Attu ena anobuwela wi Mazu a Mulugu ahisadduliwa. Namavuhulela Izaiya ohiloga wi Nzu na Mulugu “ninokalawovi.” (Izaiya 40:8) Ninawodhe dhavi okana ebaribari wi mapikerelo a Mulugu kasadduliwe alebiwe ninga mwafuneyelani?

Mulugu ohikana ewodhelo ya obarela Nzu naye vina ya ottawiha oviriganihiwa. Masaka awale, Bibilia agalebeliwaga mpaddi mwina, anamalebaya ankala pasope vina anelega nzu nimodha-nimodha wi akane ebaribari yawi mazuya kenjedhilevo, kasadduliwe obe kavuguliwe. Enoziweya wi mwaha wokala attu ohakwana, anamaleba ena anvonya.

Akalawo mapipi menjene a Malebo Okoddela alebiwe wale. Akala nipapi nimodha nela ottiyana vangonovi na nina, antameliwa mapipi mena bang’ananihiwa wi voniwe ebaribariya—Wi onsuzevi dhina, kona mutoma “Será que a Bíblia foi Alterada?” mu jw.org.

Ninga motagiha, yaka ya 1947 nlogo nikuweliwa abeduwino ahifwanya mapipi awale mugurugudhani vakuvi na Mar morto, ankuweliwa mapipi a Mar Morto. Mapapi aba ahikana dhipaddi dha Malebo Okoddela, alebiwe vyaka matxikwi meli mundduni. Masaka abano aziwitxi ahiladdaniha dhilebiwe mmapapini mpu na Malebo Okoddela. Txini efwanyilanimo?

Anamasunza ahizindiyela wi mazu ali Mmaleboni Okoddela anihu masaka abano, kattiyanile na abale alebiwe vamaromo-vene. * Dhopepesa dhofwasedhiwa dha mapapi awale dhinowoniha wi muselu wa Malebo Okoddela onengesihu bubule olebiwe vamaromo-vene. Txibarene iyo ninokuluvela wi Mulugu ohifwaseyela onikoyela Malebo aye Okoddela.

Negengesaga Mazu a Mulugu nikuluvelege wi museluya onegensihu bwebaribari. Ovano ndoweni nisekesereni txini enasunzehu na anamavuhulela a Mulugu.