Mulugu ohavaha attu mvaho wa ologa—wi awodhege ologa na iyene vina awodhege onfurumulelamo munlobeloni dhinadhugudha. Namavuhulela David ohilobela dhahi: “Nyuwo munowakela nlobelo na athu; dhahene etene anodha oususelani na dhothega dhawa.” (Masalmo 65:2) Mbwenye ninawodhe dhavi olobela wi nirumeliwe vina nakele mareliho a Mulugu?

Nlobelo nawo ninowuttukulela omfurumulela Mulugu segedho dhamurimani mwawo—wi ombwekele dhozuzumiha dhawo. (Masalmo 62:9) Namadhulu-dhulu onoziveliwa na malobelo anda mirimani.

Enoziweya wi Mulugu ohikana mazina menjene a ettomo, mbwenye iyene, ohikana naye-nene nivittomiliye. Iyene ohiloga: “Miyo ddili [Yehova] nzina naga thinthi-wene”. (Izaiya 42:8) Nzina na Yehova ninofwanyeya mMaleboni Okoddela dila dhowakwana 7.000. Anamavuhulela enjene mmalobeloni mwawa anlogamo nzina na Mulugu. Abrahamu ohiloga: “Nabuya [Yehova] muddilevelele, kamunyanyuwele ntidi naga [na ologa na nyuwo].” (Wita 18:30) Iyo vina nilogege nzina na Yehova nigalobelaga.

Yehova onononelamo dhinnidhugudha vina dhinubuwelihu, kintanala elogelo-elogelovi enlobelihuna. Mazu aye anonikuluveliha wi: “Mulugu kanimuthiyaniha muthu. Iyene onomukwela muthu ddi muthu onimurumela, oneddana enimfuneyena, ahañganaga nlogo mundheye.”—Merelo 10:34, 35.

Nona, wi nirurihiwe na Mulugu ninofwanyela okosa venjene ottiya olobelavi. Mutoma onfwarela onela ologa txini enfwanyelihu okosa.