Oromana nsaka nipaddutxiwe nlogo na attu, Muttanddi wehu wanloga na awene alabihedhaga anju na anamavuhulela. Iyene ohasakula alobwana wi alebe dhipikireliye vina dhinfuniye wavaha attu. Mulugu ohipikirela wila enowodheya okana wagalala musogorho. Ninawodhe dhavi ofwanya mapikirelo a Mulugu masaka abano?

Muselu onnifunana Mulugu wi niziwe oli mMaleboni Okoddela. (2 Timóteo 3:16) Mulugu wawodhihile dhavi anavuhulela oleba muselu waye? (2 Pedro 1:21) Mulugu ddwaweddiha na muya wokoddela wi alebe dhafuniye. Jijuwene empadduwa masaka abano. Karoma omubuwela mwinya wa mabasa onimuloba namaleba waye oleba karta; kartaya enkala yani? Muhaganyedha enkala ya mwinya wa mabasaya. Na mukalelo wakakene, Mulugu ohalabihedha attu wi alebe muselu waye, nona mwinya wa Malebo Okoddela ddi Mulugu.

Mazu a Mulugu battima vaddiddi, iyene onfuna wi attu otene engesege vina anonelegemo. Masaka abono “muthaka wapama, onlabela masaka otene”, onowafiyedha attu “a vilabo dhotene, a mahimo, a vilogelo, a malogo otene.” (Ovuhulela 14:6) Na mareliho a Mulugu, Malebo aba Okeddela anofiyedhiwana attu a dhilogelo okwaranya 3.000, dhottiyana-ttiyana; opakiwa oku onokwaranya manivuru mena.