Nsunzo 3
Muttitti Munddimuwa wa Mabila Mena Onomuttittimiha Mulugu vina Kristu
“Mperhe bwa Mulugu wehu, ogilatile vampaddoni, vina bwa Mwana-Nibila.”—OVUH. 7:10.
JIBO 14 Nimuttabele Mwene Muswa wa Elabo
DHINASUNZE IYO *
1. Diskursu yakosiwe vamatugumanoni a ttattamwa wa yaka ya 1935 edhile dhavi opatta egumi ya muzombwe oddule?
MUZOMBWE dhahi wana vyaka 18 obatiziwe yaka ya 1926. Ababe ali Anamasunza a Bibilia, nikuru ninziwiwa masaka abano ninga Anamoona a Yehova. Ana ayima atanu, araru ana alobwana, anayana eli, asunzihilani omulabela Yehova Mulugu amutagihaga Yezu Kristu. Ninga mwaziweyelani masakene abale muzombwe oddule wanja mukatte wamwa vinyu va muttuponi wa wubuwela okwa wa Yezu. Mbwenye egumi yaye yahidha otxinja mwewaliye diskursu sabwa ya “Muthithi Munddimuwa.” Diskursu eji yakosiwe vamutugumanoni wa ttattamwa wa yaka ya 1935 na mbali Joseph Franklin Rutherford elabo ya Washington, D.C., U.S.A. Ebaribari gani evituliwe vamutugumanoni obule?
2. Ebaribari gani evitulile Mbali Rutherford va diskursuni yaye?
2 Mudiskursuni mwaye mbali Rutherford, wahaloga abale ankosa mpaddi wa “muthithi munddimuwa” olebiwe va Ovuhulela 7:9. Diskursu eji ehinatti okosiwa, awene obuwela wi muttitti munddimuwa nali nikuru nina nana mroromelo ning’onovi mottiyana na attikitteliwi agadhowile okala wirimu. Mbali Rutherford, wahilabihedha malebo wi atapulelemo wi muttitti munddimuwa kuwasakuliwe wi wakale wirimu, mbwenye awene Akristu ankosa mpaddi wa mabila mena * anaviluwe “mmasosoni manddimuwa,” anakale velaboni yavati namukala-kala. (Ovuh. 7:14) Yezu wahiloga: “Apa ddikana [mabila] menagu ahili muthagani-mpu. Enofuneya ddakukuse vina, ewe nzu naga, adhé akale nikuru nimodha na mukumbuzi mmodha bahi.” (Jo. 10:16) Mazu aba ‘mabila mena’ anaddiwana Anamoona a Yehova ororomeleya anna njedhelo na okala velaboni ya vati na mukalakala Mparaizu. (Mt. 25:31-33, 46) Ndoweni nitanaleleni txeza eji ya ebaribari edhile otxinja mubuwelo wa alabeli enjene a Yehova, otaganyiha na mbali oddule waana vyaka 18.—Masal. 97:11; Gano 4:18.
ONONELIWAMO WA MUSELU OBU MUSWA OHISADDULA DHUBUWELO DHA ATTU ENJI
3-4. Mutugumano wa 1935, attu enjene ononelimo eni sabwa ya njedhelo nawa, nanda sabwaya jani?
3 Mudhidhene obule wa matugumanoya, mbali Rutherford wahakumbirha otene alivo alogaga dhahi: “Otene abale anna njedhelo n’okala velaboni ya vati na mukalakala emele.” Mbali walivo ohiloga wi, mwa attu 20.000 alivo awinjivaya ahimela. Mbali Rutherford wahiloga: “Koonani! Muttitti munddimuwa!” Sabwa ya ejuwene abale ali vamutugumanoniva ahiziveliwa venjene ofiyedha wooba mada owiweya. Abale emelile ahinonelamo wi Yehova kasakulile wi akale wirimu. Awene ahiziwa wi kattikitteliwe na muya wokoddela wa Mulugu. Labo nanawili na matugumanoya, attu owakwana 840 abatiziwa, enjiya ankosa mpaddi wa mabila mena.
