya oliba waye murima vina omukuluvela Yehova. Motagiha, David vampiliye Goliya Jónata wanimukwelavi David ninga yavikweliye mwinyene. Ninawodhe Dhavi walagiha okwela abali vamodha na arogora?
MASAKA ABANO NINAWODHE DHAVI OLAGIHA OKWELA NEKALELO Y’OBALI?
10. Mazu aba “muziwe okwelana-wene na murima wotene” antapulela eni?
10 Bibilia ononaddela wi “muziwe okwelana-wene na murima wotene.” (1 Ped. 1:22) Yehova ohinittiyedha yotagiha yapama. Onikwela wa Yehova kunddimuwa-wene, iyo nigakala oweddeyana na iyene txipo kanattiye onilagiha okwela. (Rom. 8:38, 39) Mazu aba okwelana na “murima wotene” na elogelo ya Egrego animutonya muttu onkosa guru ya olagihagavi—okwela. Mudhidhi mwina, ninorutxiwaga walagiha okwela abali vamodha na arogora. Attu aganikosela dhilobo dhabure obe aganidda, ninofwanyela odhowagavi ‘napiselaga murima na okwela nitamelaga okoya omodha, onda na muya wokoddela, neddagana murenddele onikaliha mumodhani.’ (Ef. 4:1-3) Iyo nigatamela weddana “murenddele” na abali ehu kaninazuzumele woona dhovonya dhawa. Ninelege wawonana mikalelo dhaderetu ninga munawonela Yehova.—1 Sam. 16:7; Masal. 130:3.
Paulo wahakokomeza Evódia na Síntike wi akane—mandano oliba muttu na mukwaye masaka mena ninorutxiwaga okana manddano oliba na abali vamodha na arogora (Kang’ana ddima 11)
11. Mudhidhi mwina enrutxelagani iyo walagiha okwela abali vamodha na arogora?
11 Mudhidhi mwina kinkalaga yovevuwa iyo walagiha okwela abali vamodha na arogora, makamaka nigobuwelaga dhovonya dhawa. Enooneya ninga makattamiho aba ahapatta Akristu a vyaka zana dhoroma. Motagiha, Evódia na Síntike kaana makattamiho mudhidhi ‘walabani oku-noku na Paulo, alaleyaga miselu dhapama.’ Mbwenye movira wa mudhidhi vahitteya makattamiho ohiwanana muttu na mukwaye. Nona Paulo wahakokomeza wi “ewananege ninga munfunela Nabuya.”—Fil. 4:2, 3.
Munddimuwa wa mulogo wa muzombwe onolibiheya sabwa ya okana mandano ofiyedheya na munddimuwa wa mulogo owunuwelavo (Kang’ana ddima 12)
12. Ninawodhe dhavi watonyihedha okwela abali vamodha na arogora?
12 Wunuwiha okwela nekalelo y’obali masaka abano onapatta dhavi abali vamodha na arogora? Waziwa deretu abali ehu vamodha na arogora, enele wunuwiha wakwela wehu. Nne yumo, nne yeddelo kinfwanyela onibarela iyo okodda okana mandano na abali vamodha na arogora. Nubuwele wila Jónata wali munddimuwa opitta David, masiki dhawene awene akana mandano ofiyedheya muttu na mukwaye. Nona enowodheya weyo vina otamela okana mandano na mbali—owunuwelavo obe—wa muzombwe. Ogakosa dhawene onolagiha wila ‘onowakwela abali ali ozugunuwa elabo yotene.’—1 Ped. 2:17.
(Kang’ana ddima 12) *
13. Sabwaya jani kinwodheya okana mandano akakene na abali otene a mmulogoni?
13 Olagiha okwela nekalelo y’obali entapulela okana mandano na attu otene a mmulogoni? Ejo kinwodheya. Kahiyo yabure iyo okana mandano na enna ana dhogana dhimodha-dhene na dhehu. Yezu awaddagana anamafwara aye otene wahiloga, ddinouwirani “akwaga” masiki dhawene iyene wamukweletxa makamaka Joau. (Jo. 13:23; 15:15; 20:2) Mbwenye eji kintapulela wi Yezu wamukweletxa vaddiddi Joau opitta ena. Ninga motagiha, mudhidhi wavenyile Tiago na Joau aloga na Yezu wi munirumelihe ogilati mumweneni mwenyu mmodha omononi woja mwina wimarani, Yezu wahawaddela dhahi: “Ogilati wenyu omononi waga woja peno wamara, kuli na miyo.” (Mk. 10:35-40) Dhahene ninga Yezu, iyo kaninfwanyela wattiyaniha abali na arogora, nawonagana ttima enpitta ena. (Tia. 2:3, 4) Okosa dhawene enowita ogawana mpaddi womuyani, mweddelo ohinrumeliwa mmulogoni Mokristu.—Jud. 17-19.
