ATTU aganeddelaga ttagaraga ninoziveliwa. Oneddela wawa ttagaraga ononilibiha oziwa wila awene anonitanala. Txibarene iyo ninotamalela attu ena aganeddela ttagaraga, kito ninsunzavo eni na ttagaragaya?

Muttu ona ttagaraga onowatanala attu ena onotonyihedha na mazu vina merelo. Kahiyo wila ttagaraga oderetu onkosiye bahi, mbwenye onowakwela attuya vina onononelamo eniwamo awene. Yattimaya jawi ttagaraga onokosa epaddi ya embala muya. (Galásia 5:22, 23) Yehova onjedhela wila iyo notene nikale attu ana ttagaraga, iyo ninowona wila iyene na mwanaye anonitonyihedha ttagaraga vina ninofwanyela ofwara yotagiha yawa.

Yehova onowaweddela ttagaraga attu etene masiki nabaleya ‘animupuja vina animuthegela.’ (Luka 6:35) Motagiha, Yehova “onapathutxela nzuwa athu apama na athu abure, onarubwihedha muzogwe athu awiwananeyana na athu ahiniwananeyana.” (Mateu 5:45) Nona masiki muttu ohinroromela wila Yehova Muttanddi vina ohinivaha egumi, onowona ttagaraya yaye vina onofwanya wagalala vang’ono mwigumini.

Mukalelo waderetu otonyihedhile Yehova tagaraga jijile yakoseliye Adamu na Eva. Mmalelani ottega, ‘avyona wi ali yovi; attungela mataba a mfigera, ahabala.’ Yehova wanziwa wila awene kobudduwa mmuddani mwa Edeni agahifuna okana guwo dhinkuba sabwani ‘mattaka agahamelihedha minga.’ Ninga Yehova ddattagaraga “oasonela dhabalo dha thebe oawabaliha.”—Wita 3:7, 17, 18, 21.

Ebaribari wila Yehova ohikana ttagaraga “onowapathutxela nzuwa athu apama na athu abure” mbwenye iyene onazuzumeletxa abale animulabela. Motagiha, Zakariya valiye namavuhulela, anju ahizuzuma sabwani ana Izrayel ahittiya omaga mparha wa Yehova o’Jeruzalemi. Yehova owiwa yaloga anju venevo omwakula na “mazu othabiha murima.” (Zakariya 1:12, 13) Yehova ohimweddiha namavuhulela Eliya na mukalelo wakakene. Wahikalawo mudhidhi waliye wokumuwene bamukumbirha Yehova okwa. Yehova wahitonyihedha wila onomutanala nona bamuruma anju wila amulibihe. Vina wahimubutxa namavuhulelaya wila kali yeka. Ttagaraga ena Yehova ehimuttukulela omulibiha Eliya odhowana mabasa akosiye. (1 Amwene 19:1-18) Ninga alabeli a Yehova, ninawodhe dhavi osaza ttagaraga ya Yehova na mukalelo waderetu?

Vali Yezu velaboni ya vati attu annonona wila iyene wakana ttagaraga. Iyene txipo kamagelela obe kakokomedha attu okosa dhafuniye. Wanatanala attu ena nona baloga: “Nyuwo motene mulemile, mukukumuwile mudhe vali miyo, ddinoulibihani. . . . Muthorho waga  kunlemela.” (Mateu 11:28-30) Sabwa ya iyene okana ttagaraga, attu ejene aninfwara wego-ku-wego wadhowiye. Yezu wanakanela ttagaraga nona wanavaha oja, wanavulumutxa aredda vina wanasunziha “dhinjidhene” mwaha wa Babe.—Marko 6:34; Mateu 14:14; 15:32-38.

Yezu wannonelamu dhawiwamo attu nona wanakanela ttagaraga. Elobo modha entonyihedha ejene jawi katamela mudhidhi owakamihedha attu, na ttagaraga yaye wanimukamihedha muttu-ddi-muttu wanfiyedha. (Luka 9:10, 11) Kobuwela empadduweli muyana oddule akala malabo etene vati. Iyene wanjedhela ovulumutxiwa, nona battidda guwo dha Yezu. Mowiwanana na Nlamulo na Mizé, muttu ninga oddulene kafwanyela okosa elobo sabwani wali mukwaruli. (Onamakutha 15:25-28) Yezu woonilemo dhavi? Iyene kamunyanyuweli. Wahona wila welowova vina wahimweddela ttagaraga sabwani wahikala vyaka dhowakwana 12 atabuwaga na ereddaya. Wahenjedhedha: “Mwanaga, ororomela wawo ouvulumutxa. Dhowa na murenddele, eredda yawo egoma.” (Marko 5:25-34) Txibarene Yezu wali muttu wattagaraga!

Dhotagiha dhihonilehu, dhihinisunziha wila akala nili attu ana ttagataga ninele okosa dhilobo wila nakamihedhe attu ena. Yezu onitonyihedha ejene mwalogiliye musibo wa Musamariya wapama. Muyuda oddule wahiyeliwa, wahivaddiwa battiyiwa murimene, mudila. Musamariya wavira wahimweddela ttagaraga mulobwana oddule, masiki aziwaga wila Ayuda na iyene kewanana. Opama ohihimuttukulela omukamihedha mulobwana oddule wavorehiwe. Wahimukuputta bamuweliha vaburuni vaye. Musamariya oddule wahimuttukulela o numbani waleddo vina wahipitxa kobiri wila akweyiwe.—Luka 10:29-37.

