Enowodheya Iyo Onsuza Dha Mulugu na Anamavuhulela Aye
Nsaka na wale, anamavuhulela anavuwihedha attu a malogo miselu dhattima vaddiddi, dhadha wa Mulugu. Miselu esi dhinowodha oninonihedhamo mareliho a Mulugu anakelihu? Ndde. Ndoweni nisunze miselu dha anamavuhulela araru ororomeleya.
ABRAHAMU
Mulugu kana nsakulano, iyene onfuna wi attu otone akale maruriho.
Mulugu wahimwaddela namavuhulela Abrahamu dhahi: “ddinoururya, ddinothithimiha nzina nawo; weyo onere wakalela athu nipara na gari.”—Wita 12:2.
Ninsunzavo nni? Mulugu ononikwela vaddiddi, iyene onfuna wi anamudhi-otene animwiwelela akele mareliho—alobwana, ayana na aymaya.
MIZÉ
Mulugu dwa supaje, iyene onofuna wattuva mareliho abale otene onfuna amuziwa.
Namadhulu-dhulu wahinvaha namavuhulela Mizé ewodhelo ya okosana mattikiniho manddimuwa. Nona Mizé alobela: “Akala miyo ddili wororomeleya vamentoni venyu, ddiziwihení mobuwelo enyu; panziwetximi oddiroromela wenyu.” (Obudduwa 33:13) Mulugu wahagalala na yukumbira ya Mizé, nona wahimuriha vina wahinvaha ononelamo wa oziwa mikalelo dhaye. Motagiha, Mizé ohisunza wi Muttanddi “Mulugu wanthebwa, wathagaraga.”—Obudduwa 34:6, 7.
Ninsunzavo nni? Mulugu onfuna anirurihe notene—alobwana, ayana na aymaya—nigatamela omuziwa mowakwana-mwene. Iyene onologa mMaleboni mukalelo wa omwebedha vina okana efunelo ya waruriha abale antamela orumelimwa na iyene.
YEZU
Ttagaraga yana Yezu yanimuttukulela wavulumutxa aredda otene
Iyo nigasunza vina nigavirihamo dhotedhene dhininsunzihile Yezu, ninela ojavo mareliho ananivahe Mulugu.
Mazu a Mulugu anologa miselu dhinjene dha okalawo wa Yezu na masunziho aye. Mulugu wahinvaha Yezu owodha wa okosa mattikiniho menjene, ninga ofugula mento aliba ohona, maru aliba ohiwa vina aragali. Iyene ohavenyiha mukwani attu. Yezu walagiha ezinddiyelo ya mareliho anadhelena Mulugu attu a malogo otene. Iyene ohitapulelamo enfwanyela okosa muttu-muttu wi ajevo mareliho aba na mazu awi: “Egumiyá yamukala-kala, jiji: ouziwani nyuwo Mulugu mmodha, webaribari; omuziwa vina Yezu Kristu, omurumilenyu.”—Joau 17:3.
Yezu wali wattagaraga, wasupaje vina wanttebwa. Alobwana na ayana, azombwe na anddimuwa, anttamagela waliye sabwa ya wiwa mukuwo wawi, nyuwo motene mudhe vali miyo: “Sunzaní dhinira miyo, ddinna murima wofwasa, wokurumuwa. Dhahene munofwawnya osanzaya.” (Mateu 11:29) Mottiyana na ena ahariha ayana, Yezu wannaweddiha ayana na nriho vina nttittimiho.
Ninsunzavo nni? Yezu olagiha okwela onddimuwa nlogo na attu, vina ohinittiyedha tagiha yawaweddiyagana muttu na mukwaye.
YEZU KAHIYE MULUGU
Malebo Okoddela annisunziha wi, “oliwo Mulugu mmodha bahi” vina Yezu Kristu mwana-mukatti wa Mulugu. (1 Korinto 8:6) Yezu wahoniha-wene wi Mulugu munddimuwa opitta iyene vina ddi Mulugu wamurumile odha velaboni ya vatti. —Joau 11:41, 42; 14:28. *
^ par. 17 Kasunzavi miselu dhina mwaha wa Yezu Kristu mwari mwa nsunzu 8 na 9 na brochura Verdadeira Fé—O Segredo de uma Vida Feliz nili mu www.pr418.com.