4 Mmalile diskursuya, muzombwe oddule ologiwe omaromo, na attu matxikwi menjene ahittiya oja mukatte vina omwa vinyu va Muttuponi wa Wubuwela Okwa wa Yezu. Mbali mmodha na ovyeviha wahiloga mukalelo wewamo iyene na abali ena mulogeliye dhahi: “Oromana yaka ya 1935 miyo ddahittiya oja mukatte na omwa vinyu va Muttuponi wa Wubuwela Okwa wa Yezu. Ddahiziwa wi Yehova kaddisakulile na muya waye wotxena wi ddakale wirimu, mbwenye ddanziwa wi ddinele okala velaboni ya vati na mukalakala, ddikamihedhaga osasanyedhiwa wa paraizu.” (Rom. 8:16, 17; 2 Kor. 1:21, 22) Oroma mudhidhene obule mpaka masaka abano, muttitti munddimuwa onowunuwavi, olabaga oku-noku na attikitteliwi ahalilewo masaka abano.
5. Yehova onawoona dhavi abale anttiya oja mukatte, omwa vinyu va Muttuponi wa Wubuwela Okwa wa Yezu?
5 Oromana yaka ya 1935 Yehova wawona dhavi abale attiyile oja mukatte na omwa vinyu va Muttuponi wa Wubuwela Okwa wa Yezu? Ki masaka abano akala mbali obe murogora onja mukatte, vina omwa vinyu va Muttuponiva nanda aziwa wi kankosa mpaddi wa attikitteliwi? (1 Kor. 11:28) Na mukalelo wakakene ena onoja mukatte na omwa vinyu va Muttuponi wa Wubuwela Okwa wa Yezu sabwa ya ohinonelamo njedhelo nawa. Mbwenye awene aganonelamo yovonya yawa, na ovyeviha attiya oja mukatte na omwa vinyu va Muttuponi wa Wubuwela Okwa wa Yezu, akalavi oororomeleyene vamentoni va Yehova, iyene onele wataganyiha na mabila mena. Masiki dhawene, awene anelege okala va Muttuponi wa Wubuwela Okwa wa Yezu wi atonyihedhe otamalela wawa mwa ejile yakoseli Yehova na Yezu.
NJEDHELO NOWAGALALIYA
6. Nlamulo gani navahile Yezu angelo?
6 Vowi goyi enddimuwa eli vakuvi, ninolibiheya nigobuwela enloga Ovuhulela kapitulu 7 sabwa ya Akristu ottikitteliwa vina muttitti munddimuwa wa mabila mena. Yezu ahawaddela angelo wi attiddelevi komo nayi dha pevo wi enanonge elabo. Awene kanattiye pevo ya otolotxa ogwela mwilaboni Akristu otene ottikitteliwa ahinatti opidiwa vakoveni, eji entapulela orumeliwa na Yehova. (Ovuh. 7:1-4) Nlivo ninakele abali aba Akristu, tta okala anamakutta, amwene, vamodha na Kristu wirimu. (Ovuh. 20:6) Anamudhi otene a Yehova ali wirimu anere wagalala sabwa ya wawona attikitteliwe 144.000 akelaga nlivo nawa wirimu.
Muttitti munddimuwa na dhabalo dhotxena vina na makubari a mwinddu mmadani mwawa, bemelile osogorho wa mpaddo wa Mulugu na wa Mwana Nibila (Kang’ana ddima 7)
7. Ninga munlogela Ovuhulela 7: 9, 10, txini yonile Joau, vina aweneya yakosa ni? (Kang’ana foto ya kapa.)
7 Mmalile Joau ologa mwaha wa attikitteliwe 144.000 ninga amwene vina anamakutta, iyene wahoona vina elobo yotikiniha, “muthithi munddimuwa” oviluwile va Armageddón. Mottiyana na nikuru noroma, nikuru ntti nanawili, kaninwodha welegeya. (Kengesa Ovuhulela 7:9, 10.) Awene “ahabalela dhotxena” eji entapulela wi awene ahivirabeliha “dhotakala dha mwilaboni” ya Satana vina alivi ororomeleya vamentoni va Mulugu vina Kristu. (Tia. 1:27) Ankuwa na nzu noliba sabwa ya ovuniwa wawa na Mulugu vina Yezu, Mwana Nibila wa Mulugu. Awene vina ahittiddeela makubari a mwinddu mmadani, eji enoniha wagalala wawa vowi ahirumeela wi Yehova omuttoma Yezu ninga Mwene.—Kaladdaniha na Joau 12:12, 13.
