Javo Okala N’okala-wene Mareliho a Muttanddi Wehu
Mulugu wahimpikirela namavuhulela Abrahamu wi mudhuli wa zizá naye agahakalela nipara na gari “malogo etene a mwilaboni.” (Wita 22:18) Mudhuliya oddu agali ani?
Mwa ovira wa vyaka 2.000, Mulugu wahinvaha Yezu, mudhuli wa Abrahamu, ewodhelo ya okosana matikiniho menjene. Matikiniho aba ezinddiyelo yawi Yezu obudduwile munihimoni na Abrahamu, dhahene ninga mwapikireliwiye wi mudhuli wa zizá naye agahakalela nipara na gari attu a malogo otene.—Galásia 3:14.
Matikiniho akosile Yezu ahoniha wi iyene osakuliwe na Mulugu wi arurihe attu a malogo etene, vina ahoniha mulabelo onalabiye na Mulugu wi aperekele attu maruriho amukala-kala. Karoma wona matikiniho a Yezu azinddiyelihile mikalelo dhaye.
Ttagaraga—Yezu ohavulumutxa aredda.
Siku dhahi, muliba maranya wahimbuluguwela Yezu wi amvulumutxe. Yezu ohimuttidda vina ohilogana: “Ddinofuna, vulumuwa.” Mudhidhi wakakene maranyaya ahivola.—Marko 1:40-42.
Murima wa ovaha—Yezu wahajiha attu anna ddala.
Yezu kafuna wi attu akwege ddala. Iyene wahikosa matikiniho a wajiha attu enjene dila dhowakwana bili. (Mateu 14:17-21; 15:32-38) Otene ahija ahakwanana vina buhalavo oja wina.
Supaje—Yezu wahavenyiha aliba okwa.
Labo dhahi, Yezu aviraga murudda w’o Naim, ohimona muttu wokwa attukuleliwaga omasiye, wali namodha wa muyana wakweliwe mamune. Yezu “oheddiwa thagaraga” ohimvenyiha mwanaya mukwani.—Luka 7:12-15.