1. Dhahene ninga Mwene David, ena wa iyo ankosa nivuzo gani?

IYO notene ninofuna okalawo nofwasa vina na murenddele. Vowi kawo wa iyo onziveliwa okala odhugudheyene. Masiki dhawene, mudhidhi mwina ninokalaga wodhugudheyene. Nona ena mwa iyo anokosa nivuzo nakakene namukosile David Yehova nawi: “Murima waga onavume siku gani musegedhoni?”—Masal. 13:3.

2. Txini dhinasekeserhe iyo mwari mwa nsunzo ntti?

² Mokubanyiha-mwene, kaninwodha ovifurula sabwa ya odhugudheya mbwenye ninowodha ovyang’anela. Munsunzoni ntti, ninela osekeserha dhilobo dhing’onog’onovi esuwene dhinittiya odhugudheyene. Vina ninele woona mikalelo mitanu nammodha esuwene dhinanikamihedhe okala ofwaseyene nigagumanagana makattamiho.

3. Makattamiho gani angumanihuna, koddi iyo ninela owodha ovibarela?

³ Dhilobo dhina dhinnitotela odhugudheya kaninwodha obarela. Ninga motagiha, vyaka dhotene muttengo wa dhowabala, dhoja na wopitxela numba onowelavi, mbwenye iyo kaninwodha obarela. Iyo kaninwodha ovibarela mudhidhi wotene ontamela amarho ehu a omabasani vina akwehu a oskola aganikukuselaga okosa dhilobo dhohikala. Vina iyo kaninwodha ogomiha opanga ompadduwa mmuruddani mwehu. Dhilobo esi dhinopadduwa vowi attu awinjivaya ali mwilaboni  kanfara magano ali mBibiliani. Satana mulamuleli wa elabo ejino onoziwa wi “ozuzumela dha vati” onodha wabarela attu ena omulabela Yehova. (Mt. 13:22; 1 Jo. 5:19) Nona iyo kaninaganyedha nigoonaga mwilaboni bamudhalile makattamiho menji andhugudha!

4. Txini ennipadduwela nigagumanaga na makattamiho awinjiva?

⁴ Nigagumanaga na makattamiho awinjiva ninokala odhugudheyene. Motagiha, iyo ninokala odhugudheyene nigahikaana muhaku onakwanela ogulana dhojombeliwa dhehu, obe ninowova wila oredda onadhe onittabwele nihikaane guru yolaba nifiyedhe oyelela ganyo. Vina ninozuzumeyaga venjene novaga okosa yottega egamusilidhile Yehova. Mohigonela Satana onela walabihedha akamihedhi aye wi alupele nlogo na Mulugu. Mwa dhawene iyo ninodhaga odhugudheya sabwa ya ohiziwa enakosihu nigadha olupeliwa. Txino ninovivuza ‘Koddi jabure iyo ozuzuma sabwa ya dhilobo eso?’

5. Txini yafuna ologa Yezu na mazu aba: “Kamuzuzumeletxe”?

⁵ Iyo ninoziwa wila Yezu wahiloga na anamafara aye wi “Kamuzuzumeletxe.” (Mt. 6:25) Koddi Yezu wafuna aloge wi iyo kaninfwanyela ozuzumela elobwene? Kahiye mwenemo! Ebaribariya jawi Yezu wela onipangarhaza iyene kanfuna wi iyo nidhugudheye na makattamiho a mwigumini mwehu ofiyedha opatta mandano ehu na Yehova. * (1 Amwe. 19:4; Masal. 6:3) Nsaka nawale alabeli enjene a Yehova anfanyiwa makattamiho attiya odhugudheyene, masiki dhawene kattiyile omulabela Mulugu n’ororomeleya. Txini enakosihu nigafwanyiwa makattamiho anttiya odhugudheyene?—Kang’ana kasha “ Ninawodhe Dhavi.”