8. Txini ennaddela Ovuhulela 7:11, 12, sabwa ya anamudhi a Yehova wirimu?
8 Kengesa Ovuhulela 7:11, 12. Txini ekosile abale ankala wirimu moonelani muttitti munddimuwa? Joau wahawona anamudhi a Yehova wirimu owagalalene amuttittimihaga Mulugu vina amutamalelaga sabwa ya muttitti munddimuwa. Anamudhi otene a Yehova anele wagalala agoona wakwanihedheya wa nivuhulo ntti, nsaka ninaviluwe muttitti munddimuwa mu goyini enddimuwa.
9. Mowiwanana na Ovuhulela 7:13-15, mabasa gani ankosa muttitti munddimuwa ovanene?
9 Kengesa Ovuhulela 7:13-15. Joau wahileba wi muttitti munddimuwa ba bale “afulile dhabalo dhawa akoddelihaga na nikame na Mwana-Nibila.” Eji entapulela wi awene ahikana mubuwelo wotxena vina anofwanyela okala vamentoni va Yehova. (Iza. 1:18) Awene Akristu obatiziwa avivelelile aroromelaga mukutto wa Kristu, vina ana mandano ofiyedheya na Yehova. (Jo. 3:36; 1 Ped. 3:21) Nona agakala osogorho wa mpaddo wa Mulugu amulabelaga “mathiyu na mutana” mmusanani mwaye velaboni ya vati. Ovano awene anolaba na nttokoso alaleyaga miselu dhapama vina wakosa anamafwara sabwani Omwene wa Mulugu ji elobo yamakamaka mwigumini mwawa.—Mt. 6:33; 24:14; 28:19, 20.
Muttitti munddimuwa wa mabila mena abudduwaga mugoyini enddimuwa nowagalala (Kang’ana ddima 10)
10. Nikuluvelo gani nina muttitti munddimuwa, vina anjeedhela wakwanihedheya mavuhulo gani?
10 uttitti munddimuwa ogaviluwa vamasosoni manddimuwa, onele okana ebaribari wi Mulugu “ogilatile vampaddoni, onere wawamelelaga malabo etene.” Nivuhulo ninjeedha muttitti munddimuwa ninele wakwanihedheya. “Mulugu oner’okuputha muntori bu muntori wa mmentoni mwawa. Kunakale vina okwa, kutho, obulela, segedho.”—Ovuh. 21:3, 4.
11-12. (a) Mowiwanana na Ovuhulela 7:16, 17, mareliho gani anjeedhela muttitti munddimuwa? (b) Txini enfanyela okosa mabila mena va Muttuponi wa Wubuwela Okwa wa Yezu nanda sabwaya jani?
11 Kengesa Ovuhulela 7:16, 17. Masaka abano, ena a nlogo na Yehova anotabuwa sabwa ya makattamiho ottiyana-ottiyana anapatta,ninga oredda, oyelegela kobiri wila agulena dhoja vina omwalamwala sabwa ya koddo. Ena anofugeliwa mukambura sabwa ya nroromelo nawa. Masiki dhawene, abale ankosa epaddi wa muttitti munddimuwa onoziwa wi agaviluwa mwilaboni ejino enlamuleliwa na Satana, kanakanege dala, anelege okanavi oja gwé womuyani vina womaningoni. Yehova agamutolotxa Satana na elabo yaye, onele okamihedha nikuru na muttitti munddimuwa, nne kaninatabuwege na “oviha” onladdanihiwana na owali wa Satana. Masoso manddimuwa agavira, Yezu onele wavelela anaviluwe vali “manje ankaliha egumi” yohimala. Ovano kobuwela, muttitti munddimuwa ohikana njedhelo nowagalala. Attu matxikwi na matxikwi anakalehovi kanaakwe vina!—Jo. 11:26.