14. Ninga munlogela Filipi 2:3, txini enanikamihedhe orabela mukalelo wa ovurhana?
14 Iyonigatamela watonyihedha abali okwela ninela orebetta ekalelo yovurhana mmulogo. Kobuwela wila Jónata kamweddihile David na ekalelo ya mavurhano, amoonaga ninga mwiddani wafuna omwaka omwene waye. Iyo notene ninofwanyela omutagiha Jónata. Modhela ohawonaga abali ninga amwiddani ehu sabwa ya ewodhelo vina ttontto enanina mmabasani a Yehova, mbwenye ‘muttu-muttu na oviyeviha onddimuwa awonegena akwaye ttima empitta yaye.’ (Kengesa Filipi 2:3.) Odhowege wubuwelaga wi muttu-muttu mmulogoni ohikana ewodhelo yokamihedha. Nidhowegevi na oviyeviya nawoonaga abali ehu nattima empitta yehu, nigakosa dhawene ninela opurelamo venji na ororomeleya wawa.—1 Kor. 12:21-25.
15. Osunzilevo eni na ejile empadduweli Taniya vamodha na amudhe?
15 Nigagumanana makattamiho, Yehova ononipangarhaza na okwela alabihedhaga abali vamodha na arogorihu a mmulogoni. Katanalela yotagiha eji ya anamudhi onile mutugumano wa ttattamwa elabo ya Estados Unidos, wa vilabo dhoriganela yaka ya 2019 wana mutoma “Okwela Kunamale-wene!” Taniya mambali wa aima araru ohiloga, “niyelelaga vatakulu mukukutta mwina wahivadda mukukutta yehu, kavo wavoreyile, venevo nahibudduwa mmukukuttanimwa banimela nikome na rampa. Muttu mwina wali kobela ya rampa wahinikuwela wi nawele mmukukuttani mwaye, oddoya wali mbali wabudduwa omatugumanoni walihu. Kemelile yeka yahimela vina abali atanu a elabo ya Suwesia. Miyo ddahipamgarazeya venjene vawonilemi arogora addikubataga vina amukubattaga mwanaga. Miyo ddahapamga wila nali Deretu, masiki dhawene awene anivelelavi mpaka numba ya egumi. Ngovi ejile yapadduwile yahinoniha okwela wa Yehova. Nipadduwo ntti ninnikamihedha iyo wakwela abali vamodha na arogora, ninnikamihedha vina wunuwiha otamalela na omukwela wehu Yehova.” Onuwubuwela nsaka nasegedheyile weyo bugafuna nikamihedho nanda abali na arogora aukamihedha?
16. Dhilobo gani dhinnittukulela iyo watonyihedha ena okwela?
16 Katanalela yopurelamoya nigatonyihedha okwela attu ena. Iyo ninowapamgarhaza abali na arogora mmidhidhini dhorutxa. Iyo ninolibiha wiwanana wa nlogo na Mulugu. Ninotonyihedha wi nili anamafwara a Yezu nigaweddihaga abali na arogora na mukalelo wororomeleya. Mwa dhetedhene iyo ninomuttittimiha ‘Babi onneddela ttagaraga, Mulugu onnipangarhaza’ Yehova. (2 Kor. 1:3) Nona notene ninofwanyela olagihagavi okwelana nekalelo y’obali!
JIBO 130 Nilevelelanege
^ par. 5 Yezu wahawaddela anamafwara aye wi mugakwelagana attu anere oziwa wi muli anamasunza aga. Iyo ninotamela olagiha okwela oku. Iyo ninolagiha wi ninowakwela abali ehu vamodha na arogora nigavilibihedha wakwela ninga—munakwelela iyo amudhihu. Nsunzo ntti ninela onikamihedha wunuwiha okwela vina okalavi wofiyedheya na abali vamodha na arogora a mmulogoni.
^ par. 55 FOTO YA NIKUKU: Munddimuwa wa mulogo wa muzombwe onosunza dhilobo dhamakamaka sabwa ya odhowa omwaredhela munddimuwa mukwaye wowunuwelavo. Awene anolagiha okwela sabwa yowaredhelagana muttu na mukwaye akalaga attu atapuwa mada.