6. Mowiwanana na Filipi 4:6, 7, txini enanikamihedhe iyo okala ofwaseyene?

⁶ (1) Olobelege mudhidhi wotene. Ogadhugudheya venjene kalobela okumbiraga nikamihedho na Yehova. (1 Ped. 5:7) Iyene onele wuvaha ‘murenddele wa Mulugu ompitta ttontto ya muttu.’ (Kengesa Filipi 4:6, 7.) Na guru ya muya waye wokoddela Yehova onele wukamihedha okala wofwaseyene.—Gal. 5:22.

7. Nigalobelaga Txini enfwanyelihu okana muyubuweloni?

⁷ Ogalobelaga kamfugulele Yehova murima wawo vina kakala wotapuwa. Kamwaddele makattamihoya vina kamutapulelemo mukalelo oniwamo weyo. Akala makattamiho awo akana mukalelo wa ogoma, kamukumbirhe Yehova wi awuvahe guru ya owodha ovirihamo malagoya. Akala kangoma, kamukumbirhe wi iyene awukamihedhe ohizuzumeletxa makattamihoya. Ogakala otapuwa mmalobeloni mwawo onowona mwawakwana-mwene mukalelo onakula Yehova malobeloya. Yowakula ya nlobelo nawo egahidha mowaguva Kadidela olobelagavi. Yehova kanjeedhela bahi wi okale wotapuwa mmalobeloni mwawo, iyene onfuna wi weyo okalelevi ntidi olobela.—Lk. 11:8-10.

8. Txini enfwanyela iyo wika mmalobeloni mwehu?

⁸ Ogamperhekelaga Yehova dhinudhugudha katamela omutamaalela. Masiki nikalaga mmakattamihoni jaderetu otanalela dhilobo dhapama dhinehuna. Akala wile osegedheya vopitta ohikana mazu a ologa, kudduwale wi Yehova onowakula malobelo a ovevuwa ninga ‘Ddinokumbirha muddikamihedhe!’—2 Map. 18:31; Rom. 8:26.

9. Ninafwanye wuvi nibarelo natxibarene?

 ⁹ (2) Kakuluvela eziwelo ya Yehova ottiya yawo. Nsaka nikalilewo namavuhulela Izaiya nlogo na Juda nantxutxiwa na akadda Asiriya. Awene ahova vaddiddi ofiyedha okumbirha nikamihedho na akadda Ejipitu. (Iza. 30:1, 2) Yehova wahawaddela wila wakuluvela akadda Ejipitu ogahattottela ngovi. (Iza. 30:7, 12, 13) Yehova wahimwaddela Izaiya wi aloge na akadda Juda ogafwanyilani nibarelo nebaribari. Iyene wahakuluveliha na mazu aba: ‘Guru dhenyu dhinda mugakala wofwaseyene vina mugaddiroromela.’—Iza. 30:15b.

10. Makattamiho gani anfwanyeela iyo otonyihedha wi ninomukwela Yehova?

¹⁰ Ninawodhe dhavi ontonyihedha wi ninomukuluvela Yehova? Kobuwela dhotagiha dhing’ónovi. Katanalela buvahiwe ganyo enna kobiri gwé mbwenye ehinuvaha mudhidhi wa otanalela dhilobo dhomuyani. Obe kobuwela wila wa muziye nanda mukwawo womabasani ohili munamoona wa Yehova oroma wufuna. Obe mmudhawo ohili mukristu ologa wi osakule enfuniwe: “Miyo obe Mulugu wawo.” Enorutxa okosa yosakula ya malago mmakattamihoni aba, mbwenye kudduwale wi Yehova onele wuvaha malago anfuniwe. (Mt. 6:33; 10:37; 1 Kor. 7:39) Nivuzo ttintti, Weyo onele omukuluvela Yehova vina onele ofwara malago aye?