12 Mabila mena ahikana njedhelo na pama ninattukulela awene omutamaalela Yehova vamodha na Yezu! Nikuru na mabila mena kanisakuliwe wi nakale wirimu, ejo kintapulela wi awene kana ttima vamentoni va Mulugu. Awene ahikana njedhelo nowagalaliha vina napama, ninattukulela omutamaalela Yehova vamodha na Yezu. Makuru aba omeli anowodha omutamaalela Mulugu vamodha na Yezu. Mukalelo mmodha wa okosa ejuwene bwa odhowa Omuttuponi wa Wubuwela Okwa wa Yezu.
KAVAHA TTIMA OKALA VA MUTTUPONI WA WUBUWELA OKWA WA YEZU
Mukatte na vinyu dhigavirihiwaga va Muttuponi wa Wubuwela Okwa wa Yezu dhinonubutxedha wi Yezu ohikwa vamburoni vehu wi nikaane egumi (Kang’ana ddima 13-15)
13-14. Txini enattukulela otene okala va Muttuponi wa Wubuwela Okwa wa Yezu?
13 Vyaka dhovanene vangumana attu 1.000, mmodhavo ddinja mukatte ddinmwa vinyu va Muttuponi wa Wubuwela Okwa wa Yezu. Milogo dhowinjiva kamuli attikitteliwi. Enji ankala va Muttuponi wa Wubuwela Okwa wa Yezu njedhelo nawa ttokala velaboni ya vati. Egali dhawene, txini enattukulela okala va Muttuponiva? Enattukulela awene okalavo, jakakene enattukulela attu okala vamateloni va marho awa. Awene anokalavo wi atonyihedhe wakwela wawa vina wakamihedha atelaniya. Na mukalelo wakakene, mabila mena anokalavo va Muttuponi wa Wubuwela Okwa wa Yezu, wi atonyihedhe omukwela vina omukamihedha Yezu Kristu na attikitteliwi. Nikuru na mabila mena anokala va Muttuponi wa Wubuwela Okwa wa Yezu sabwa y’otamalela ejile ekosile Yezu. Mukutto obu onele oniwodhiha okala na mukalakala velaboni ya vati.
14 Mwaha mwina onattukulela mabila mena okala va Muttuponi wa Wubuwela Okwa wa Yezu, bwawi atonyihedhe wiwelela nlamulo nttile Yezu. Vetileyi muttupo obu na anamafara aye ororomeleya, wahawaddela dhahi: “Ejiya eragavi, muddubuwelaga miyo.” (1 Kor. 11:23-26) Mabila mena anodhowa va Muttuponi wa Wubuwela Okwa wa Yezu vina anowawobelawo attu ena dhahene ninga attikitteliwi aliwovi masaka abano.
15. Muttu-muttu wa iyo, onawodhe dhavi omwagalaliha Yehova vamodha na mwanaye Yezu Kristu va Muttuponi wa Wubuwela Okwa wa Yezu?
15 Nigakala va Muttuponi wa Wubuwela Okwa wa Yezu, ninokaana gari ya omutamaalela Mulugu vina Kristu modhela wiba vina okosaga malobelo. Mutoma wa diskursu wa yaka ejino bubu “Kavaha Ttima Yukoseli Yehova vina Yezu!” Eji enele wunuwiha omutamaalela wehu Yehova vina Kristu. Mukatte vina vinyu dhigavirihiwaga, ninele wubuwela ejile entapulela—maningo a Yezu vina nikami naye. Ninele wubuwela vina wi Yehova omuruma Mwanaye wi akwe vamburoni vehu wi nikaane egumi ya mukalakala. (Mt. 20:28) Iyo notene, ninomukwela Babi wehu wa wirimu vina Mwanaye nona ninofuna okalavo va Muttuponiva apo.
OMUTAMALE YEHOVA SABWA YA NJEDHELO NUVAHILIYE
16. Mabila mena na attikitteliwi anligana dhavi?
16 Yehova kanvaha ttima ottiyana wa mabila mena na attikitteliwi. Makuru aba omeli battima vamentoni vaye. Yehova opitxele muttengo mmodhene egumi ya Mwanaye, ottiyana olivo wa makuru aba omeli tti njedhelo nawa. Makuru aba omeli onofanyela okala ororomeleya vamentoni va Mulugu vina Kristu. (Masal. 31:23) Kobuwela wi muya wa Mulugu onolaba na mukalelo woligana mwa makuru omeli. Eji entapulela wi Yehova onolabihedha muya waye wotxena wi amukamihedhe muttu ddi muttu n’ejile enimujombela.
