Namavuhulela Mizé ohiloga wi nigavirihamo malamulo a Mulugu ninela wakela mareliho aye. (Olibiha 10:13; 11:27) Iyo kannimwiwelela Mulugu sabwa ya wova otxinutxiwa. Mikalelo dhapama dha Mulugu sinittukulela omwiwelela vowi ninomukwela vina ninorabela okosa dhilobo dhigaddhile omunyimula. “Omukwela Mulugu, kuloga ovirihamo malamulo aye.”—1 Joau 5:3.

Omwiwelela Mulugu onnakeliha dhavi mareliho? Karoma wona dhilobo bili.

“Miyo ddili Nabuya [Yehova] Mulugu wawo, onuvaha magano ankaliha, onuvelela mudila dhinfwanyela weyo ovira.” —IZAIYA 48:17.

Yehova Mulugu, Muttanddi wehu, ononiziwa pama, nona iyene ononivelela Mudilani mufwanyelihu wedda. Iyo nigavirihamo ddhinnisunzihiye ninela owodha okosa dhosakula na malago, ninofwanyela osunza Malebo Okoddela wi niziwe ennifunana Mulugu wi nikose vina nivirihegemo ejuwene.

“Agari thabwa-thabwa babale aniwa nzu na Mulugu, avirihagamo!”—LUKA 11:28.

Masaka abano, attu matxikwi na matxikwi anvirihamo Mazu a Mulugu anokana wagalala watxibarene. Ninga motagiha, karoma wona empadduwele mulobwana dhahi wa elabo ya Espanya, iyene wali muttu waweddiha akwaye n’obure vaddiddi—vamodha na mwadheyeya. Labo dhahi wile wengesa Malebo a navuhulela Mizé aloga dha okurumuwa wa José, mwana Jakob. José wahiguliwa ninga mudhari vina wahipujiwa na ofugeliwa mukambura, masiki na opujiwa oku, iyene walivi wukurumuwa, wawedheyana vina wolevelela. (Wita, kapitulu 37-45) Mulobwana oddule ohiloga: “Ddinotamalela yotagiha ya José ehiddikamihedha okala muttu wokurumuwa, waweddeyana vina wopimelela. Ddabuno ddinowodha wedda na ohagalala.”

Malebo Okoddela akana malago apama anniwodhiha wawedihana attu akwihu na nriho. Mutoma ofwarela onele ologa mowakwana-mwene sabwa ya makani aba.