11. Mapadduwo gani ali mBibiliani ananikamihedhe iyo okala ofwaseyene nigafanyiwaga makattamiho?

¹¹ (3) Kasunza na dhotagiha dhapama vina dhabure. Mbibiliani muhikala mapadduwo anooniha ttima yokala wofwaseyene vina omukuluvela Yehova. Ogasunzaga mapadduwo abo kafwaseyela wona txini yakamihedhe alabeli a Yehova okalavi ofwaseyene mudhidhi wagumananina makattamiho orutxa. Motagiha, mudhidhi wakooddihiwe arumiwi olaleya muselo wa Yezu na anddimuwa a mmuttengoni w’o Juda awene koovile. Na oliba murima ahiloga dhahi: “Enfuneya kumurumela Mulugu opitha athu.” (Mer. 5:29) Masiki omamalelowa vawasuliwani, awene koovile elobwene. Sabwaya? Sabwani awene ahiziwa wi Yehova wali nawene vina wahagalala sabwa ya ejile yakosilani. Nona awene ahididelavi olaleya miselu dhapama. (Mer. 5:40-42) Yotagiha yina yamakamaka ja murumiwi Estevau; mudhidhi wafuniye opiwa iyene wali wofwaseyene ofiyedha kove yaye ‘ongánimela n’ekalelo ya anju.’ (Mer. 6:12-15) Sabwaya? Sabwani iyene wahikaana ebaribari yawi Yehova agahagalala na ejile yakosileyi.

12. Mowiwanana na 1 Pedro 3:14 na 4:14, ninfanyeelelani wagalala nigafara-fwariwaga?

¹² Arumiwi akana ebaribari wi Yehova walivi nawene. Awene ahakela guru ya Yehova yawodhiha okosa matikiniho. (Mer. 5:12-16; 6:8) Masaka abano ejo kimpadduwa. Masiki dhawene, Nzu na Yehova ninonilibiha nigafanyiwaga makattamiho, nigapujiwaga iyene onowagalala na merelo ehu vina ononivaha muya waye. (Kengesa 1 Pedro 3:14; 4:14.) Nona kugilatele wubuwela txini enakosiwe ofwarafwariwa ogaroma, ottiya ejo kazuzumela wunuwiha omukuluvela wawo Yehova ororomelaga wi iyene onele onikamihedha vina onele onivuna. Dhahene ninga anamafwara oroma kakuluvela mazu aba alogile Yezu awi: “Ddinere ouvahani thontho yoawakulana amwiddani enyu, ahiwodhe oupambihani.” Iyo vina ninokuluvela mazu aba awi: “Mukalelevi ntidi, muner’ovuneya.” (Lk. 21:12-19) Txipo kudduwale wi masiki mudhari wororomeleya akwe, Yehova onomubuwela na mikalelo dhaye dhotene dhapama vina onele onvenyiha mukwani.

13. Ninsunzavo eni na dhotagiha dha abale ahakalile ofwaseyene vina ahamukuluvelile Yehova?

¹³ Iyo vina ninosunzavo elobo nabale ahikalilevi  ororomeleya vina omukuluvela Yehova. Osunza dhotagiha esi dhabure enere onikamihedha iyo vina ohigwela mmuregani mwakakene. Ninga motagiha, omaromelo-wene wa ottonga wa Mwene Asa nikuru nddimuwa na anyakoddo nahidhowa owana na akadda Juda, Asa wahimukuluvela Yehova nona wahimukamihedha opemberha. (2 Map. 14:9-12) Vasogorhova, Mwene Basa w’o Izrayel wahilupela nlogo na Juda na anyakoddo aye ang’onovi, ottiya omukuluvela Yehova ninga mwakoseliye omaromo, Asa wahimbehedhana sagwati mwene w’o Asiriya wi amukamihedhe. (2 Map. 16:1-3) Omamalelowa valiye muredda vaddiddi Asa kavedile nikamihedho na Yehova.—2 Map. 16:12.

14. Txini ensunzihuvo na dhovonya dha Asa?

¹⁴ Omaromo, Asa wahitamela nikamihedho na Yehova vafwanyiwiye makattamiho. Mbwenye osogorhowa iyene wahisakula weddiha makattamiho aye yeka, sabwa ya ejuwene dhakosiye kadhamweddela pama. Omaromelo-wene yakala ninga nikamihedho nakumbirileye na Asiriya n’ahilaba mbwenye vasogorhova yahidha woneya wila okule wali otuwa malago. Yehova wahimpanga namavuhulela wi amwaddele dhahi: “Nyuwo kammukuluvelile Nabuya [Yehova] Mulugu wenyu, mudhile omukuluvela mwene w’o Síria. Nona anyakoddo a mwene w’o Síria awuvuluwani mmadani mwenyu.” (2 Map. 16:7) Iyo vina ninofwanyela okala txenjewa sabwani nindaga wubuwela wi ninogomiha makattamiho nooka se ohifwara magano a Yehova anfwanyeya mBibiliani. Masiki efuneyaga okosa yogana yomaguva ninofwanyela okala wofwaseyene vina okuluvela wi Yehova onele onikamihedha wi dhotene dhinedele pama.