17. Txini enjeedhela attikitteliwi wona musogorho?
17 Akristu ottikitteliwa kambaliwana njedhelo ntti na odhowa okala wirimu. Njedhelo ntti wavahile ddi Mulugu. Awene anotanaalela njedhelo nawa vina anolobelela, ajeedhaga wakela nlivo nawa na okala wirimu. Awene kanziwa mukalelo onakale mwili wawa agakala wirimu. (Fil. 3:20, 21; 1 Jo 3:2) Masiki dhawene, awene anojeedhela ogumana na Yehova, Yezu, angelo na attikitteliwi ena, Awene anofuna okala mumpaddoni mwawa Mumweneni wa wirimu.
18. Txini enjeedhela wona mabila mena?
18 Mabila mena njedhelo nawa ttokala velaboni ya vati namukalakala. (Kohelét 3:11) Awene anojeedhela okamihedha osaddula elabo yotene ya vati wi ekale paraizu. Awene anojeedhela wona yapikirele Yehova, omaga numba dhawa wi akalegemo anya vina munalelagani aniwa na egumi yoligana. (Iza. 65:21-23) Anele weeddela mmimburoni dhottiyana-ttiyana—wi one dhothandda dha Yehova ninga myango, mattaka, bara—na dhilobo dhina dhili mwilaboni dhittanddile Yehova. Mwa dhetedhene, awene anojeedhela wona mandano awa na Yehova agali ovaddene vina ofiyedheya.
19. Wubuwela Muttupo wa Okwa wa Yezu onnipuriha okosa eni, vina mwawuno Muttupoya onobuweliwe siku gani?
19 Yehova ononvaha muttu-muttu oli mulabeli waye njedhelo nowagalaliha na musogorho. (Jer. 29:11) Va Muttuponi wa Wubuwela Okwa wa Yezu, muttu-muttu wa iyo, onopura mudhidhi wa omutamaalela Mulugu vamodha na Kristu sabwa ya ejile ekosilani ya onivaha gari ya okana egumi yamukalakala. Kavali waganyedha wi otugumana vamodha va Muttuponi wa Wubuwela Okwa wa Yezu, elobo ya ttima mwigumini mwa Akristu. Muttupo obu onakosiwe siku na Sabuddu malabo 27, a Marsu yaka ya 2021 omaddowelo wa nzuwa. Anamudhi ena ali mmimburoni dhofaseya munakosani Muttupo obu s’emakattamiho. Ena anelevi wona masiki na ofarafariwa. Enagu anofanyiwa makattamiho a wubuwela muttupo obu sabwa ya okala mukambura. Masiki dhawene, Yehova na Yezu vina amudhi a Mulugu ali wirimu anowawoona masiki akala ali mmulogoni, nikuru obe muttu yeka!
JIBO 150 Mmwiwelele Mulugu wi Muvuneye
^ par. 5 27 a Marsu, 2021, ninakale labo namakamaka na Anamoona a Yehova. Sabwani ninakale siku ninobuwelani Muttupo wa O kwa wa Kristu. Ena anoone muttupo obu anokosa mpaddi wa abale aalogile Yezu ‘mabila mena.’ Ebaribari gani yotikiniha evuwihiwe sabwa ya nikuru ntti yaka ya 1935? Txini enjeedhela mabila mena enapadduwe goi enddimuwa egavira? Nikuru na mabila mena ninimutamalela dhavi Mulugu vina Kristu agakala va muttuponi wa wubuwela okwa wa Yezu?
^ par. 2 MAZU MENA ATAPULELIWE: Mabila mena anaddiwana alabeli a Yehova ororomeleya vina na abale anivitaganyiha na nlogo ntti na Yehova masaka abano omariha. Awene aninfara Kristu vina ahikana njedhelo n’okala velaboni ya vati na mukalakala. Muttitti munddimuwa ba abale ankosa mpaddi wa mabila mena anakalewovi nsaka ninadhe Kristu ottonga malogo, vina anaviluwe mugoyini enddimuwa.