Ttagaraga ononikamihedha okala attu ana mirugu vina ninowalibiha ena na merelo vina mazu. Bibilia onologa: “Makathamiho anomukukumula muthu, mazu a pama anompangarhaza.” (Gano 12:25) Ttagaraga na oderetu dhinonittukulela ologa dhilobo dhinalibiha attu ena, iyo vina ninowagalala. * (Koona yowenjedhedha.) Nigalabihedha mazu a ttagaraga ninotonyihedha wila ninowatanala abale anfwanyiwa makattamiho vina ninele wakamihedha owodha owanana makattamiho angumananina.—Gano 16:24.

Iyo notene nihikana ewodhelo yotonyihedha ttagaraga sabwani Mulugu onittanddile ninga iyene. (Wita 1:27) Motagiha, kazembe Júlio mukadda Roma wamuttukulele Paulo o’Roma “wamuriha Paulo, omurumeliha odhowa ogumana na akwaye. Awene amwakela, amvaha dhomukalihana” o’kwatti ya Sidon. (Merelo 27:3) Mubwinile paporo wana Paulo na attu ena, attu akala esuwa ya Malta “awawakela na mada omeli” awagasela motto wila awotte. (Merelo 28:1, 2) Attu aba ahikosa elobo yaderetu. Ninomwagalaliha Yehova nigakala attu antonyihedha ttagaraga mudhidhi wotene.

Yehova onjedhela wi ttagaraga ekose mpaddi wa egumi yehu. Sabwani iyene onfuna wila ‘nikale’ attu a ttagaraga. (Kolosi 3:12) Mbwenye kili yovevuwa okala muttu ona ttagaraga. Sabwaya? Sabwani masaka mena iyo ninokaana manyazo, wova obe ovittukulela. Obe ninowona wila omukaanela ttagaraga muttu oniruwanile elobo yorutxa. Akala ninomulobelela Yehova nikumbiraga muya waye wotxena, iyene onele onikamihedha okala attu ana ttagaraga.—1 Korinto 2:12.

 Ninaziwe dhavi wila ninokosa guru wi nikale attu a ttagaraga? Kavivuze: ‘Miyo ddinovilibihedha wawiwa nofwasa attu ena obe ddinoveda ononelamo enazuzumiha? Ddinowodha ozinddiyela akala attu ena anofuna nikamihedho? Ninga ninkala masaka omariha Miyo ddinowakanela ttagaraga abali ahina anamudhi mmulogoni obe ddinokosa mandano nawene?’ Kakana yogana ya waziwa attu ankala na weyo makamaka abali a mmulogoni. Ogakosa dhawene onele oziwa makattamiho angumanana awene vina enajombela. Ovenyana ddabuno kavilibihedhe waweddiha attu na ttagaraga, ogakosa dhawene onele oziveliwa otonyihedha mukalelo obu. (Mateu 7:12) Kamukumbirhe Yehova nikamihedho, iyene onoruriha ovilibihedha wawo wa okala muttu ona ttagaraga.—Luka 11:13.

Paulo ohiloga wila ttagaraga elobo yamukamihedha omalaleyoni. (2 Korinto 6:3-6) Attu anziveliwa na Paulo sabwani iyene wanloga vina wanakosela dhilobo na ttagaraga, awene annonelamo wila iyene anazuzumela. (Merelo 28:30, 31) Na mukalelo wakakene, akala iyo ninokala attu ana ttagaraga, ena anele okana efunelo yosunza ebaribari. Nigamutonyihedha ttagaraga muttu-ddi-muttu, masiki nabale anniruwana, namudhidhiya anele osaddula mukalelo wawa. (Roma 12:20) Bafiyedha ofuna omusunza Bibilia.

O’paraizu attu etene anele otonyihedhana ttagaraga muttu na mukwaye. Anavenyihiwe mukwani anele ofuna weddileliwa ttagarga nabaleya a masaka a mundduni. Eji txibarene enowattukulela attu okana ttagaraga. Muttu ohina ttagaraga vina ohinakamihedha attu ena kanjedhela okala vati va Omwene wa Mulugu. Attu etene ana okwela vina ttagaraga anele okalawo namukalakala Mparaizuni. (Masalmo 37:9-11) Awene txibarene anele okala mwilaboni na murenddele vina kamunapadduwe ngovi! Nsaka ntto nihinadha ninele okana yopurelamo nigakala attu ana ttagaraga. Na mukalelo gani?

Bibilia onologa: “Muthu wofewa murima, mwinyene onojavo.” (Gano 11:17) Onaweddiha akwaye na ttagaraga, onele weddihiwa na mukalelo wakene. Yezu ohiloga: “Na mpimo wokokene onapimenyuna akwinyu, nyuwo vina munopimiwana.” (Luka 6:38) Elobo yovevuwa, muttu ona ttagaraga okosa mandano aderetu vina odhowana vasogorho mandanoya.

Murumiwi Paulo wahiloga na mulogo wa Éfeso “mukale athu amurima, aneddelana thagaraga. Mulevelelanege.” (Éfeso 4:32) Attu otene a mmulogoni akala ahikana ttagaraga vina baderetu, mulogoya onokala mumodhani vina onovadda. Iyo vina kanaloge bure abalihu vina wateya obe ologa elobo-txilobo entakaliha omuttu wawa. Ninofwanyela ologa dhilobo dhinlibiha vina dhinkamihedha. (Gano 12:18) Yodhavoya enakale wila mulogo wotene onele omulabela Yehova na wagalala.

Ninofwanyela ononelamo wila ttagaraga mukalelo ontonyihedhiwa na mazu vina merelo. Nigakala attu ana ttagaraga ninosanza okwela na otapuwa mada wa Yehova. (Éfeso 5:1) Mulogo onele okala wovadda attu ena anele ofuna osunza ebaribari sabwa ya Yehova. Ninofwanyela okosa muli mwetemwene wila attu one wila Anamoona a Yehova attu ana ttagaraga!