Ninawodhe Dhavi Waweddiha Attu N’okwela
Iyo notene nili anamudhi, sabwani nidhile mwa mulobwana woroma, Adamu. Anamudhi anofuniwana okwelana vina ottittimihana muttu na mukwaye, mbwenye masaka abano, enorutxa vaddiddi attu orihana. Mulugu wehu wokwela kanfuna dhahene.
TXINI ENLOGA MALEBO OKODDELA MWAHA WA OKWELA
“Mwirege wakwela akwinyuyá n’ekalelo envikwelinyuna.”—ONAMAKUTHA 19:18.
“Mwakwele anuwiddani”.—MATEU 5:44.
MERELO A WAKWELANA ATTU
Kona enloga Mulugu sabwa ya okwela mu Nzuni naye, apa va 1 Korinto 13:4-7:
“Onkwela, onovilela [vina] onoakoddelela murima athu.”
Katanalela: Weyo onkala dhavi akwawo agaweddihaga n’ovilela, n’okurumuwa, vina ahuwobelaga owali ogakosela yabure?
Onkwela “kankoya ntxiga.”
Katanalela: Weyo onkala dhavi akwawo agaweddihaga na ntxiga obe n’opuja?
Onkwela “kankumbela vaye.”
Katanalela: Weyo onkala dhavi akwawo agarihaga dhofuna dhawo, ahiwadelelaga dhawavi bahi?
Onkwela “kanziveliwana dhopuja.”
Katanalela: Mulugu ohikana murima wa walevelelana attu ottega. Iyene “Kankalela oninyanyuwelavi, owali waye kungonela.” (Masalmo 103:9) Iyo ninoziveliwa nigaleveleliwa na muttu omuttegelihu. Nona jofuneya vina walevelela attu akwihu aganittegela.—Masalmo 86:5.
Onkwela “onothaba na dhebaribari.”
Katanalela: Iyo nigapadduweliwaga dhokubanyiha, kaninziveliwa wawona attu ena ohagalelene mwaha wa matabuwo ehu. N’ekalelo yakakene, iyo kannagalala na matabuwo akwihu, masiki akala awene anoneddiha na obure.
Akala nihikana efunelo ya ojavo mareliho a Mulugu, ninofwanyela wakwela attu akwihu nihitanalaga elani. Marhe mena a iyo okosana ejuwene, ba wakamihedha abale anjombeliwa.