15. Txini enfwanyela iyo okosa nigamwengesaga Bibilia?

¹⁵ (4) Kakoya Malebo muyubuweloni. Ogamwengesaga Bibilia weyo onele ofwanya malebo anvaha ttima okala wofwaseyene vina omukuluvela Yehova. Egakala yofuneya kengesa na lizu nowiweya vina katamela olebela vego. Yehova wahimuruma Josuwé wi engesege malabo etene na mmirimani mazu a nivuru na Malamulo. Ejo kigamukamihedhile bahi iyene okala muttu wa eziwelo, mbwenye egamukamihedha opemberha wova ogakaniliye mmabasani attomeliwiye. (Jos. 1:8, 9) Na mukalelo wakakene maversikulu awinjiva ali mBibiliani anele wukamihedha weyo okala ofwaseyene mmakattamihoni agauttiyile odhugudheyene vina na wova.—Masal. 27:1-3; Gano 3:25, 26.

16. Yehova onlabihedha mulogo na mukalelo gani wi anikamihedhe okala wofwasa vina omukuluvela iyene?

¹⁶ (5) Otugumanegevi na nlogo na Mulugu. Yehova onowalabihedha abali wi anikamihedhe iyo okala ofwaseyene vina omukuluvela iyene. Mmatugumanoni mwehu ninolibihiwa na dhipaddi ninga, dhowakula, makani aderetu anlogihu na abali vamodha na arogora, ottiya ejuwenevi elobo enikamihedha iyo okala otapuwa ku okana amarho okuluveleya mmulogoni. (Aheb. 10:24, 25) “Mazu apama” a marho wehu anonipangarhaza vina anoluluviha odhugudheya wehu.—Gano 12:25.

17. Mowiwanana na Ahebreu 6:19, njedhelo na Omwene ninimetxa dhavi mmakattamihoni orutxa?

¹⁷ (6) Kalibiha njedhelo nawo. Njedhelo nehu na Omwene wa Mulugu nili “ninga nángura onlikiha mwanddiya” ninonimetxa pwi nigafwanyiwa makattamiho orutxa obe nigapattiwa na odhugudheya. (Kengesa Ahebreu 6:19.) Ovano katanalela ejile elibelile okosa Yehova musogorho, mwenemo munagome dhubuwelo dhotedhene dhabure. (Iza. 65:17) Kaviyubuwele buli mwilaboni eswa mwenemo muhinaakale makattamiho vina munagome dhilobo dhotene dhinnittukulela odhugudheya masaka abano.  (Mik. 4:4) Weyo onela olibiha njedhelo nawo modhela wawaddela attu ena. Kakosa mwili mwetemwene mmabasani a olaleya vina wakosa anamafwara. Ogakosa dhawene ‘nroromelo nawo ninela olibavi mpaka omagomo.’—Aheb. 6:11.

18. Txini enapadduwe musogorho nanda ninfwanyela okosa eni?

¹⁸ Vowi omagomo wa elabo eji onowaddamela, ninelege ogumana makattamiho ananittiyege odhugudheyene. Nlebo nehu na yaka ya 2021, ninele onikamihedha okalavi ofwaseyene vina owanana makattamiho nihikuluvelaga guru dhehu, mbwenye nikuluvelaga mandano anihuna na Yehova. Katonyihedha na merelo wi onokuluvela nlibelo ntti na Yehova: ‘Guru dhenyu dhinda mugakala wofwaseyene vina mugaroromela.’—Iza. 30:15.